អ្នកនាំពាក្យរដ្ឋាភិបាលស្នើសុំក្រសួងពីរឲ្យអន្តរាគមន៍លើអ្នកប្រើពាក្យអសុរោះតាមបណ្តាញសង្គម
តាមរយៈលិខិតពីររបស់ទីស្តីការគណៈរដ្ឋមន្ត្រី កាលពីថ្ងៃទី២១ ខែឧសភា ឆ្នាំ២០១៥ បានស្នើសុំការជួយអន្តរាគមន៍ពីក្រសួងប្រៃសណីយ៍ និងក្រសួងមហាផ្ទៃ ដើម្បីចាត់វិធានការតាមផ្លូវច្បាប់ចំពោះជនណា ដែលប្រមាថ និងបរិហារកេរ្តិ៍ ដល់មន្ត្រីរាជការ។ ការស្នើសុំឲ្យមានការជួយអន្តរាគមន៍ពីក្រសួងទាំងពីរនេះ បានកើតឡើងភ្លាមៗ ក្រោយពីមានការរឹះគន់ និងការប្រើប្រាស់ពាក្យអសុរោះតាមបណ្តាញសង្គមពីបញ្ហាទឹកដីកម្ពុជា។
ចុះផ្សាយនៅថ្ងៃ៖
ស្តាប់ - ០២:៣១
តាមរយៈលិខិតពីររបស់ទីស្តីការគណៈរដ្ឋមន្ត្រី ដែលមានហត្ថលេខាលោក ផៃ ស៊ីផាន បានស្នើសុំជាលក្ខណៈបច្ចេកទេសពីក្រសួងប្រៃសណីយ៍ និងទូរគមនាគមន៍ រួមទាំងការអនុវត្តច្បាប់ពីក្រសួងមហាផ្ទៃ។ លោកផៃ ស៊ីផាន បានបញ្ជាក់បន្ថែមប្រាប់វិទ្យុបារាំងអន្តរជាតិថា ការស្នើសុំពីក្រសួងពីរនេះ គឺដើម្បីឲ្យក្រសួងធ្វើការបិទម្ចាស់គណនីណា ដែលប្រើប្រាស់នូវពាក្យអសុរោះប្រមាថមកលើមន្ត្រីរាជការ រួមទាំងថ្នាក់ដឹកនាំផងដែរ។
សូមបញ្ជាក់ថាការស្នើសុំរបស់លោក ផៃ ស៊ីផាន អ្នកនាំពាក្យរាជរដ្ឋាភិបាលរូបនេះ បានកើតឡើងក្រោយពីមានក្រុមអ្នកប្រើប្រាស់បណ្តាញសង្គមមួយចំនួនបានបង្ហោះនូវរូបភាពផ្សេងៗ ដែលមានលក្ខណៈប្រមាថមកមន្ត្រីរដ្ឋាភិបាល ពីបញ្ហាទឹកដីក្នុងខេត្តត្បូងឃ្មុំជាមួយនឹងប្រទេសជិតខាង។
លោក ផៃ ស៊ីផាន បានបញ្ជាក់តាមរយៈលិខិតទាំងពីរនោះថា ការប្រមាថ និងការបរិហារកេរ្តិ៍ គឺមិនស្ថិតនៅក្នុង សេរីភាពក្នុងការបញ្ចេញយោបល់នោះឡើយ ក៏ប៉ុន្តែវាជាការរំលោភសិទ្ធិ និងសេចក្តីថ្លៃថ្នូររបស់បុគ្គលដែលត្រូវរងការប្រមាថ និងប្រៀតបៀនសេចក្តីថ្លៃថ្នូរ។ តាមរយៈលិខិតរបស់លោកផ្ញើទៅកាន់រដ្ឋមន្ត្រីក្រសួងមហាផ្ទៃ លោកស្នើសុំឲ្យក្រសួងនេះ ចាត់វិធានការតាមផ្លូវច្បាប់ចំពោះអ្នកវាយប្រហារប្រមាថ និងបរិហារកេរ្តិ៍ទៅលើមន្ត្រីរាជការ តាមរយៈបណ្តាញសង្គម។
យ៉ាងណាមិញលោក អ៊ូ វីរៈ ជាអ្នកសិក្សាស្រាវជ្រាវពីបញ្ហាសង្គម បានបញ្ជាក់ថាការលើកឡើងរបស់លោកផៃ ស៊ីផាន ពីការប្រើពាក្យអសុរោះ ប្រមាថមាក់ងាយ គឺមិនមានភាពច្បាល់លាស់ ឬមិនមាននិយមន័យច្បាស់លាស់ ហើយក៏មិនមានចែងនៅក្នុងច្បាប់ច្បាស់លាស់ផងដែរ។ លោកបញ្ជាក់ថាចំពោះការអនុវត្តច្បាប់តាមការស្នើរបស់លោកផៃ ស៊ីផាន មិនមែនជាបញ្ហានោះទេ ប៉ុន្តែការអនុវត្តនោះត្រូវធានានូវសេរីភាពនៃការបញ្ចេញមតិផងដែរ។
លោកបានបន្ថែមថាបច្ចុប្បន្ននេះពិតជាមានអ្នកប្រមាថ ឬប្រើពាក្យអសុរោះតាមបណ្តាញសង្គមច្រើនមែន ហើយគួរតែមានកម្រិត និងចែងក្នុងច្បាប់ឲ្យបានច្បាស់លាស់។ ម្យ៉ាងវិញទៀត ការដាក់ទោសទាន់ចំពោះអ្នកជេប្រមាថមិនគួរធ្វើឡើងដោយច្បាប់ព្រហ្មទណ្ឌនោះទេ តែគួរតែកំណត់ក្នុងច្បាប់រដ្ឋប្បវេណី និងផាកពីន័យចំពោះការប្រើពាក្យអសុរោះប្រមាថ ឬបរិហារកេរ្តិ៍។
កញ្ញា សន រ៉ាម៉ាណា អ្នកស្រាវជ្រាវ និងជាមន្ត្រីសម្របសម្រួលគំរោងសិទ្ធិរបស់មជ្ឈមណ្ឌលសិទ្ធិមនុស្សកម្ពុជាបានប្រាប់ឲ្យដឹងថា ប្រសិនមានការចាត់វិធានការដូចនេះមែន ហើយស្របនឹងច្បាប់របស់កម្ពុជាចែងបែបទូលាយ ឬមិនច្បាស់លាស់ នោះវាអាចនឹងធ្វើឲ្យប៉ះពាល់ដល់មនុស្សមួយចំនួន ដែលបញ្ចេញមតិរិះគន់ពីចំណុចខ្វះខាតរបស់រដ្ឋាភិបាល។ ម្យ៉ាងវិញទៀត ប្រសិនបើអ្នកអនុវត្តច្បាប់ ដាក់ទោសបុគ្គល ដែលប្រើពាក្យអសុរោះ ប្រមាថ ដោយទោសឧក្រិដ្ឋ វាគឺជារឿងហួសហេតុពេកចំពោះការចាតវិធានការច្បាប់បែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ