ប៉ូលីសហុងកុង ចាប់ផ្ដើមបោសសម្អាតទីតាំងធ្វើបាតុកម្មរបស់ក្រុមអ្នកគាំទ្រប្រជាធិបតេយ្យ
ប៉ូលីសហុងកុង ចាប់ផ្ដើមដកប៉ារ៉ាសររបស់បាតុករចេញពីផ្លូវនៅថ្ងៃចន្ទទី១៣ខែតុលានេះ ប៉ូលីសហុងកុង បានដកប៉ារ៉ាសនៅតាមតំបន់មួយចំនួន ដែលបាតុករគាំទ្រលទ្ធិប្រជាធិបតេយ្យ កាន់កាប់អស់រយៈពេលជាង២សប្ដាហ៍កន្លងមក។ ការបោសសម្អាតរបស់ប៉ូលីសនាពេលនេះ បានអនុញ្ញាតឲ្យយានជំនិះធ្វើចរាចរណ៍បានខ្លះ ជាពិសេសនៅតាមតំបន់ពាណិជ្ជកម្មធំ។ យ៉ាងណាក៏ដោយ ក្រុមបាតុករមួយចំនួននៅតែមិនព្រមចាកចេញពីកន្លែងធ្វើបាតុកម្ម និងបានបញ្ជាក់ច្បាស់ៗថា ពួកគេត្រៀមខ្លួនរួចរាល់ហើយប្រសិនបើប៉ូលីសចង់ចាប់ខ្លួនពួកគេនោះ។
ចុះផ្សាយនៅថ្ងៃ៖
ស្តាប់ - ០២:០៥
នៅព្រឹកថ្ងៃចន្ទ ទី១៣តុលា ឆ្លៀតពេលដែលក្រុមបាតុករមួយចំនួនអវត្តមានពីកន្លែងធ្វើបាតុកម្ម ប៉ូលីសហុងកុងរាប់រយនាក់ បានចាប់ផ្ដើមយុទ្ធនាការបោសសម្អាតរបាំងប៉ារ៉ាសរបស់បាតុករ ដែលដាក់រាយប៉ាយនៅតាមផ្លូវ ក្នុងតំបន់ពាណិជ្ជកម្មដ៏សំខាន់របស់ហុងកុង។ បន្ទាប់ពីនោះ ប៉ូលីសបានឈរតម្រង់ជួរគ្នាជាជួរៗ ការពារទីតាំងធ្វើបាតុកម្មមួយផ្នែកដែលខ្លួនទើបបោសសម្អាតរួច។
បាតុករមួយចំនួនទៀត ដែលនៅកាន់កាប់កន្លែងធ្វើបាតុកម្មនៅឡើយ មិនបានខ្វល់ពីការបោសសម្អាតរបស់ប៉ូលីសនោះទេ។ ពួកគេខ្វល់តែពីប៉ារ៉ាស និងទីតាំងដែលពួកគេកំពុងអង្គុយតែប៉ុណ្ណោះ។ ក្រុមបាតុករលើកឡើងថា ប្រសិនបើប៉ូលីសមិនធ្វើអ្វីពួកគេ ពួកគេក៏មិនធ្វើអ្វីប្រឆាំងនឹងប៉ូលីសវិញដែរ។
ក្រុមប៉ូលីស បានគូសបញ្ជាក់ថា ការបោសសម្អាតរបស់ខ្លួន ធ្វើឡើងក្នុងបំណងសម្រួលឲ្យយានជំនិះធ្វើចរាចរណ៍បាន មិនមានបំណងរារាំង ឬបញ្ចប់ការធ្វើបាតុកម្មរបស់ក្រុមអ្នកតវ៉ានោះឡើយ។
នៅក្នុងសេចក្ដីថ្លែងការណ៍មួយ ប៉ូលីសហុងកុងបានអំពាវនាវឲ្យបាតុករ ស្ដាប់តាមឱវាទរបស់ខ្លួន និងមិនត្រូវរារាំងសកម្មភាពសម្រួលចរាចរណ៍របស់ខ្លួនទេ។ និងថា បាតុករត្រូវចាកចេញពីកន្លែងដែលកំពុងតែកាន់កាប់នោះ ដោយសន្តិវិធី និងមានរបៀបរៀបរយ។
យ៉ាងណាក៏ដោយ បាតុករមួយចំនួនដែលនៅកាន់កាប់កន្លែងធ្វើបាតុកម្ម មិនបានស្ដាប់តាមការអំពាវនាវនេះឡើយ ហើយថែមទាំងបានបោះតង់នៅចំពោះមុខប៉ូលីសរាប់រយនាក់ ដែលកំពុងឈរយាមកន្លែងធ្វើបាតុកម្មទៀតផង។ ក្រុមបាតុករបានអះអាងថា ពួកគេនឹងមិនចាកចេញពីទីតាំងធ្វើបាតុកម្មនេះឡើយ និងបានបញ្ជាក់ច្បាស់ៗថា ពួកគេត្រៀមខ្លួនរួចរាល់ហើយប្រសិនបើប៉ូលីសចង់ចាប់ខ្លួនពួកគេនោះ។
សូមរំលឹកថា ចលនាបាតុកម្មនៅហុងកុង បានកើតមានតាំងពីខែមុន ដើម្បីទាមទារឲ្យមានការបោះឆ្នោតដោយសេរី និងសកលនៅហុងកុង។ ការចរចារវាងក្រុមបាតុករ និងមន្ដ្រីជាន់ខ្ពស់ក្រុងហុងកុង បានទទួលបរាជ័យកាលពីសប្ដាហ៍មុន ហើយក្រុមបាតុករបានប្ដេជ្ញាបន្តបាតុកម្មរបស់ខ្លួនតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ