អង្គការតម្លាភាពអន្តរជាតិ រិះគន់ការមិនគោរពសន្ធិសញ្ញាប្រយុទ្ធប្រឆាំងអំពើពុករលួយឆ្លងប្រទេស
អង្គការដើម្បីតម្លាភាពអន្តរជាតិ ដែលមានទីតាំង នៅក្រុងប៊ែកឡាំង ទើបបានចេញរបាយការណ៍មួយ ស្តីពី ស្ថានភាពគោរពទៅតាមសន្ធិសញ្ញា ស្តីពីការប្រយុទ្ធប្រឆាំងអំពើពុករលួយឆ្លងប្រទេស នៃប្រទេសហត្ថលេខីរបស់អង្គការ សហប្រតិបត្តិការនិងអភិវឌ្ឍន៍សេដ្ឋកិច្ច។ តាមរយៈរបាយការណ៍នេះ ប្រទេសភាគច្រើន មិនបានគោរពទៅតាមសន្ធិសញ្ញា ដែលបានកំណត់ឲ្យប្រទេសហត្ថលេខី ប្រឹងប្រែងប្រយុទ្ធប្រឆាំងនឹងអំពើពុករលួយឆ្លងប្រទេស។
ចុះផ្សាយនៅថ្ងៃ៖
ស្តាប់ - ០១:៤៦
អង្គការដើម្បីតម្លាភាពអន្តរជាតិ មានបេកសកម្មចាំឃ្លាំមើល ការប្រព្រឹត្តិរបស់ប្រទេសសមាជិក សន្ធិសញ្ញា ស្តីពីការប្រយុទ្ធប្រឆាំងអំពើពុករលួយឆ្លងប្រទេស ដែលបានផ្តួចផ្តើមឡើងដោយ អង្គការសហប្រតិបតិ្តការនិងអភិវឌ្ឍន៍សេដ្ឋកិច្ច ហៅកាត់ថា OCDE។
តាមរយៈរបាយការណ៍ ប្រចាំឆ្នាំ២០១៤នេះ មានតែប្រទេស៤ តែប៉ុណ្ណោះ ដែលមានពិន្ទុល្អ ក្នុងការខិតខំប្រឹងប្រែង ប្រយុទ្ធប្រឆាំងនឹងអំពើពុករលួយឆ្លងប្រទេស ដោយក្នុងនោះមានប្រទេសក្រិក និងបារាំង ដែលបានធ្វើការស៊ើបអង្កេត ករណីពុករលួយ បានច្រើនគ្រាន់បើជាងគេ។ ផ្ទុយទៅវិញ ប្រទេសចំនួន ២២ ក្នុងចំណោមប្រទេសហត្ថលេខី ទាំង៤១ មិនបានធ្វើការប្តឹងប្តល់ រឺស៊ើបអង្កេត ស្តីពីករណីពុករលួយឆ្លងប្រទេស សូម្បីតែមួយករណីក៏គ្មានដែរ។ ក្នុងនោះមានដូចជា រុស្ស៊ី ជប៉ុន ប្រេស៊ីល ប៊ុលហ្គារី និងប៊ែលហ្សិក ជាដើម។
របាយការណ៍ ក៏បានបញ្ជាក់ផងដែរថា ប្រទេសធំៗ ៤មានសហរដ្ឋអាមេរិក អាល្លឺម៉ង់ ចក្រភពអង់គ្លេស និងស្វីស ដែលមានចំណែកទីផ្សារពាណិជ្ជកម្មពិភពលោក ស្មើនឹង ២២% បានបន្តប្រយុទ្ធប្រឆាំងនឹងអំពើពុករលួយឆ្លងប្រទេសយ៉ាងសកម្ម។ របាយការណ៍ របស់អង្គការតម្លាភាពអន្តរជាតិ ក៏ឆ្លៀតបញ្ជាក់ផងដែរ អំពីផលអាក្រក់ នៃអំពើពុករលួយឆ្លងប្រទេស ទៅលើសេដ្ឋកិច្ច និងការលូតលាស់ របស់ប្រទេសក្រីក្រ។
សូមបញ្ជាក់ថា សន្ធិសញ្ញា្ននេះ បានចូលជាធរមាន កាលពីឆ្នាំ១៩៩៩ ដោយមានប្រទេសសមាជិកអង្គការ OCDE ចំនួន ៣៤ បានចុះហត្ថលេខា និងប្រទេសក្រៅអង្គការនេះ ៧ផ្សេងទៀត។ បទល្មើសពុករលួយឆ្លងប្រទេស គឺសន្ធិសញ្ញានេះ សំដៅដល់សកម្មភាពផ្តល់ជាសំណូកសូកប៉ាន់ រឺការស៊ីសំណូក រវាងក្រុមហ៊ុនបរទេស និងអាជ្ញាធរក្នុងស្រុក របស់ប្រទេសមួយ ដើម្បីទទួលបានទីផ្សារ រឺសិទ្ធិធ្វើអាជីវកម្មផ្សេងៗ ។ មានក្រុមហ៊ុនបរទសជាច្រើន ដែលរកស៊ីផ្លូវកាត់ ហើយសូកប៉ាន់អាជ្ញាធរក្នុងស្រុក ដើម្បីឈរជើងក្នុងទីផ្សារ រឺទទួលបានកិច្ចសន្យាសម្បទានផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ