អាណាចក្រក្រុមហ៊ុនបច្ចេកវិទ្យាទាំង៤ « GAFA » កំពុងត្រូវគេចង្អុរមុខកាន់តែខ្លាំង
Google Apple Facebook Amazon (GAFA) គឺជាក្រុមហ៊ុនយក្សទាំងបួន ដែលកំពុងតែក្តោបក្តាប់ទីផ្សារបច្ចេកវិទ្យាពិភពលោក។ ក្រុមហ៊ុនយក្សទាំងបួននេះ កំពុងតែត្រូវគេរិះគន់ចង្អុរមុខ កាន់តែខ្លាំងឡើង ពីសំណាក់ អ្នកប្រើប្រាស់ ក៏ដូចជាអាជ្ញាធរសាធារណៈ ថាបានក្តោបក្តាប់ទីផ្សារផ្តាច់មុខតែម្នាក់ឯង ព្រមទាំងបានជះឥទ្ធិពលអាក្រក់ ទៅដល់មតិសាធារណៈទូទៅទៀតផង តាមរយៈ ការចែកចាយព័ត៌មានមិនពិត បំភ័យនិងបំផ្លើស នៅតាមបណ្តាញអ៊ីនធើនែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ក្រុមហ៊ុនយក្សទាំង៤ Google Appel Facebook និង Amazon ដែលគេហៅកាត់ថា GAFA គឺជាអាណាចក្រនៃប្រព័ន្ធបច្ចេកវិទ្យាអ៊ីនធើនែត ព្រមទាំងលំហូរសេដ្ឋកិច្ចហិរញ្ញវត្ថុ ដែលកើតចេញពីបច្ចេកវិទ្យានេះ។ ជាមួយនឹងទឹកប្រាក់ ៨០០ពាន់លានដុល្លារ Appel គឺជាក្រុមហ៊ុន ដែលមានធនមូលប័ត្រ ច្រើនជាងគេបំផុត នៅលើផ្សារហិរញ្ញវត្ថុ។ ចំណែកក្រុមហ៊ុន Alphabet ដែលជាក្រុមហ៊ុនមេ របស់ Google មានធនមូលប័ត្រ ប្រមាណជា៦៥០ពាន់លានដុល្លារ។
ជារៀងរាល់ខែ មនុស្សប្រមាណជា២ពាន់លាននាក់ ចូលទៅបើកមើលគណនីFacebook របស់ខ្លួន ដែលការនេះ ញ៉ាំងឲ្យFacebook អាចប្រមូលប្រាក់បានរាប់រយលាន បានមកពីការផ្សាយពាណិជ្ជកម្ម។ គ្រាន់តែនៅសហរដ្ឋអាមេរិកមួយ Google ក្តោបក្តាប់ទីផ្សារផ្សាយពាណិជ្ជកម្មលើអ៊ីនធើនែត ដល់ទៅ ៣ភាគ៤។ ចំណែក Amazon បានវាទទីយកទីផ្សារលក់ទំនិញគ្រប់មុខ តាមអ៊ីនធើនែត បណ្តាលឲ្យហាងទំនិញ ឬអ្នកលក់ដូរតូចតាច តាមផ្លូវ លែងមានអតិថិជន។
ក្រុមហ៊ុនទាំងនេះ កាន់តែធំ កាន់តែមានឥទ្ធិពល។ អាជ្ញាធរអឺរ៉ុប បានចាប់ផ្តើមចាត់វិធានការ លើក្រុមហ៊ុន Google ពីបទបំពានអំណាចលើទីផ្សារតែម្នាក់ឯង។ លើសពីនេះទៀត ក្រុមហ៊ុនធំៗ ទាំងបួននេះ ក៏ត្រូវបានអាជ្ញាធរអឺរ៉ុប ចោទប្រកាន់ ថាបានគេច មិនបង់ពន្ធ ឲ្យសក្តិសមទៅនឹងចំណូល ដែលខ្លួនរកបានទេ។ ការចង្អុរមុខរិះគន់ ក្រុមហ៊ុនយក្សទាំងនេះ មិនមែនតែទៅលើប្រព័ន្ធសេដ្ឋកិច្ចហិរញ្ញវត្ថុប៉ុណ្ណោះទេ តែគឺស្ថិតនៅលើចរិកលក្ខណៈ នៃការរកស៊ី របស់ក្រុមហ៊ុនទាំងនោះ។
មនុស្សម្នាជាច្រើន បានចោទថា ក្រុមហ៊ុនទាំងនោះ បានធ្វើគ្រប់យ៉ាង ដើម្បីជះឥទ្ធិពលទៅលើជីវិតប្រចាំថ្ងៃរបស់អ្នកប្រើប្រាស់ ហើយនិងទាញយកប្រយោជន៍សេដ្ឋកិច្ចពីអ្នកប្រើប្រាស់។ យោងតាមការស្ទាបស្ទង់មតិមួយ ចេញផ្សាយកាលពីថ្ងៃចន្ទ ទី ២៥កញ្ញា បង្ហាញថា ប្រជាជនអាមេរិក ៧៥% គិតថាជីវិតប្រចាំថ្ងៃរបស់ពួកគេ បានរងឥទ្ធិពលដោយផ្ទាល់ ពីក្រុមហ៊ុនបច្ចេកវិទ្យាទាំងនេះ។ ហើយក្នុងចំណោមនេះ ៥៣%ជឿថា គឺជាឥទ្ធិពលអាក្រក់។ លោក Bill Galston អតីតទីប្រឹក្សាលោក Bill Clinton បានលើកឡើងថា ក្រុមហ៊ុនយក្សទាំង៤នេះ មានអំណាចអាចធ្វើផ្គរធ្វើភ្លៀងបាន ហើយអាចប្រើឥទ្ធិពលធ្វើឲ្យរដ្ឋាភិបាល ដើរតាមផលប្រយោជន៍របស់ពួកគេទៀតផង។ បញ្ហានេះ គឺជាគ្រោះថ្នាក់ ដល់លទ្ធិប្រជាធិបតេយ្យ។
យ៉ាងណាមិញ ក្រុមហ៊ុន Facebook កំពុងតែត្រូវគេចោទ ថាបានលក់ទំព័រផ្សាយពាណិជ្ជកម្ម ទៅឲ្យភ្នាក់ងាររុស្ស៊ី ដើម្បីផ្សព្វផ្សាយព័ត៌មានបោកប្រាស់ ដែលឈានទៅបំភ័ន្តមតិសាធារណៈ កាលពីក្នុងកំឡុងពេលឃោសនាបោះឆ្នោត។ ប្រព័ន្ធ Algorithme ដែលFacebook ប្រើ ដើម្បីវាយលុក ផ្សាយពាណិជ្ជកម្ម ឬសារនានា ទៅតាមទំនោរនិយម របស់អ្នកប្រើម្នាក់ៗ ត្រូវបានគេជឿថាបានអនុញ្ញាតិឲ្យ ក្រុមមនុស្សមួយចំនួន យកទៅប្រើប្រាស់ ដើម្បីផលប្រយោជន៍អ្វីមួយផ្សេង ដូចជាការពន្យុះចរន្តគំនិតប្រកាន់ពូជសាសន៍ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ