លោកហ៊ុន សែន៖ សេចក្តីព្រាងច្បាប់គ្រប់គ្រងអង្គការសង្គមស៊ីវិលនឹងត្រូវអនុម័តជាបន្តបន្ទាប់
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន នៅថ្ងៃអាទិត្យនេះ បានប្រកាសថា សេចក្តីព្រាងច្បាប់ស្តីពីការគ្រប់គ្រងអង្គការសង្គមស៊ីវិលនឹងត្រូវគណៈរដ្ឋមន្ត្រីប្រជុំពិភាក្សា និងអនុម័តនៅក្នុងខែឧសភាខាងមុខនេះ មុននឹងដាក់ទៅកាន់រដ្ឋសភា ដើម្បីពិភាក្សា និងអនុម័តបន្ត។ លោកហ៊ុន សែន បានប្រកាសដូចនេះ នៅក្នុងពិធីសម្ភោធអាគារ និង ជួបសួរសុខទុក្ខកុមារពិការគថ្លង់នៅអង្គការគ្រួសារថ្មី ក្នុងរាជធានីភ្នំពេញ។ យ៉ាងណាក៏ដោយ សេចក្តីព្រាងច្បាប់ដ៏ចម្រូងចម្រាសនេះ ត្រូវបានសង្គមស៊ីវិលសម្តែងការមិនពេញចិត្តដោយបានចាត់ទុកថា នឹងរឹតត្បិតសកម្មភាពរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ប្រមុខរដ្ឋាភិបាលកម្ពុជា នៅតែបន្តជំរុញឲ្យសេចក្តីព្រាងច្បាប់ស្តីពីការគ្រប់គ្រងអង្គការសង្គមស៊ីវិល អនុម័តឲ្យបានក្នុងពេលឆាប់ៗខាងមុខ បើទោះបីសេចក្តីព្រាងច្បាប់នេះ រងការរិះគន់ និងមិនពេញចិត្តពីសំណាក់អង្គការសង្គមស៊ីវិលនៅកម្ពុជាក៏ដោយ។ ហើយនៅថ្ងៃនេះទៀតសោត លោកហ៊ុន សែន បានប្រកាសបង្ហាញច្បាស់ៗថា សេចក្តីព្រាងច្បាប់នេះ នឹងត្រូវអនុម័តជាបន្តបន្ទាប់ចាប់ពីខែក្រោយនេះតទៅ។
លោកហ៊ុន សែន៖ “ ហើយខ្ញុំសូមបញ្ជាក់ថែមមិញ ពេលវេលានៃការអនុម័តច្បាប់នេះ គឺមិនហួសពី ប្រហែលជាក្នុង ចាប់ពីខែ៥ហ្នឹងទៅ ប្រហែលប្រជុំដាក់ចូលក្នុងគណៈរដ្ឋមន្ត្រីហើយ រួចហើយដាក់ចូលសភា ចង់អ្នកណាគាំទ្រ ឫ មិនគាំទ្រ សំឡេងរបស់សមាជិកសភា ដែលមានសិទ្ធិអនុម័ត៥០បូក១ គឺគ្រប់គ្រាន់ ដើម្បីនឹងអនុម័តហើយ” ។
សេចក្តីព្រាងច្បាប់ស្តីពីការគ្រប់គ្រងអង្គការសង្គមស៊ីវិលនៅកម្ពុជានេះ ត្រូវបានរៀបចំរួចរាល់តាំងពីឆ្នាំ២០១។ វា គឺជាសេចក្តីព្រាងច្បាប់ដ៏ចម្រូងចម្រាសមួយដែលអង្គការសង្គមស៊ីវិលនៅកម្ពុជា មិនពេញចិត្ត ដោយចាត់ទុកថា ច្បាប់នេះនឹងក្លាយជាឧបករណ៍ដ៏មានប្រសិទ្ធភាពរបស់រដ្ឋាភិបាលក្នុងការរឹតត្បិតសេរីភាព និង ការធ្វើសកម្មភាពផ្សេងៗរបស់អង្គការសង្គមស៊ីវិល។ លោកធន សារាយ ប្រធានសមាគមការពារសិទ្ធិមនុស្សអាដហុក បានសម្តែងការព្រួយបារម្ភចំពោះសេចក្តីព្រាងច្បាប់ថ្មីនេះ ដោយលោកបានលើកឡើងថា កម្ពុជាមានច្បាប់គ្រប់គ្រាន់ហើយក្នុងគ្រប់គ្រងសកម្មភាពរបស់អង្គការសង្គមស៊ីវិល។
លោកធន សារាយ ៖ “ ដូច្នេះ ខ្ញុំគិតថា ការដែលបញ្ចេញច្បាប់ថ្មីនេះ គឺថា មានតែចំណុចអវិជ្ជមានទេដែលយើងខ្ញុំឃើញណាស់ ចំណុចអវិជ្ជមានគឺថា ចេញមកដើម្បី គេហៅថា កម្រិតនូវសកម្មភាពក៏ដូចជាសេរីភាពរបស់អង្គការសង្គមនានាដែលធ្វើការជួយសង្គម ជួយប្រជាពលរដ្ឋ។
ក៏ប៉ុន្តែលោកនាយករដ្ឋមន្ត្រីហ៊ុន សែន បានបញ្ជាក់ថា ការតាក់តែងច្បាប់នេះមិនមែនរដ្ឋាភិបាលមានបំណងរារាំងសកម្មភាពរបស់អង្គការសង្គមស៊ីវិលនោះទេ ប៉ុន្តែគឺចង់ធ្វើឲ្យមានតម្លាភាពរវាងអង្គការសង្គមស៊ីវិល ជាមួយរដ្ឋាភិបាលតែប៉ុណ្ណោះ។ បើតាមលោកហ៊ុន សែន ច្បាប់នេះ ប្រទេសណាក៏គេមានផងដែរ លើកលែងតែប្រទេសកម្ពុជា។
ប្រមុខរដ្ឋាភិបាលកម្ពុជា បានថ្លែងការពារសេចក្តីព្រាងច្បាប់ស្តីពីការគ្រប់គ្រងអង្គការសង្គមស៊ីវិលនេះ ដោយបានលើកឡើងពីអង្គការមួយដែលលោកមិនបញ្ចេញឈ្មោះ តែចង់សំដៅទៅលើអង្គការរបស់លោកស្រី ម៉ម សូម៉ាលីថា បានធ្វើឲ្យកម្ពុជាលក់មុខលើឆាកអន្តរជាតិ ។ បន្ថែមលើនេះ លោកហ៊ុន សែន ក៏បានលើកឡើងពីអង្គការមួយចំនួនទៀតផងដែរ ដែលត្រូវបានរដ្ឋាភិបាលរំសាយចោលនាពេលកន្លងមក ព្រោះសង្ស័យថា មានហិរញ្ញប្បទានភេរវកម្ម និងលាងលុយកង្វក់។ ទាំងនេះហើយ ដែលតម្រូវឲ្យមានការគ្រប់គ្រងត្រឹមត្រូវ។ ជាមួយគ្នានេះ លោកហ៊ុន សែន ក៏លើកឡើង អំពីរបាយការណ៍របស់អង្គការក្រៅរដ្ឋាភិបាលមួយចំនួនដែលមុនបញ្ចេញត្រូវយកទៅឲ្យស្ថានទូតប្រទេសផ្តល់ជំនួយដល់អង្គការទាំងនោះធ្វើការពិនិត្យ និងផ្តល់យោបល់ ដែលនេះត្រូវបានលោកនាយករដ្ឋមន្ត្រីចាត់ថា បំពានអធិបតេយ្យភាពរបស់កម្ពុជា។
យ៉ាងណាក៏ដោយ លោកធន សារាយ បានសង្កត់ធ្ញន់ថា អង្គការសង្គមស៊ីវិលដែលទទួលជំនួយពីបរទេស មិនបានប្រើប្រាស់ជំនួយនោះ ដើម្បីធ្វើឲ្យប៉ះពាល់ដល់អធិបតេយ្យភាពរបស់កម្ពុជានោះទេ។ បើតាមលោកធន សារាយ ប្រសិនបើអង្គការសង្គមស៊ីវិល ធ្វើរបាយការណ៍ឫនិយាយបំផ្លើសពីការពិត ដើម្បីប្រឆាំងរដ្ឋាភិបាលនោះ ប្រទេសផ្តល់ជំនួយគេនឹងមិនផ្តល់ឲ្យទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ