អគ្គីសនីកម្ពុជា EDC បដិសេធថាមិនបានកែច្នៃនាឡិកាស្ទង់
អគ្គីសនីកម្ពុជា EDC បដិសេធថាមិនបានកែច្នៃនាឡិកាស្ទង់ ដូចការចោទប្រកាន់ពីសំណាក់មជ្ឈដ្ឋានមួយចំនួនទេ។ ការបង្កើនថាមពលអគ្គីសនី ក៏ត្រូវបានស្ថាប័នផ្គត់ផ្គង់អគ្គីសនីតែមួយគត់នៅកម្ពុជានេះ ច្រានចោលផងដែរ។ បើតាមអគ្គីសនីកម្ពុជា ការប្រើប្រាស់ថាមពលអគ្គីសនីច្រើននាពេលពីរបីខែចុងក្រោយនេះ គឺបណ្ដាលមកពីបរិយាកាសក្ដៅ។
ចុះផ្សាយនៅថ្ងៃ៖ កែប្រែថ្ងៃទី៖
ការប្រើប្រាស់ថាមពលច្រើននៅក្នុងខែក្ដៅ ធ្វើឲ្យថ្លៃអគ្គីសនីប្រចាំខែរបស់ប្រជាពលរដ្ឋកើនឡើង។ នេះបើតាមការគូសបញ្ជាក់ពីលោក កែវ រតនៈ ដែលជាអគ្គនាយកអគ្គីសនីកម្ពុជា។ លោក កែវ រតនៈ អះអាងថា ការប្រើប្រាស់ច្រើនបែបនេះ កើតមានឡើងជារៀងរាល់ឆ្នាំ មិនមែនទើបតែកើតមាននៅក្នុងឆ្នាំនេះទេ។ ប៉ុន្តែហេតុផលដែលធ្វើឲ្យមានការរអ៊ូរទាំ ភាគច្រើនគឺដោយសារតែប្រជាពលរដ្ឋយកវិក័យបត្រខែក្ដៅ ទៅប្រៀបធៀបទៅនឹងខែត្រជាក់។ លោកបានស្នើឲ្យសាធារណជនផ្ទៀងផ្ទាត់វិក័យបត្រខែក្ដៅឆ្នាំនេះ ទៅនឹងខែក្ដៅឆ្នាំមុន ទើបត្រឹមត្រូវ។
ចំពោះការចោទប្រកាន់ថា EDC កែច្នៃកុងទ័រភ្លើងនិងបង្កើនថាមពលអគ្គីសនី លោក កែវ រតនៈ បានច្រានចោលទាំងស្រុង។ បើតាមលោក កែវ រតនៈ គ្រប់កុងទ័រភ្លើងឬនាឡិកាស្ទង់ សុទ្ធតែមានប្លុមបេពីរោងចក្រផលិតពីក្រៅប្រទេសទាំងអស់ ហើយប្លុមបេនេះ មិនត្រូវបានប៉ះពាល់ដោយអគ្គីសនីជាដាច់ខាត។ លោកថា អគ្គីសនីកម្ពុជា គ្មានប្រយោជន៍អ្វីទៅកេងប្រវ័ញ្ចពីប្រជាពលរដ្ឋ ដើម្បីតែជាប់ទោសខ្លួនឯងនោះទេ។
ទាក់ទងទៅនឹងបញ្ហាកុងទ័រភ្លើង ឬនាឡិកាស្ទង់នេះដែរ ប្រសិនបើប្រជាពលរដ្ឋរកឃើញថា ប្លុមបេរបស់នាឡិកាស្ទង់បានដាច់ ឬប្រសិនបើកុងទ័រភ្លើងដើរលឿនខុសប្រក្រតី លោក កែវ រតនៈ បានសំណូមពរឲ្យប្រជាពលរដ្ឋរាយការណ៍ជាប្រញាប់ទៅភ្នាក់ងាររបស់អគ្គីសនីកម្ពុជា ដើម្បីធ្វើការផ្លាស់ប្ដូរថ្មី។
ជាការកត់សម្គាល់ ការពន្យល់បកស្រាយរបស់អគ្គិសនីកម្ពុជានេះ ធ្វើឡើងបន្ទាប់ពីប្រជាពលរដ្ឋទាំងនៅរាជធានីភ្នំពេញ និងនៅតាមបណ្តាខេត្តមួយចំនួន ត្អូញត្អែរជាបន្តបន្ទាប់ ពីរឿងនាឡិកាស្ទង់អគ្គិសនីដើរលឿនខុសប្រក្រតី ដែលជាហេតុធ្វើឲ្យតំលៃបង់ភ្លើងប្រចាំខែ កើនឡើងទ្វេដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ