ទិវាសិទ្ធិមនុស្ស៖ កម្មករ និងសកម្មជនសិទ្ធិមនុស្សដាក់ញត្តិជូនរដ្ឋសភា
នៅថ្ងៃពុធទី១០ ធ្នូដែលជាទិវាសិទ្ធិមនុស្សនេះ សកម្មជនសិទ្ធិមនុស្ស ព្រះសង្ឃ និងកម្មករ បានប្រមូលផ្តុំគ្នានៅខាងមុខរដ្ឋសភាជាតិ ដើម្បីដាក់ញត្តិទាមទារដល់សមាជិករដ្ឋសភាដោះស្រាយកង្វល់របស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
កម្មករ សកម្មជនសិទ្ធិមនុស្ស ប្រមាណជាង ៣០០០នាក់ដែលរួមមានទាំងព្រះសង្ឃផង បានប្រមូលផ្តុំគ្នាជាពីរក្រុមនៅខាងមុខរដ្ឋសភា ដើម្បីដាក់ញត្តិ នៅថ្ងៃទិវាសិទ្ធិមនុស្សលើកទី៦៦ឆ្នាំ២០១៤នេះ។
ក្រុមទី១ គឺក្រុមកម្មករកម្មការនីគ្រប់វិស័យ ដែលដឹកនាំ ដោយលោកអាត ធន់ និងក្រុមទីពីរគឺក្រុមព្យុហយាត្រា មកពីតាមបណ្តាខេត្តទាំង៦ ដែលមានការចូលរួមសកម្មជនសិទ្ធិមនុស្ស ដីធ្លី និងព្រះសង្ឃ។
ក្នុងដៃកាន់បដាសម្តែងក្តីកង្វល់ និងការទាមទាររបស់ខ្លួន ក្រុមកម្មករកម្មការនី មកពីគ្រប់វិស័យ បានឈរច្រូងច្រាងស្តាប់ការថ្លែងរបស់អ្នកតំណាងរបស់ខ្លួន។ តំណាងកម្មករនីមួយៗ បានឡើងថ្លែងពីកង្វល់លំបាករបស់ខ្លួនម្នាក់ម្តង។ នៅចំពោះមុខគណៈកម្មការទី១ និងគណៈកម្មការទី១០ ដែលបានចេញមកទទួលញត្តិពីក្រុមកម្មករ។ លោកអាត់ ធន់ បានអានការទាមទារចំនួន ១២ចំណុចដើម្បីឱ្យរដ្ឋសភាដោះស្រាយកង្វល់របស់ខ្លួន។
ក្នុងនោះរួមមាន ទី១ ស្នើដំឡើងប្រាក់ឈ្នួល១៤០ដុល្លា ទី២ស្នើឱ្យអន្តរាគមន៍បញ្ចុះតម្លៃទំនិញលើទីផ្សារ ទី៣ស្នើឱ្យមានការទាំសុខភាពពីរដ្ឋាភិបាល ទី៤បញ្ចប់នីតិវិធីស្មុគស្មាញ ក្នុងការចុះបញ្ជីសហជីព ទី៥ ស្នើបង្កើតតុលាការងារ ទី៦ បញ្ចប់និតិវិធីរបស់តុលាការមកលើសហជីព និងទី៧បង្កើតជំនាញ ដល់កម្មករ និងសម្រួលលក្ខខណ្ឌការងារ រួមទាំងបញ្ឈប់ការអនុម័តច្បាប់ ស្តីពីសហជីពជាដើម។
ដោយឡែកក្រុមព្យុហយាត្រាទាំង៦ទិសរបស់ក្រុមសង្គមស៊ីវិលវិញ តាំងពីម៉ោងប្រមាណជាងព្រឹកបានបន្តមកដល់ទីតាំងមុខរដ្ឋសភាជាបន្តបន្ទាប់។ ក្បួនដែលមានអ្នកស្លៀកសពាក់ ស ព្រះសង្ឃ និងប្រជាពលរដ្ឋសកម្មជនដីធ្លីនោះ បានប្រារព្ឋទិវាសិទ្ធិមនុស្ស១០ធ្នូនេះ ក្រោមប្រធានបទ ការគោពសិទ្ធិមនុស្សនាំមកនូវសន្តិភាព។ ក្រុមដែលបានធ្វើដំណើរតាមបណ្តាខេត្តទាំង៦ បានស្រែកទាមទាររកយុត្តិធម៌ ចំពោះសកម្មជនវិវាទដីធ្លី នៅតំបន់បឹងកក់ដែលកំពុងជាប់ឃុំ ដើម្បីរកយុត្តិធម៌ក្នុងសង្គមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ