ប្រធានាធិបតីឥណ្ឌូណេស៊ីធ្វើអន្តរាគមន៍លើសំណុំរឿងធ្វើបាបអ្នកបំរើតាមផ្ទះ
សំណុំរឿងធ្វើបាបអ្នកបំរើឥណ្ឌូណេស៊ី ពីសំណាក់ថៅកែហុងកុង បានឡើងដល់ត្រចៀករបស់ប្រធានាធិបតីឥណ្ឌូណេស៊ី។ ប្រធានាធិបតី បានសន្យា ដោយផ្ទាល់ រកយុត្តិធម៌ជូនជនរងគ្រោះ។ ចំណែកខាងហុងកុងវិញ ប៉ូលិសក៏ផ្តើមធ្វើសកម្មភាពយ៉ាងសកម្ម ដោយបានធ្វើដំណើរមកឥណ្ឌូណេស៊ី ដើម្បីសាកសួរ និងសម្ភាសន៍ជាមួយជនរងគ្រោះ ដែលកំពុងសម្រាកព្យាបាលក្នុងមន្ទីរនៅកោះJava ប្រទេសឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
មុននឹងធ្វើដំណើរមកឥណ្ឌូណេស៊ី ប៉ូលិសហុងកុងបានឃាត់ខ្លួនស្ត្រីជាម្ចាស់ផ្ទះ ដែលនាង Erwiana Sulistyaningsih អ្នកបំរើឥណ្ឌូណេស៊ីធ្វើឱ្យ នៅព្រលានយន្តហោះ ក្នុងពេលប៉ុនប៉ងរត់គេចខ្លួនទៅកាន់ប្រទេសថៃ។ មានអាយុ៤៤ឆ្នាំ ស្ត្រីជាថៅកែនេះ ទំនងជាត្រូវជាប់សង្ស័យថាបានធ្វើបាបអ្នកបំរើក្នុងផ្ទះម្នាក់ទៀត។
នៅព្រឹកថ្ងៃអង្គារនេះ ប៉ូលិសហុងកុងបានចាប់ផ្តើមសាកសួរជនរងគ្រោះ ដែលកំពុងសម្រាកព្យាបាលនៅមន្ទីរនៅឡើយ។ មានអាយុ ២៣ឆ្នាំ នាង Erwiana Sulistyaningsih បានសហការយ៉ាងពេញទំហឹងជាមួយប៉ូលិស រៀបរាប់តាំងដំណើរទៅដល់ហុងកុង ការធ្វើទារុណកម្ម របស់ម្ចាស់ផ្ទះមកលើអ្នកបំរើ និងការងារដែលត្រូវធ្វើជាប្រចាំថ្ងៃ។ មិនតែប៉ុណ្ណោះ នាងសុខចិត្តធ្វើដំណើរទៅហុងកុងដើម្បីបំភ្លឺតុលាការប្រសិនបើចាំបាច់ និងប្រសិនបើស្ថានសុខភាពអនុញ្ញាត។ នេះបើតាមការអះអាងរបស់ប៉ូលិសហុងកុង ទៅកាន់អ្នកសារព័ត៌មាននៅកោះJava។ គេក៏ឃើញមានអ្នកទទួលខុសត្រូវក្នុងក្រសួងការងារហុងកុង ធ្វើដំណើរមកជួបជនរងគ្រោះនៅផ្ទាល់នឹងកន្លែងដែរ។
សំណុំរឿងធ្វើបាបអ្នកបំរើតាមផ្ទះនេះ មិនបញ្ចប់ត្រឹមណេះទេ លោកប្រធានាធិបតីឥណ្ឌូណេស៊ី Susilo Bambang Yuthoyono បានប្រាស្រ័យទាក់ទងជាមួយនឹងថ្នាក់ដឹកនាំហុងកុង និងបានទូរស័ព្ទមកឪពុក និងរូបនាងជាជនរងគ្រោះផ្ទាល់ ដើម្បីលើកទឹកចិត្ត ដោយសន្យាដោះស្រាយតាមផ្លូវច្បាប់ រកយុត្តិធម៌ជូន ព្រមទាំងជួយឧបត្ថម្ភការព្យាបាលជំងឺ។
ហុងកុងអតីតដែនដីអាណានិគមន៍អង់គ្លេស មានពលកម្មបំរើការងារតាមផ្ទះប្រមាណជាងបីសែននាក់ ភាគច្រើនជាជនជាតិហ្វីលីពីន និងឥណ្ឌូណេស៊ី។ ថ្វីបើជាទូទៅ ហុងកុង មានការការពារសិទ្ធិបុគ្គលិកតាមផ្ទះខ្លាំងជាងបណ្តាប្រទេសអាស៊ីភាគខាងត្បូងមែន ប៉ុន្តែការរិះគន់មានកាន់តែច្រើនឡើងៗ ចំពោះករណីម្ចាស់ផ្ទះធ្វើបាបអ្នកបំរើ។ កាលពីថ្ងៃអាទិត្យកន្លងទៅថ្មីៗនេះ អ្នកបំរើរាប់សិបពាន់នាក់ បាននាំគ្នាធ្វើបាតុកម្ម ហែញត្តិទៅប្រគល់ឱ្យមេប៉ូលិសហុងកុងផ្ទាល់ ដើម្បីទាមទារការបើកអង្កេតត្រឹមត្រូវលើករណីនាង Erwiana Sulistyaningsih ដែលមានសំណាងអាចរត់គេចខ្លួនមកស្រុកកំណើតបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ