CMACប្រើបច្ចេកវិទ្យាដំបូងពីអាមេរិកដោះបានគ្រាប់បែកប្រភេទ MK ៨២ ទម្ងន់២៥០ គីឡូពីក្នុងទន្លេមេគង្គ
ក្រុមការងារពិសេសរបស់ជម្ឈមណ្ឌលសកម្មភាពកំចាត់មីនកម្ពុជា CMAC បានរកឃើញគ្រាប់បែកប្រភេទ MK ៨២ទម្ងន់២៥០ គីឡូក្រាម នៅក្រោមបាតទន្លេមេគង្គស្ថិតក្នុងស្រុកល្វាឯម ខេត្តកណ្តាល កាលពីថ្ងៃទី ២១ ឧសភា។ ប្រតិបត្តិការរ៉ុករកនេះត្រូវបានធ្វើឡើងជាលើកដំបូង ក្រោមការអនុវត្តនិងប្រើប្រាស់ឧបករណ៍បច្ចេកទេសដែលជាជំនួយរបស់អាមេរិក។ ប៉ុន្តែអគ្គនាយក CMAC បានបញ្ជាក់នេះ មិនមែនជាលើកទីមួយដែលកម្ពុជាស្រាវជ្រាវរកគ្រាប់មីននៅក្រោមទឹកនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
លោក ហេង រតនា អគ្គនាយក CMAC បានលើកឡើងថានេះ គឺជាលើកទីមួយ ដែលក្រុមការងារពិសេសរបស់ស៊ីម៉ាក់បានយកបច្ចេកទេស និងសម្ភារៈដែលជាជំនួយរបស់សហរដ្ឋអាមេរិកយកមកអនុវត្តនៅក្នុងគម្រោងដោះមីនក្រោមទឹកនេះ។ ប៉ុន្តែលោកបានបញ្ជាក់ថា ការស្រាវជ្រាវដោះមីនក្រោមទឹកនៅកម្ពុជាមិនមែនទើបតែត្រូវបានធ្វើឡើងនៅពេលនេះនោះទេ គឺត្រូវបានធ្វើឡើងមកជាយូរហើយ។ ឧទាហរណ៍ដូចជានៅពេលបើកការដ្ឋានសាងសង់ស្ពានអ្នកលឿង ក្រុមការងាររបស់CMAC ស្រាវជ្រាវដោះគ្រាន់មីនបានជាង ៤ពាន់គ្រាប់ ដែលមានទាំងនៅក្នុងទឹក ច្រាំងទន្លេ និងលើគោកផង។
ដោយឡែកក្រុមការងារពិសេសរបស់ CMAC ដែលទើបតែទទួលបានការបណ្តុះបណ្តាល និងជំនួយជាថវិការួមទាំងសម្ភារៈទំនើបៗក្នុងការស្រាវជ្រាវរកគ្រាប់មីនក្រោមទឹកនេះ នឹងត្រូវបន្តប្រតិបត្តិការរបស់ខ្លួនរយៈពេលពេញមួយឆ្នាំបន្តទៀត ទៅតាមទីតាំងផ្សេងៗគ្នានៅក្នុងប្រទេសកម្ពុជា។ ក្រុមពិសេសនេះមានសមាជិកចំនួន១០នាក់ ហើយទទួលបានថវិកា និងសម្ភារៈឧត្តម្ភពីសហរដ្ឋអាមេរិកគិតជាទឹកប្រាក់ប្រមាណជា ជាង ១០ម៉ឺនដុល្លាដែលបូកបញ្ជូលទាំងថ្លៃសម្ភារៈ។
លោកហេង រតនាបានបញ្ជាក់ថា គ្រាប់បែកដែលត្រូវបានទម្លាក់នៅក្នុងប្រទេសកម្ពុជា គឺជាគ្រាប់បែករបស់អាមេរិក ហើយត្រូវបានទំលាក់ច្រើនមកលើទឹកដីកម្ពុជាក្នុងឆ្នាំ ១៩៦៩ រហូតដល់ដើមឆ្នាំ ១៩៧៥។ ហើយទំលាក់ច្រើនខ្លាំងនៅចុងឆ្នាំ ១៩៧៤ និងដើមឆ្នាំ ១៩៧៥ ក្នុងអំឡុងពេលសង្គ្រាមវៀតណាម និងអាមេរិក។ គ្រាប់បែកដែលអាមេរិកបាន ទំលាក់មកលើកម្ពុជាមានទម្ងន់ ២, ៧លានតោន ហើយក្នុងនោះមានគ្រាប់បែកចង្កោម ប្រមាណជា ១៩, ៥លានគ្រាប់ ដែលត្រូវបានទំលាក់ទៅលើទីតាំងពី១ម៉ឺន ទៅ ២ម៉ឺន នៅក្នុងប្រទេសកម្ពុជា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ