បញ្ហារបស់កម្មករកម្ពុជា៖ បាតដៃទី៤ចេញមុខ តែដូចជាយឺតពេលសម្រាប់ឆ្នាំ២០១៤
ចុះផ្សាយនៅថ្ងៃ៖
ស្តាប់ - ១១:៣២
វិបត្តិប្រាក់ឈ្នួលអប្បបរមាសម្រាប់កម្មករកាត់ដេរសម្លៀកបំពាក់ និងផលិតស្បែកជើង បានបង្កឱ្យមានបាតុកម្ម របស់កម្មករ និងការបង្ក្រាបដោយអាជ្ញាធរ។ ព្រឹត្តិការណ៍ហិង្សា នៅដើមខែមករានោះ បានធ្វើឱ្យមនុស្ស ៤នាក់ស្លាប់ ៣៩នាក់របួស និង២៣នាក់ជាប់ឃុំ។ សេចក្តីសម្រេច នៅថ្ងៃទី៣១ ខែមករា ឆ្នាំ២០១៤ បានដំឡើងប្រាក់ខែទាបបំផុតឱ្យកម្មករ ពី៨០ដុល្លារ ទៅ១០០ដុល្លារ ក្នុងមួយខែ សម្រាប់ឆ្នាំ២០១៤ ប៉ុន្តែមិនបានរម្ងាប់ការទាមទាររបស់កម្មករ ដែលចង់បានដល់ទៅ១៦០ដុល្លារក្នុងមួយខែទេ។ ការបង្ក្រាបដោយកងកម្លាំងប្រដាប់អាវុធរបស់រដ្ឋាភិបាល នៅលើផ្លូវជាតិលេខ៤ និងលើវិថីវេងស្រេងនោះ ក៏មិនបានបញ្ចប់ការតវ៉ារបស់កម្មករមួយចំនួន ដែលជាសមាជិកសហជីពខ្លះដែរ។ ផ្ទុយទៅវិញ វិបត្តិប្រាក់ឈ្នួលអប្បបរមា ក្នុងវិស័យវាយនភ័ណ្ឌ កាន់តែរាលដាលឡើង នៅពេលដែលសហជីពពិភពលោក និងអ្នកបញ្ជាទិញល្បីៗ បានចូលមកពាក់ព័ន្ធ។
