រដ្ឋាភិបាលផ្តល់អំណាចអោយអាជ្ញាធរទន្លេសាបបន្តបង្ក្រាបបទល្មើសជលផល
រាជរដ្ឋាភិបាលកម្ពុជាផ្តល់អំណាចអោយអាជ្ញាធរទន្លេសាបបន្តបង្ក្រាបបទល្មើសនេសាទនៅតំបន់បឹងទន្លេសាបក្នុងជំហានទីបី។ ក្នុងជំហានទីបីនេះ អាជ្ញាធរបឹងទន្លេសាបមានតួនាទីតាមដាន ទប់ស្កាត់ និងបង្ក្រាបនូវរាល់បទល្មើសនេសាទ ដែលអាចកើតមានឡើងជាថ្មីនាពេលខាងមុខ ជាពិសេសបទល្មើសដែលកើតឡើងពេលយប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
រដ្ឋមន្ត្រីក្រសួងធនធានទឹក និងជាប្រធានអាជ្ញាធរទន្លេសាបមានសិទ្ធិបន្តតាមដាន ទប់ស្កាត់ និងបង្ក្រាបនូវរាល់បទល្មើសជលផលអនាធិបតេយ្យនៅតាមបឹងទន្លេសាប។
នេះគឺជាខ្លឹមសារលិខិតនៃទីស្ដីការគណៈរដ្ឋមន្ត្រី ចុះហត្ថលេខាកាលពីម្សិលមិញ ផ្ញើជូនរដ្ឋមន្ត្រីក្រសួងធនធានទឹក។ លិខិតនេះត្រូវបានធ្វើឡើងបន្ទាប់ពីអាជ្ញាធរទន្លេសាប និងស្ថាប័នពាក់ព័ន្ធមួយចំនួនផ្សេងទៀតបានចុះបង្ក្រាបបទល្មើសនេសាទមួយចំនួនធំ ក្នុងជំហានទី១ និងទី២ នាពេលកន្លងមក។
ទីស្ដីការគណៈរដ្ឋមន្ត្រីបានសរសេរថា ក្នុងជំហានទីបីនេះ អាជ្ញាធរបឹងទន្លេសាបមានកាតព្វកិច្ចបង្ក្រាបបទល្មើសជលផលដែលអាចនឹងកើតឡើងជាថ្មី នាពេលខាងមុខ ជាពិសេសបទល្មើសកើតឡើងពេលយប់។
លិខិតបានបន្តទៀតថា ដរាបណាបទល្មើសអនាធិបតេយ្យនៅបឹងទន្លេសាបនៅតែកើតមាន នោះ បទបញ្ជាលេខ០១របស់លោកនាយករដ្ឋមន្ត្រី ហ៊ុន សែន ចុះថ្ងៃទី២២ខែឧសភា នៅតែមានសុពលភាពក្នុងការអនុវត្តដដែល។
បទបញ្ជាលេខ០១របស់លោក ហ៊ុន សែន បានបញ្ជាអោយមានការរុះរើសំណង់មួយចំនួន ដូចជា សម្រាស់ ធ្នស់ ព្រួល និងសំណង់កាត់ទទឹងទន្លេ ស្ទឹង ព្រែក អូរ និងបឹងបួ នៅតាមបណ្ដាខេត្តពាក់ព័ន្ធនឹងបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម និងខេត្តកណ្ដាល។
រាជរដ្ឋាភិបាលកម្ពុជាបានពន្យល់ថា សំណង់ទាំងនោះបានបង្កឧបសគ្គធំៗចំនួន៤។ ទី១ បង្កបញ្ហាដល់ការធ្វើចរាចរណ៍ជលយានគ្រប់ប្រភេទ។ ទី២ បង្កបញ្ហាដល់របបជលសាស្ត្រ។ ទី៣ បង្កបញ្ហាដល់បន្លាស់ទីមច្ឆជាតិគ្រប់ប្រភេទ និងទី៤ បង្កអោយមានការគោករាក់យ៉ាងឆាប់រហ័សដល់ទន្លេ ស្ទឹង ព្រែក និងបឹងបួ។
នាពេលកន្លងមក អ្នកនេសាទតូចតាច និងមន្ត្រីជលផលតែងតែផ្តល់ទិន្នន័យខុសគ្នា ចំពោះតួលេខផលត្រីនៅក្នុងប្រទេសកម្ពុជា។ អ្នកនេសាទតូចតាចបាននិយាយប្រាប់ថា ផលត្រីនៅក្នុងទន្លេមេគង្គ និងទន្លេសាបមានការថយចុះពីមួយឆ្នាំទៅមួយឆ្នាំ ប៉ុន្តែ មតិនេះតែងតែទាត់ចោលដោយមន្ត្រីជលផល។
យុទ្ធនាការបង្ក្រាបបទល្មើសរបស់រាជរដ្ឋាភិបាលនៅពេលនេះត្រូវបានគេមើលឃើញថាគឺដើម្បីការពារព្រៃលិចទឹក និងដើម្បីការពារធនធានត្រីនៅក្នុងបឹងទន្លេសាប ប៉ុន្តែ យុទ្ធនាការនេះគួរត្រូវបានគេធ្វើមុននេះបន្តិចទើបជាការប្រសើរជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ