យុទ្ធនាការបុរសល្អ បំផុសកងកម្លាំងប្រដាប់អាវុធឲ្យប្តេជ្ញាចិត្តទប់ស្កាត់ហិង្សាលើស្ត្រី និងកុមារ
កងកម្លាំងប្រដាប់អាវុធ មន្ត្រីនានា និងសិស្សានុសិស្ស ប្រមាណជាង ៤០០នាក់ នៅព្រឹកថ្ងៃសុក្រ ទី១០កក្កដានេះ បាននាំគ្នាដង្ហែរក្បួនយុទ្ធនាការ «បុរសល្អ» ចុងក្រោយ នៅក្នុងក្រុងតាខ្មៅ ខេត្តកណ្តាល។ ជាយុទ្ធនាការ សម្រាប់ឆ្នាំ ២០១៤-២០១៥ ដែលសំដៅបំផុសកងកម្លាំងប្រដាប់អាវុធ ឲ្យប្តេជ្ញាចិត្ត ក្នុងការចូលរួមទប់ស្កាត់អំពើហិង្សាលើស្ត្រី និងកុមារ ព្រោះថាសមត្ថកិច្ចរបស់កម្លាំងប្រដាប់អាវុធ មានឥទ្ធិពលក្នុងសង្គម។
ចុះផ្សាយនៅថ្ងៃ៖ កែប្រែថ្ងៃទី៖
យុទ្ធនាការ «បុរសល្អ» ដែលផ្តោតសំខាន់លើការចូលរួមរបស់កងកម្លាំប្រដាប់អាវុធ សម្រាប់ឆ្នាំ ២០១៥ បានបញ្ចប់ហើយ នៅព្រឹកថ្ងៃទី ១០កក្កដានេះ ក្នុងទីក្រុងតាខ្មៅ ខេត្តកណ្តាល។ ជាយុទ្ធនាការ ក្រោមការដឹកនាំពីក្រសួងកិច្ចការនារី និងសម្រួលសម្រួលពីអង្គការសន្តិភាព និងអភិវឌ្ឍន៍ ហៅកាត់ថា PYD។
អ្នកស្រី គឹម ធីតាកល្យាណី ប្រធានផ្នែកទំនាក់ទំនងនៃអង្គការ PYD បានប្រាប់វិទ្យុបារាំងអន្តរជាតិថា ការចូលរួមរបស់កងកម្លាំងប្រដាប់អាវុធ នៅក្នុងយុទ្ធនាការ «បុរសល្អ» នេះ គឺមានសារៈសំខាន់ខ្លាំងណាស់។ សារៈសំខាន់ ព្រោះថាកងកម្លាំងប្រដាប់អាវុធ ជាក្រុមមួយដែលមានឥទ្ធិពលក្នុងសង្គម ជាក្រុមមួយ ដែលអាចបញ្ឃប់អំពើហិង្សា និងបញ្ច្រាបស្មារតី គោរពយេនឌ័រ រវាងស្ត្រី និងបុរស។
ទោះបីជាយ៉ាងណា អ្នកស្រី គឹម ធីតាកល្យាណី បានបញ្ជាក់ថា ទោះជាមានយុទ្ធនាការបំផុសស្មារតីបុរសគោរពសិទ្ធិស្រ្តី និងកុមារ តាំងពីឆ្នាំ ២០១១ក៏ដោយ ប៉ុន្តែអំពើហិង្សាលើស្ត្រី ហាក់មិនបានថមថយច្រើននោះទេ ក្នុងរយៈពេលប៉ុន្មានឆ្នាំចុងក្រោយនេះ។ មិនថមថយ ដោយសារបុរសមួយចំនួន នៅតែមិនព្រមផ្តល់តំលៃដល់ស្ត្រី។ ដូច្នេះហើយ ទើបអ្នកស្រី គឹម ធីតាកល្យាណី បន្តថា ការផ្តល់តំលៃឲ្យស្ត្រី គឺជាកត្តាប្រកាសអាសន្ន ដែលគ្រប់សាលារៀន គួរតែបង្រៀនសិស្សប្រុស តាំងពីវ័យក្មេង ឲ្យស្គាល់ពីយេនឌ័រ រវាងស្ត្រី និងបុរស។ លើសពីនេះ បុរសខ្លួនឯង ក៏គួរធ្វើជាបុរសល្អ ចូលរួមគោរពសិទ្ធិស្ត្រីផងដែរ។
គួរជម្រាបជូនថា យុទ្ធនាការ «បុរសល្អ» ដែលរៀបចំដោយកងកម្លាំងប្រដាប់អាវុធ ត្រូវបានរៀបចំឡើង ក្នុងខេត្តចំនួន ៦ និងក្រុងតាខ្មៅ តាំងពីឆ្នាំ ២០១៤។ គោលដៅសំខាន់របស់យុទ្ធនាការនេះ គឺដើម្បីផ្សព្វផ្សាយជាសាធារណៈពីយេនឌ័រ លើកកម្ពស់ការចូលរួមរបស់បុរស ក្នុងការទប់ស្កាត់ហិង្សាលើស្ត្រី និងក្មេងស្រី។ លើកកម្ពស់តួនាទីវិជ្ជមាន និងពង្រឹងការប្តេជ្ញាចិត្ត ក្នុងជួរកងកម្លាំងប្រដាប់អាវុធ។ និងលើកកម្ពស់គ្រួសារគំរូ ដោយបុរស និងស្ត្រី ធ្វើការរួមគ្នា ក្នុងការពង្រឹងកំណើនសេដ្ឋកិច្ចសង្គម របស់ប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ