តើពិធីស្បថចូលកាន់មុខតំណែងប្រធានាធិបតីរបស់លោក ដូណាល់ ត្រាំ ចំណាយទឹកប្រាក់អស់ប៉ុន្មាន?
ចុះផ្សាយនៅថ្ងៃ៖
ស្តាប់ - ០៣:៥៦
ទីបំផុត លោក ដូណាល់ ត្រាំ បានក្លាយជាប្រធានាធិបតីអាមេរិកទី ៤៥ ក្រោយពីបានស្បថចូលកាន់មុខតំណែងជាផ្លូវការកាលពីថ្ងៃសុក្រ ទី២០ មករាកន្លងទៅនេះ។ ការស្បថចូលកាន់អំណាច គឺជាប្រពៃណីដ៏ចំណាស់មួយក្នុងឆាកនយោបាយអាមេរិកចាប់តាំងពីឆ្នាំ១៧៨៩ មកម្ល៉េះ។ ជាទូទៅ ពីធីស្បថនេះគ្រាន់តែត្រូវការវត្តមានប្រធានាធិបតីជាប់ឆ្នោតថ្មី ព្រះគម្ពីមួយក្បាល និងសំដីស្បថដែលមានពាក្យពេចន៍តែ ៣៥ ម៉ាត់ប៉ុណ្ណោះ។ ប៉ុន្តែ កម្មវិធីនេះចំណាយលុយច្រើនដោយសារតែមានកម្មវិធីបន្ទាប់បន្សំផ្សេងៗទៀត។ បើប្រៀបធៀបនឹងកម្មវិធីស្បថរបស់ប្រធានាធិបតីមុនៗ កម្មវិធីរបស់លោកប្រធានាធិបតីថ្មី ដូណាល់ ត្រាំ ត្រូវបានគេប៉ាន់ប្រមាណថា ចំណាយថវិការខ្ពស់ជាងគេ។ តើនរណាគេជាអ្នករ៉ាប់រងការចំណាយនេះ?
ដូចតាមការគ្រោងទុក ថ្ងៃទី២០ មករា វេលាម៉ោង ១២ រសៀល លោក ដូណាល់ ត្រាំ បានចូលស្បថចូលកាន់មុខតំណែងជាផ្លូវការ ក្នុងឋានៈជាប្រធានាធិបតីអាមេរិកទី៤៥។ ដូចតាមប្រពៃណី ក្បួនដង្ហែចម្ងាយ ៣ គីឡូម៉ែត្រនៅលើដងវិថី Pennsylvania ត្រូវបានចាប់ផ្តើម ដោយបានចេញដំណើរពីវិមានកាពីតូលឆ្ពោះទៅកាន់សេតវិមាន។ សំរាប់ឆ្នាំនេះ មានមនុស្សចំនួនតែ ៨ ពាន់ប៉ុណ្ណោះបានចូលរួមក្នុងពិធីក្បួនដង្ហែរនេះ។
កម្មវិធីស្បថចូលកាន់មុខតំណែងនេះក៏មានអមដោយកម្មវិធីបន្ទាប់បន្សំផ្សេងៗទៀតផងដែរ។ មានជាអាទិដូចជា៖ ការរាំកំសាន្ត ការប្រគុំតន្រ្តី កាពិសាភោជនីយអាហារពេលល្ងាច និងជំនួបបង្កើតទំនាក់ទំនងរវាងសមាជិកខុទ្ទកាល័យថ្មី និងក្រុមអ្នកជំនួញជាដើម។
ដោយសារតែមានមនុស្សចូលរួមទស្សនារាប់សែន ឬលាននាក់នៅលើទីលាន National Mall ក្នុងរដ្ឋធានីវ៉ាស៊ីងតោន បន្ទុកចំណាយលើផែ្នកសន្តិសុខក៏កាន់តែឡើងខ្ពស់ផងដែរ។ បើតាមសារព័ត៌មានអាមេរិកជាច្រើន កម្មវិធីស្បថចូលកាន់មុខតំណែងរបស់លោក ដូណាល់ ត្រាំ ចំណាយថវិកាអស់ ២០០ លានដុល្លារ។
សារព័ត៌មាន The New York Times យល់ឃើញថា តួលេខនេះខ្ពស់ជាងគេបង្អស់ក្នុងប្រវត្តិសាស្រ្តនៃកម្មវិធីពិធីស្បថចូលកាន់តំណែងប្រធានាធិបតី។ប៉ុន្តែ តួលេខនេះគ្រាន់តែជាការប៉ាន់ស្មានត្រួសៗតែប៉ុណ្ណោះ ព្រោះការថវិកាចំណាយលើកម្មវិធីផ្សេងៗ គឺត្រូវបានបែងចែកអោយទៅគណៈកម្មាធិការផ្សេងៗខុសគ្នា។
ថវិការចំណាយនេះមានមួយផ្នែកជាបន្ទុករបស់រដ្ឋាភិបាលអាមេរិក និងអាជ្ញាធរពាក់ព័ន្ធនានា។ ចំណែកមួយផែ្នកធំទៀត គឺបានមកពីការរៃអង្គាសពីសំណាក់សប្បុរសជន និងក្រុមហ៊ុនឯកជននានា។ មែនទែនទៅ គណៈកម្មាធិការពិសេសមួយរបស់សភា Congrès ជាអ្នករ៉ាប់រងការចំណាយមួយផែ្នកតូច។ តួយ៉ាងដូចជាធានាការចំណាយលើការតំឡើងវេទិកាកិត្តិយស ការតុបតែងលំអ និងការរៀបចំពិធីស្បថ។
ការចំណាយនេះ គឺស្ថិតក្នុងរង្វង់ទឹកប្រាក់ចំនួន៦ លានដុល្លារ។ ប៉ុន្តែ ការចំណាយធំជាងគេបង្អស់ គឺផែ្នកសន្តិសុខ។ កងទាហាន និងនគរបាលចំនួន ២ ៨០០ នាក់ត្រូវបានដាក់ពង្រាយនៅក្នុងរដ្ឋធានីវ៉ាស៊ីងតោន។ មួយផែ្នកនៃទីក្រុងនេះត្រូវបានបិទពុំអោយមានចរាចរណ៍។ គ្រាន់តែសាលាក្រុងវ៉ាស៊ីងតោនតែម្នាក់ឯងបានចំណាយប្រាក់បដិភាគចំនួន ៣០ លានដុល្លារ។ សំរាប់ផែ្នកសន្តិសុខនេះ ការចំណាយសរុប គឺរហូតទៅដល់ ១០០ លានដុល្លារ។
គណៈកម្មាធិការរៀបចំពិធីនេះក៏បានទទួលប្រាក់ចំនួន ៩០ លានដុល្លារផងដែរពីសប្បុរសជន និងក្រុមហ៊ុនឯកជននានា។ នេះជាលើកទីមួយហើយដែលចំនួនទឹកប្រាក់ឯកជនកើនឡើងសន្ធឹកសន្ធាប់បែបនេះ។ ពោល គឺខ្ពស់ជាងស្ទើរតែទ្វេដង បើប្រៀបធៀបនឹងចំនួនទឹកប្រាក់រៃអង្គាសពីឯកជនដែលលោក បារ៉ាក់ អូបាម៉ា បានទទួលសំរាប់ចំណាយលើកម្មវិធីស្បថចូលកាន់មុខតំណែង។ រហូតមកដល់ពេលនេះ គេនៅមិនទាន់ដឹងនៅឡើយទេ ចំពោះចំនួន និងអត្តសញ្ញាណសប្បុរសជនដែលបានបរិច្ចាកថវិការដ៏ច្រើនសន្ធឹកសន្ធាប់បែបនេះ។ គណៈកម្មាធិការរៀបចំពិធីមានពេល ៩០ ថ្ងៃក្រោយកម្មវិធីស្បថនេះ ដើម្បីប្រកាសរបាយការណ៍ចំណូលចំណាយ។
ជាពិសេស គណៈកម្មាធិការនេះមានកាតព្វកិច្ចចាំបាច់ត្រូវបញ្ចេញឈ្មោះសប្បុរសជន និងក្រុមហ៊ុនឯកជន នានាដែលបានបរិច្ចាកប្រាក់។ ប៉ុន្តែជាបណ្តោះអាសន្ន គេបានដឹងឈ្មោះក្រុមហ៊ុនឯកជនខ្លះៗហើយ ក្នុងនោះមានដូចជា៖ ក្រុមហ៊ុនផលិតយន្តហោះ Boeing, ក្រុមហ៊ុនបណ្តាញទូរស័ព្ទ AT&T, ក្រុមហ៊ុនប្រៃសណីយ៍ UPS, ធនាគារ JPMorganChase, ធនាគារ Bank of America និងក្រុមហ៊ុនជំនាញផែ្នកគណនី-ហិរញ្ញវត្ថុ Deloitte។ តាមពិតទៅ គ្មានច្បាប់ពិសេសណាមួយឡើយ ក្នុងការគ្រប់គ្រង ឬឃ្លាំមើលការរៃអង្គាសប្រាក់សំរាប់ពិធីស្បថចូលកាន់តំណែងប្រធានាធិបតីនេះឡើយ។ ប៉ុន្តែ ខុទ្ទកាល័យលោក ដូណាល់ ត្រាំ បានហាមឃាត់ដាច់ខាតមិនអនុញ្ញាតអោយពួកអ្នកធ្វើ lobby ឬនិយាយបែបសាមញ្ញជាភាសាខ្មែរថាក្រុមអ្នករត់ការ ចូលរួមបរិច្ចាកប្រាក់។
ក្រុមហ៊ុនឯកជននានាមានសិទ្ធិបរិច្ចាកប្រាក់រហូតដល់ ១ លានដុល្លារ។ ចំណែកសប្បុរសជនជាបុគ្គលវិញមានសិទ្ធិអាចបរិច្ចាកប្រាក់គ្មានកំណត់។ បើតាមសារព័ត៌មាន The New York Times សប្បុរសឯកជនភាគច្រើនសុទ្ធសឹងតែជាភ្ញៀវពិសេស ឬគេហៅថាភ្ញៀវ VIP ដែលមានវត្តមាននៅលើវេទិកាកិត្តិយស។ លើសពីនេះ ភ្ញៀវទាំងនេះនឹងត្រូវចូលរួមក្នុងវិធីពិសេសៗមួយចំនួនទៀតពេញមួយសប្តាហ៍តែម្តង ដើម្បីជួបពិភាក្សា ឬបង្កើតបណ្តាញទំនាក់ទំនងជាមួយសមាជិកខុទ្ទកាល័យថ្មី។ ប៉ុន្តែ គេរៀបចំជំនួបនេះជាលក្ខណៈឯកជនអោយឆ្ងាយពីភែ្នកសាធារណៈជនទូទៅ។
ប្រសិនបើមានលុយនៅសេសសល់ក្រោយការចំណាយសព្វគ្រប់ គណៈកម្មាធិការនិមួយៗមានសិទ្ធិចាត់ចែងលុយសល់ទាំងនោះ។ សំរាប់ក្រុមការងារលោកប្រធានាធិបតីថ្មី ដូណាល់ ត្រាំ លុយនៅសេសសល់នឹងត្រូវយកទៅបរិច្ចាកអោយសមាគម ឬអង្គការសប្បុរសធម៌។ ប៉ុន្តែ គេនៅមិនទាន់ដឹងថាអង្គការណាខ្លះនឹងទទួលបានលុយដែលនៅសេសសល់នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ