Goodbye Philae ! អ្នកវិទ្យាសាស្ត្រផ្តាច់រលកសញ្ញារវាង Philae និងយានRosetta
លាហើយ Philae ! នេះគឺជាអ្វីដែលអ្នកវិទ្យាសាស្ត្រអឺរ៉ុបបានសរសេរ នៅលើទំព័រTweeter របស់បេសកកម្មអវកាស Philae កាលពីយប់ថ្ងៃអង្គារទី២៦ កក្កដា។ អ្នកវិទ្យាសាស្ត្រ នៃបេសកកម្មនេះ បានសម្រេចកាត់ផ្តាច់ចរន្ត រលកសញ្ញាទំនាក់ទំនងរវាងយានRosetta និងរ៉ូបូPhilae ដើម្បីរក្សាថាមពលដែលមានសេសសល់របស់យានRosetta ទុកដើម្បីធ្វើបេសកកម្មចុងក្រោយរបស់ខ្លួន ឲ្យដល់ដំណាច់ខែកញ្ញា។ ចាប់ពីពេលនេះទៅ គឺគេគ្មានសង្ឃឹមថាបានទទួលដំណឹងពី រ៉ូបូ Philae ដែលសំចតខ្លួននៅលើបំណែកផ្កាយ Tchouri ទៀតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
លោក Andreas Schuetz អ្នកនាំពាក្យក្រុមការងារអវកាសអាល្លឺម៉ង់ ដែលមានចំណែកក្នុងបេសកកម្មPhilae បានបញ្ជាក់ប្រាប់អ្នកយកព័ត៌មានបារាំង កាលពីថ្ងៃទី២៧កក្កដាថា ក្រុមការងារនៃបេសកកម្ម បានសម្រេចកាត់ផ្តាច់ប្រព័ន្ធរលកសញ្ញា រវាងយានRosetta ជាមួយនឹងរ៉ូបូ Philae ចាប់ពីថ្ងៃពុធទី២៧ កក្កដាទៅ។ ផ្តាច់រលកសញ្ញាជាមួយ Philae មានន័យថា ចាប់ពីពេលនេះទៅ គេនឹងលែងបានទទួលដំណឹងអ្វីទាំងអស់ពីរ៉ូបូនេះ។
ចំណែកលោក Philippe Gaudon ប្រធានគម្រោងអវកាសនៃក្រុមការងារបារាំង បានបញ្ជាក់ថា ក្រុមការងារនៃបេសកកម្មPhilae បានសម្រេចបិទអង់តែនរបស់យានRosetta ដែលមានទួនាទីចាំចាប់រលកសញ្ញា ពីរ៉ូបូPhilae ហើយនេះគឺជាសេចក្តីសម្រេចដោយមានការយល់ស្របពីលោក Patrick Martin ដែលជាប្រធានបេសកកម្មPhilaeផងដែរ។
មូលហេតុនៃការផ្តាច់រលកសញ្ញានេះ ត្រូវបានក្រុមការងារអវកាសអឺរ៉ុប ប្រាប់ថាដោយសារតែយាន Rosetta កំពុងតែបាត់បង់ថាមពលបន្តិចម្តងៗ ដោយសារតែយាននេះបានហោះទៅ កាន់តែឆ្ងាយពីពន្លឺព្រះអាទិត្យ ដែលធ្វើឲ្យវាមិនអាចស្រូបយកពន្លឺព្រះអាទិត្យ ដើម្បីបំលែងជាថាមពលបានគ្រប់គ្រាន់។ បច្ចុប្បន្នយាន Rosetta នេះស្ថិតនៅចំងាយប្រមាណជា៥២០ លានគីឡូម៉ែត្រពីព្រះអាទិត្យ ហើយកំពុងតែវិលនៅជុំវិញបំណែកផ្កាយឈ្មោះ Tchouri។
ក្រុមការងារបានសម្រេចធ្វើដូចនេះ ដើម្បីរក្សាថាមពលដែលនៅសេសសល់សម្រាប់ឲ្យយាន Rosetta ចុះចតជាចុងក្រោយនៅលើបំណែកផ្កាយTchouri នៅថ្ងៃទី៣០ កញ្ញា។ មុននឹងបញ្ចប់បេសកកម្ម និងលាជារៀងរហូត យាន Rosetta នឹងថតរូបពីភិនភាគ និងធ្វើការគុណគូរ វាស់វែង បែបវិទ្យាសាស្ត្រ ស្តីពីបំណែកផ្កាយTchouri។ ចំណែករ៉ូបូ Philae បានបាត់ដំណឹង លែងផ្តល់រលកសញ្ញាតាំងតែពីថ្ងៃទី៩កក្កដា។
សូមបញ្ជាក់ថា បេកកម្មនៃរ៉ូបូPhilae ដែលបញ្ជូនទៅដោយយានRosetta គឺធ្វើឡើងដើម្បីស្រាវជ្រាវពីការកកើតដំបូងនៃចក្រវាឡ តាមរយៈការស្រាវជ្រាវទៅលើបំណែកផ្កាយTchouri ព្រោះបំណែកផ្កាយប្រភេទនេះ គឺបង្កប់ដោយធាតុផ្សំដំបូងគេបង្អស់នៃចក្រវាឡ មុននឹងមានបំណែកផ្ទុះជាភពផ្សេងៗ។ យានRosettaបានធ្វើដំណើររយៈពេល១០ឆ្នាំដើម្បីនាំរ៉ូបូPhilae ទៅជួបនឹងបំណែកផ្កាយTchouri។ បេកកម្មរបស់យានRosetta និង រ៉ូបូ Philae គឺជាជោគជ័យដ៏ធំរបស់អ្នកវិទ្យាសាស្ត្រអឺរ៉ុប ក៏ដូចជាសម្រាប់មនុស្សជាតិទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ