សង្គមស៊ីវិល ចង់ឲ្យរដ្ឋាភិបាលពិភាក្សាជាសាធារណៈនិងបញ្ចេញសេចក្តីព្រាងច្បាប់ចុងក្រោយ ស្តីពីសមាគមនិងអង្កការមិនមែនរដ្ឋាភិបាល
អង្គការសង្គមស៊ីវិលមួយចំនួន តំណាងឲ្យអង្គការសង្គមស៊ីវិលជាង ២៧០ នៅព្រឹកថ្ងៃចន្ទ ទី៤ឧសភានេះ បានធ្វើសន្និសីទកាសែតរួមគ្នាមួយ នៅការិយាល័យអង្គការ Oxfamក្រុងភ្នំពេញ។ ជាសន្និសីទ ដើម្បីបង្ហាញពីការព្រួយបារម្ភ និងចង់ឲ្យរដ្ឋាភិបាលបង្កើតការពិភាក្សាជាសាធារណៈម្តងទៀត និងបញ្ចេញសេចក្តីព្រាងច្បាប់ចុងក្រោយ ស្តីពីសមាគម និងអង្គការមិនមែនរដ្ឋាភិបាល។ សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដែលរដ្ឋាភិបាលបានពង្រាងតាំងពីឆ្នាំ ១៩៩៥ និងបានពន្យាពេល កាលពីចុងឆ្នាំ ២០១១ ប៉ុន្តែចាប់ផ្តើមប្រញាប់អនុម័តនៅក្នុងខែឧសភា ដ៏ឆាប់ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នៅក្នុងសន្និសីទកាសែត នៅថ្ងៃទី៤ឧសភានេះ អង្គការសង្គមស៊ីវិលមួយចំនួន ដែលតំណាងឲ្យអង្គការសង្គមស៊ីវិលជាង ២៧០ បានសម្តែងក្តីព្រួយបារម្ភពីការអំពាវនាវរបស់លោកនាយករដ្ឋមន្ត្រីហ៊ុន សែន កាលពីថ្ងៃទី ៧មេសា ឆ្នាំ ២០១៥កន្លងទៅ ថានឹងត្រូវបញ្ជូនសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល ទៅកាន់ទីស្តីការគណៈរដ្ឋមន្ត្រី ក្នុងខែឧសភាឆ្នាំ ២០១៥នេះ ហើយនឹងត្រូវដាក់ជូនរដ្ឋសភា ធ្វើការអនុម័តនាពេលដ៏ឆាប់ខាងមុខ។
លោកតឹក វណ្ណារ៉ា ប្រធានអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា បានថ្លែងថា ការព្រួយបារម្ភកើតឡើងក៏ព្រោះតែគម្រោងនៃការអនុម័តសេចក្តីព្រាងច្បាប់នេះ គឺមានលក្ខណៈបន្ទាន់ ដោយមិនមានការពិគ្រោះយោបល់ជាសាធារណៈឡើយ។
តាមលោកតឹក វណ្ណារ៉ា អ្វីដែលសង្គមស៊ីវិល ចង់បានដើម្បីឲ្យអស់ចិត្តនៅពេលនេះ គឺស្នើឲ្យរដ្ឋាភិបាលផ្តល់សេចក្តីព្រាងច្បាប់ជាផ្លូវការស្តីពីសមាគម និងអង្គការមិនមែនរដ្ឋាភិបាល ដល់សាធារណៈជន ដើម្បីឲ្យមានភាពងាយស្រួលក្នុងការស្វែងរកច្បាប់នេះ។ មួយទៀត គឺរដ្ឋាភិបាលគួរតែបើកទូលាយឲ្យមានការពិគ្រោះយោបល់ ដោយតម្លាភាពជាមួយភាគីពាក់ព័ន្ធដូចដែលបានធ្វើកន្លងមក និងពិចារណានូវការព្រួយបារម្ភរបស់អង្កការសង្គមស៊ីវិល ព្រមទាំងទទួលយកនូវទស្សនៈពីសាធារណៈជន លើសេចក្តីព្រាងច្បាប់នេះ។
លោកខៀវ សុភ័គ្រ អ្នកនាំពាក្យក្រសួងមហាផ្ទៃ បានប្រាប់ថា រដ្ឋាភិបាលមិនអាចផ្តល់ជូនឲ្យបានទាន់ពេលវេលានូវសេចក្តីព្រាងច្បាប់ចុងក្រោយនោះទេ ប៉ុន្តែរដ្ឋាភិបាលធ្លាប់បានបង្កើតការពិភាក្សាថ្នាក់ជាតិ ចំនួន ២ដងរួចមកហើយ ចំពោះសេចក្តីព្រាងច្បាប់នេះ គឺកាលពីឆ្នាំ ២០០១ និងឆ្នាំ ២០១។
អង្គការសង្គមស៊ីវិលចំនួនជាង ២៧០ ដែលមានអង្គការអន្តរជាតិធំៗ ចំនួន ៥០ផង បានបញ្ជាក់ថា ប្រសិនបើសេចក្តីព្រាងច្បាប់នេះ ត្រូវបានអនុម័តដោយគ្មានការពិគ្រោះយោបល់ជាសាធារណៈចុងក្រោយនោះ វានឹងអាចជាការគំរាមកំហែងលើសេរីភាព ក្នុងការបង្កើតសមាគម និងលទ្ធភាពរបស់អង្គការសង្គមស៊ីវិល ក្នុងការផ្តល់ជំនួយដល់កម្ពុជា។ តាមសង្គមស៊ីវិល មាត្រាដែលគេព្រួយបារម្ភបំផុត ក្នុងសេចក្តីព្រាងច្បាប់នេះ គឺទាក់ទងនឹងការដាក់កំហិតលើលទ្ធភាពរបស់អង្គការអន្តរជាតិ ក្នុងការអនុវត្តកម្មវិធីឲ្យមានប្រសិទ្ធភាព។ កំហិតប្រតិបត្តិការរបស់អង្គការមូលដ្ឋាន និងការចុះបញ្ជីរបស់អង្គការ សមាគមផ្សេង។
លោកអំ សំអាត ប្រធានបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូ បានបញ្ជាក់ក្នុងសន្និសីទនោះថា ប្រសិនបើសេចក្តីព្រាងច្បាប់នោះ ត្រូវបានអនុម័ត តែមិនបម្រើប្រយោជន៍តាមរបបប្រជាធិបតេយ្យពិតប្រាកដទេ, អង្គការសង្គមស៊ីវិល នឹងធ្វើការតស៊ូមតិដោយសន្តិវិធី តាមរយៈគម្រោងផ្តល់ជំនួយផ្សេងៗ ក្រោយពីច្បាប់នោះចេញជារូបរាង។
គួរជម្រាបជូនថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ត្រូវបានតាក់តែងដោយព្រះមហាក្សត្រ កាលពីឆ្នាំ ១៩៩៥ ហើយត្រូវបានរដ្ឋាភិបាល បើកឲ្យមានការពិភាក្សាថ្នាក់ជាតិ នៅឆ្នាំ ២០០១ និង២០១។ ប៉ុន្តែនៅចុងឆ្នាំ ២០១១ លោកនាយករដ្ឋមន្ត្រីហ៊ុន សែន បានប្រកាសពន្យាពេលការអនុម័ត។ រហូតដល់ដើមខែមេសា ឆ្នាំ២០១៥នេះ លោកនាយករដ្ឋមន្ត្រីខ្មែរ ក៏បានរំលឹកតម្រូវការនៃច្បាប់នេះ ហើយបន្ទាន់នឹងអនុម័តនៅក្នុងខែឧសភានេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ