ឈ្វេងយល់អំពីការប្រែប្រួលអាកាសធាតុឬការឡើងកម្តៅនៃភពផែនដី
ចុះផ្សាយនៅថ្ងៃ៖
ស្តាប់ - ០៣:៥២
ការប្រែប្រួលអាកាសធាតុ និងការឡើងកម្តៅនៃភពផែនដី គឺជាប្រធានបទ ដែលតែងតែត្រូវបានគេលើកយកមកនិយាយជាប់ជាប្រចាំនៅក្នុងពេលបច្ចុប្បន្ននេះ។ ប្រធានបទនេះទទួលនូវការចាប់អារម្មណ៍កាន់តែខ្លាំងនៅក្នុងឆ្នាំ២០១៥នេះ ឆ្នាំដែលអ.ស.បបានកំណត់ថាត្រូវតែចរចាឲ្យចេញជាកិច្ចព្រមព្រៀងអាកាសធាតុអន្តរជាតិមួយ ដើម្បីជំនួសពិធីសារក្រុងក្យូតូ ដែលត្រូវផុតសុពលភាព។
ការប្រែប្រួលអាកាសធាតុ គឺសម្តៅទៅលើការប្រែប្រួលខ្លាំង និងជាលក្ខណៈយូរអង្វែង នៃសីតុណ្ហភាពមធ្យមនៃភពផែនដី។ វាអាចជាការធ្លាក់ចុះ ឬក៏ជាការកើនឡើង នៃសីតុណ្ហភាពមធ្យម ដែលគេវាស់ស្ទង់ក្នុងរយៈពេលច្រើនឆ្នាំជាប់ៗគ្នា។ នៅក្នុងពេលបច្ចុប្បន្ននេះ អ្នកវិទ្យាសាស្រ្តបានធ្វើការសង្កេតឃើញថា សីតុណ្ហភាពគិតជាមធ្យមនៅលើភពផែនដីទាំងមូលកំពុងតែមានការកើនឡើង។ ហេតុដូច្នេះហើយបានជាគេតែងតែនិយាយអំពីការឡើងកម្តៅនៃភពផែនដី។
យោងតាមអ្នកជំនាញខាងអាកាសធាតុ ការប្រែប្រួលអាកាសធាតុនៃភពផែនដីយើងនេះអាចកើតឡើងពីមូលហេតុច្រើនយ៉ាង។
មូលហេតុទីមួយ វាអាចបណ្តាលមកពីការប្រែប្រួលនៃគន្លងផែនដីជុំវិញព្រះអាទិត្យ ពោលគឺ សីតុណ្ហភាពនៅលើភពផែនដីត្រូវកើនឡើង នៅពេលដែលគន្លងផែនដីខិតចូលទៅជិតព្រះអាទិត្យ ហើយសីតុណ្ហភាពត្រូវធ្លាក់ចុះ នៅពេលដែលគន្លងផែនដីឃ្លាតឆ្ងាយពីព្រះអាទិត្យ។ មូលហេតុមួយទៀត វាអាចបណ្តាលមកពីយន្តការមួយ ដែលគេហៅតាមភាសាបារាំងថា “Gas à effet de serre” ឬភាសាអង់គ្លេសថា “Greenhouse effect” ហើយដែលអាចបកប្រែជាខ្មែរថា “ឧស្ម័នផ្ទះកញ្ចក់” (ឬ ឧស្ម័នដែលមានឥទ្ធិពលដូចផ្ទះកញ្ចក់)។
តាមការសិក្សារបស់អ្នកវិទ្យាសាស្រ្ត គេរកឃើញថា នៅក្នុងប្រវត្តិនៃភពផែនដី ដែលមានអាយុកាលជាង ៤ពាន់ ៥រយលានឆ្នាំមកហើយនេះ សីតុណ្ហភាពមធ្យមនៃភពផែនដីតែងតែមានការប្រែប្រួល ដោយមានពេលខ្លះសីតុណ្ហភាពធ្លាក់ចុះ ហើយពេលខ្លះទៀតសីតុណ្ហភាពកើនឡើង ដែលជាការវិវឌ្ឍធម្មតាទៅតាមលក្ខណៈធម្មជាតិ។
សំណួរសួរថា បើសិនជាការប្រែប្រួលអាកាសធាតុ គឺជាការវិវឌ្ឍធម្មតាទៅតាមលក្ខណៈធម្មជាតិ តើហេតុអ្វីបានជាពិភពលោកទាំងមូលនាំគ្នាព្រួយបារម្ភខ្លាំងម៉្លេះ នៅក្នុងពេលបច្ចុប្បន្ននេះ?
តាមការពិត អ្វីដែលធ្វើឲ្យគេព្រួយបារម្ភ គឺនៅត្រង់ថា ការឡើងកម្តៅនៃភពផែនដី នៅក្នុងពេលបច្ចុប្បន្ននេះ មិនមែនជាការវិវឌ្ឍធម្មតាដូចជាពេលមុនៗនោះទេ។ តាមការសិក្សារបស់អ្នកវិទ្យាសាស្រ្ត គេសង្កេតឃើញថា សីតុណ្ហភាពមធ្យមនៅលើភពផែនដី នៅក្នុងពេលបច្ចុប្បន្ននេះ កំពុងតែមានការកើនឡើងខ្លាំង និងលឿន ជាងអ្វី ដែលគេធ្លាប់សង្កេតឃើញតាមលក្ខណៈធម្មជាតិ កាលពីពេលមុនៗ។ នៅក្នុងរយៈពេល១០០ឆ្នាំកន្លងទៅនេះ សីតុណ្ហភាពមធ្យមនៃភពផែនដី មានការកើនឡើងរហូតដល់ទៅជិត១អង្សា ក្នុងនោះ មាន ០,៦អង្សា គឺកើនឡើង នៅក្នុងអំឡុងរយៈពេលប្រមាណជា ៣០ឆ្នាំចុងក្រោយនេះ ពោលគឺ នៅក្នុងអំឡុងពេលដែលសកម្មភាពឧស្សាហកម្មរបស់មនុស្សជាតិកំពុងតែមានការកើនឡើងខ្លាំង។
តាមរយៈការសិក្សាលម្អិត ក្រុមអ្នកវិទ្យាសាស្រ្តរបស់អ.ស.ប បានរកឃើញភស្តុតាង ដែលអាចឲ្យគេធ្វើការសន្និដ្ឋានបានថា មូលហេតុ ដែលនាំឲ្យភពផែនដីឡើងកម្តៅលឿនខុសពីធម្មតា នៅក្នុងពេលបច្ចុប្បន្ននេះ គឺដោយសារតែសកម្មភាពរបស់មនុស្ស ពោលគឺ សីតុណ្ហភាពនៃភពផែនដីមានការកើនឡើង ទៅតាមលក្ខណៈធម្មជាតិផង ក៏ប៉ុន្តែ សកម្មភាពរបស់មនុស្សកំពុងតែមកបន្ថែម ធ្វើឲ្យសីតុណ្ហភាពកើនឡើងកាន់តែខ្លាំងថែមទៀត។
លើសពីនេះទៅទៀត ក្រុមអ្នកជំនាញក៏បានធ្វើការព្យាករផងដែរថា ប្រសិនបើគ្មានវិធានការទប់ស្កាត់ជាបន្ទាន់នៅពេលនេះទេ ទៅថ្ងៃខាងមុខ សីតុណ្ហភាពនៃភពផែនដីនឹងនៅតែបន្តកើនឡើង ហើយកើនឡើងកាន់តែខ្លាំង និងកាន់តែលឿនជាងពេលមុនៗទៅទៀត។
នៅក្នុងរបាយការណ៍ចេញផ្សាយ កាលពីឆ្នាំ២០០៧ ក្រុមអ្នកជំនាញអាកាសធាតុរបស់អ.ស.បបានព្យាករថា នៅចុងសតវត្សរ៍ទី២១នេះ សីតុណ្ហភាពមធ្យមនៃភពផែនដីនឹងត្រូវកើនឡើង ក្នុងចន្លោះពី ២ ទៅ ៦អង្សា។ ការឡើងកម្តៅនៃភពផែនដីនឹងបង្កនូវផលវិបាកយ៉ាងធ្ងន់ធ្ងរដល់មនុស្សជាតិ ជាពិសេស គឺការកើនឡើងនៃកម្ពស់ទឹកសមុទ្រ និងការប្រែប្រួលអាកាសធាតុខុសប្រក្រតី ដែលបង្កជាគ្រោះធម្មជាតិធ្ងន់ធ្ងរ ដូចជា គ្រោះរាំងស្ងួត ទឹកជំនន់ និងព្យុះសង្ឃរា ជាដើម។
ដោយហេតុនេះហើយបានជាអ.ស.បកំពុងតែជំរុញឲ្យមានការចុះកិច្ចព្រមព្រៀងស្តីពីអាកាសធាតុ ដែលដាក់កាតព្វកិច្ចឲ្យមានការកាត់បន្ថយការបញ្ចេញឧស្ម័នផ្ទះកញ្ចក់ ដើម្បីធ្វើយ៉ាងណាទប់ស្កាត់កុំឲ្យភពផែនដីឡើងកម្តៅលើសពី ២អង្សា នៅចុងសតវត្សរ៍ទី២១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ