ឈូងសមុទ្រហ្គីណេ៖កំណើនសកម្មភាពចោរសមុទ្របានកើនឡើងគួរឲ្យព្រួយបារម្ភ
ចុះផ្សាយនៅថ្ងៃ៖
ស្តាប់ - ០៥:០៧
កាលពីថ្ងៃពុធ ទី២៨ សីហា សហភាពអឺរ៉ុបបានប្រកាសឲ្យដឹងពីបំណងរបស់ខ្លួនក្នុងការពង្រឹងយុទ្ធសាស្រ្តដើម្បីប្រឆំាងនឹងកំណើនសកម្មភាពចោរសមុទ្រនៅឈូងសមុទ្រហ្គីណេ។ ឈូងសមុទ្រហ្គីណេ គឺជាឈូងសមុទ្រមួយក្នុងពិភពលោកដែលការវាយប្រហារដោយចោរសមុទ្របាននិងកំពុងមានកំណើនគួរឲ្យព្រួយបារម្ភ។ តាមរបាយការណ៍ចុងក្រោយរបស់ការិយាល័យសមុទ្រអន្តរជាតិឲ្យដឹងថា ចំនួននៃការវាយប្រហារដោយចោរសមុទ្រនៅឈូងសមុទ្រហ្គីណេបានកើតមានញឹកញាប់ និងមានការកើនឡើងជាងនៅកណ្តាលសមុទ្រនៃប្រទេសសូម៉ាលីទៅទៀត។
រហូតមកដល់ពេលនេះ ការវាយប្រហារដោយចោរសមុទ្រនៅកណ្តាលសមុទ្រក្នុងប្រទេសសូម៉ាលីហាក់ដូចជាត្រូវបានគេនិយាយច្រើន និងដឹងឮច្រើន។ រីឯសកម្មភាពរបស់ក្រុមចោរសមុទ្រនៅឈូងសមុទ្រហ្គីណេមិនត្រូវបានគេចាប់អារម្មណ៍ និងផ្សព្វផ្សាយប៉ុន្មានទេ។ នេះពិតជារឿងមួយច្រឡំធ្ងន់ណាស់ ច្រឡំធ្ងន់ព្រោះថាបើយោងតាមរបាយការណ៍របស់ការិយាល័យសមុទ្រអន្តរជាតិចុះផ្សាយកាលពីថ្ងៃទី១៨ មិថុនា ឆ្នំា ២០១៣ ឲ្យដឹងថា សកម្មភាពចោរសមុទ្រនៅឈូងសមុទ្រហ្គីណេបាននិងកំពុងបន្តកើនឡើងគួរឲ្យព្រួយបារម្ភ។ គិតតំាងពីដើមឆ្នំា ២០១៣ នេះមក ការវាយប្រហារលើនាវាដឹកទំនិញ ឬមួយក៏លើស្ថានីយបូកប្រេងពីក្រុមចោរសមុទ្រនៅឈូងសមុទ្រហ្គីណេបានកើតមានចំនួន ៣១លើក។
របាយការណ៍របស់ការិយាល័យសមុទ្រអន្តរជាតិដដែលបានបញ្ជាក់ថា ក្នុងឆ្នំា ២០១២ កន្លងទៅ ការវាយប្រហារលើនាវាដឹកទំនិញក្នុងឈូងសមុទ្រហ្គីណេមានចំនួនច្រើនជាងនៅកណ្តាលសមុទ្រសូម៉ាលីទៅទៀត។ ក្នុងឆ្នំា ២០១០ សកម្មភាពវាយប្រហារនៅឈូងសមុទ្រហ្គីណេមានចំនួន ៣៩លើក តែនៅក្នុងឆ្នំា ២០១២ មានដល់ទៅ ៦២លើក។ ព័ទ្ធជុំវិញដោយប្រទេសអាហ្រ្វិកចំនួន ៣ គឺនីហ្សេរីយ៉ា បេណំាង និងប្រទេសតូហ្គោ ឈូងសមុទ្រហ្គីណេត្រូវបានក្រុមហ៊ុនធានារ៉ាប់រងចាត់ទុកជាតំបន់ដែលមានកម្រិតហានិភ័យខ្ពស់ខ្លំាង។ ហានិភ័យខ្ពស់ខ្លំាងដែលក្រុមហ៊ុនធានារ៉ាប់រងត្រូវតែតម្លើងថ្លៃសេវ៉ារបស់ខ្លួនដោយចៀសមិនរួច។
គោលបំណងរបស់ក្រុមចោរសមុទ្រនៅឈូងសមុទ្រហ្កីនេ គឺខុសគ្នានឹងគោលបំណងរបស់ក្រុមចោរសមុទ្រនៅឈូងសមុទ្រអាដេន ឬមួយក៏នៅកន្លែងផ្សេងទៀត ដូចយ៉ាងនៅសមុទ្រក្នុងប្រទេសសូម៉ាលីជាដើម។ នៅឈូងសមុទ្រអាដេន ឬមួយក៏នៅសមុទ្រសូម៉ាលី ក្រុមចោរសមុទ្របានបើកការវាយប្រហារលើនាវាដឹកទំនិញ ដោយចាប់មនុស្សធ្វើជាចំណាប់ខ្មំាងដើម្បីជម្រិតទារលុយ។ ក្រុមចោរទំាងនោះមិនបានចាប់អារម្មណ៍លើទំនិញដែលដឹកនៅក្នុងកប៉ាល់នោះទេ។ តែនៅក្នុងឈូងសមុទ្រហ្គីណេឯណោះវិញ ក្រុមចោរសមុទ្រមិនបានគិតពីការចាប់មនុស្សធ្វើជាចំណាប់ខ្មំាងទេ តែបានវាយប្រហារដើម្បីយកទំនិញដែលដឹកនៅក្នុងកប៉ាល់នោះ។
ជាទូទៅ ក្រុមចោរសមុទ្រនៅឈូងសមុទ្រហ្គីណេច្រើនវាយប្រហារលើស្ថានីយ៍បូមប្រេង ឬកប៉ាល់ដឹកប្រេងដែលចម្រាញ់រួច រួមមានប្រេងសំាង ប្រេងកាត ឬមួយក៏ប្រេងម៉ាស៊ូតដើម្បីយកទៅលក់នៅក្នុងទីផ្សារងងឹត។ ក្នុងនាមជាប្រទេសផលិតប្រេងទីមួយនៅទ្វីបអាហ្រ្វិកប្រមាណជា ២លានបារីលក្នុងមួយថ្ងៃៗ នីហ្សេរីយ៉ាគឺជាប្រទេសដែលបានទទួលរងការវាយប្រហារដោយចោរសមុទ្រខ្លំាងជាងគេនៅក្នុងតំបន់។ តំបន់ដែលមានវត្តមានក្រុមហ៊ុនប្រេងធំកំពុងធ្វើអាជីវកម្មនៅទីនោះ ដូចយ៉ាងក្រុមហ៊ុនអង់គ្លេស-ហូឡង់ Shell ឬមួយក្រុមហ៊ុនអាមេរិកំាង ExxonMobil ជាដើម។ តាមការសង្កេតជារួម សកម្មភាពរបស់ក្រុមចោរសមុទ្រនៅឈូងសមុទ្រហ្គីណេមានលក្ខណៈលឿនរហ័ស និងពោរពេញដោយអំពើហិង្សាជាមួយក្រុមបុគ្គលិកនៅក្នុងកប៉ាល់ដែលពួកគេវាយប្រហារ។
ម្យ៉ាងទៀត និងខុសពីនៅតំបន់ផ្សេង ដូចយ៉ាងនៅសមុទ្រនៃប្រទេសសូម៉ាលី ឈូងសមុទ្រហ្គីណេមិនដែលមានវត្តមានល្បាតពីទាហានអន្តរជាតិទេ។ អ៊ីចឹងហើយបានជាកប៉ាល់ដឹកទំនិញនៅទីនោះងាយប្រឈមមុខនឹងការវាយប្រហារពីក្រុមចោរសមុទ្រណាស់។ ទន្ទឹមគ្នានេះ កប៉ាល់ដឹកទំនិញទំាងនោះមិនត្រូវបានគេអនុញ្ញាតឲ្យមានវត្តមានកម្លំាងសន្តិសុខឯកជននៅចម្ងាយតិចជាង ២០គីឡូម៉ែត្រពីឆ្នេរទេ។ រីឯក្រុមចោរសមុទ្រវិញ ហាក់ដូចជាបានធ្វើសកម្មភាពរបស់ខ្លួនកាន់តែឆ្ងាយពីឆ្នេរ រហូតដល់ទៅ ២០០គីឡូម៉ែត្រផងក៏មាន។
គឺកំណើនអសន្តិសុខបង្កឡើងដោយក្រុមចោរសមុទ្រនៅឈូងសមុទ្រហ្គីណេនេះហើយដែលបាននិងកំពុងធ្វើឲ្យប្រទេសក្នុងតំបន់មានក្តីបារម្ភជាពន់ពេក។ ព្រួយបារម្ភក៏ដោយសារថា សេដ្ឋកិច្ចរបស់ប្រទេសនៅក្នុងតំបន់បានពឹងផ្អែកសឹងតែទំាងស្រុងលើអាជីវកម្មអណ្តូងប្រេងកាត ក៏ដូចជាសកម្មភាពនៅកំពង់ផែរបស់ខ្លួន ដូចករណីប្រទេសបេណំាងដែលចំណូលសេដ្ឋកិច្ចចន្លោះពី ៧០ ទៅ ៩០% បានមកពីសកម្មភាពកំពង់ផែរបស់ខ្លួន។
បច្ចុប្បន្ន បណ្តាប្រទេសក្នុងឈូងសមុទ្រហ្គីណេមិនបានទទួលការជួយគំាទ្រសន្តិសុខពីខាងក្រៅទេ។ ជាទូទៅ មានប្រទេសមួយចំនួនបានសហការណ៍ជាមួយប្រទេសមហាអំណាចមួយចំនួនដូចយ៉ាងអាមេរិក ឬបារំាង តែត្រឹមក្របខ័ណ្ឌបណ្តុះបណ្តាលប៉ុណ្ណោះ ពោលគឺមិនមានកិច្ចសហប្រតិបត្តិការជាកម្លំាងទេ។ អ៊ីចឹងហើយបានជានៅក្នុងជំនួបកំពូលស្តីពីការប្រយុទ្ធប្រឆំាងនឹងចោរសមុទ្រនៅក្នុងឈូងសមុទ្រហ្គីណេរៀបចំនៅក្នុងទីក្រុងយុនដេ ប្រទេសកាមេរូនកាលពីថ្ងៃទី២៤ មិថុនាកន្លងមក បណ្តាប្រមុខរដ្ឋអាហ្រ្វិកទំាង ១១រូបបានអំពាវនាវឲ្យមានការដាក់ពង្រាយកម្លំាងជើងទឹកអន្តរជាតិនៅក្នុងឈូងសមុទ្រហ្គីណេ ដូចនៅក្នុងឈូងសមុទ្រអាដេនដែរ។
តែរហូតមកដល់ពេលនេះ និងក្រៅពីការឈឺឆ្អាលរបស់សហភាពអឺរ៉ុបដែលកំពុងស្វែងរកយុទ្ធសាស្រ្តមួយប្រកបដោយប្រសិទ្ធិភាពខ្ពស់ក្នុងការប្រយុទ្ធប្រឆំាងនឹងចោរសមុទ្រនៅអាហ្រ្វិកខាងលិចនោះ តំបន់ឈូងសមុទ្រហ្គីណេបាននិងកំពុងបន្តសោយរាជ្យដោយក្រុមចោរសមុទ្រ និងដែលប្រទេសពាក់ព័ន្ធកំពុងចាត់វិធានការទប់ទល់ទៅតាមលទ្ធភាពដែលខ្លួនមាន។ ជាក់ស្តែង ប្រទេសនីហ្សេរីយ៉ាបានទិញនាវាល្បាតពីប្រទេសចិន។ ប្រទេសបេណំាង និងហ្គីណេបានបំពាក់នូវនាវាខា្នតតូចដើម្បីចេញអន្តរាគមន៍។ ការធ្វើយ៉ាងដូចនេះ ដោយប្រទេសទំាងនោះយល់ឃើញថា គ្មានអ្វីប្រសើរជាងខ្លួនឯង ប្រឹងប្រែងជួយខ្លួនឯងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ