លោកហ៊ុន សែន៖ សំណង់កាត់ទទឹងទន្លេបឹងបួត្រូវរុះរើចេញ
ម្ចាស់សម្រាស់ ធ្នស់ ព្រួលនិងសំណង់កាត់ទទឹងទន្លេ ស្ទឹង ព្រែក អូរ និងបឹងបួ នៅតាមបណ្ដាខេត្តពាក់ព័ន្ធនឹងបឹងទន្លេសាប ត្រូវរុះរើចេញអោយអស់ក្នុងរយៈពេល២សប្ដាហ៍។ ផុតកំណត់នេះ កម្លាំងអន្តរាគមន៍ពិសេសនឹងចុះបំផ្លាញចោល និងកសាងសំណុំរឿងបញ្ជូនទៅតុលាការ។ រាជរដ្ឋាភិបាលពន្យល់ថា សំណង់ទាំងនេះបង្កឧបសគ្គដល់ការធ្វើចរាចរណ៍ផ្លូវទឹក និងប៉ះពាល់ដល់ការបន្លាស់ទីនៃមច្ឆជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
នៅក្នុងបទបញ្ជាចុះហត្ថលេខា នៅថ្ងៃអាទិត្យ ទី២២ ខែឧសភា ឆ្នាំ២០១១នេះ លោក នាយករដ្ឋមន្ត្រី ហ៊ុន សែន បានបញ្ជាអោយមានការរុះរើសំណង់មួយចំនួន ដូចជា សម្រាស់ ធ្នស់ ព្រួល និងសំណង់ កាត់ទទឹងទន្លេ ស្ទឹង ព្រែក អូរនិងបឹងបួនៅតាមបណ្ដាខេត្តពាក់ព័ន្ធបឹងទន្លេសាប។ បណ្ដាខេត្តដែលពាក់ព័ន្ធបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម និងខេត្តកណ្ដាល។
យោងតាមបទបញ្ជានេះ អភិបាលនៃគណៈអភិបាលខេត្តទាំង៨ខាងលើនេះត្រូវអញ្ជើញម្ចាស់សំណង់គ្រប់ប្រភេទទាំងអស់មកធ្វើការណែនាំ និងតម្រូវអោយពួកគេរុះរើសំណង់ទាំងនោះចេញដោយខ្លួនឯង ដោយទុករយៈពេលពីរសប្ដាហ៍ជូន។ ប្រសិនបើផុតរយៈពេលកំណត់នេះហើយ ម្ចាស់សំណង់មិនរុះរើចេញទេនោះ ក្រសួងធនធានទឹក អាជ្ញាធរទន្លេសាប អាជ្ញាធរខេត្តពាក់ព័ន្ធ និងកងកម្លាំងអន្តរាគមន៍ពិសេស នឹងចុះបំផ្លាញសំណង់ទាំងនោះចោលទាំងស្រុង និងកសាងសំណុំរឿងបញ្ជូនទៅតុលាការ ដើម្បីផ្ដន្ទាទោសតាមផ្លូវច្បាប់។ លើសពីនេះទៅទៀត ម្ចាស់សំណង់ត្រូវចេញសោហ៊ុយ សម្រាប់ការងារប្រតិបត្តិការរុះរើ។
បទបញ្ជារបស់ប្រមុខរាជរដ្ឋាភិបាលកម្ពុជាបានពន្យល់ថា សំណង់ទាំងនោះបានបង្កឧបសគ្គធំៗចំនួន៤។ ទី១ បង្កបញ្ហាដល់ការធ្វើចរាចរណ៍ជលយានគ្រប់ប្រភេទ។ ទី២ បង្កបញ្ហាដល់របបជលសាស្ត្រ។ ទី៣ បង្កបញ្ហាដល់បន្លាស់ទីមច្ឆជាតិគ្រប់ប្រភេទ និងទី៤ បង្កអោយមានការគោករាក់យ៉ាងឆាប់រហ័សដល់ទន្លេ ស្ទឹង ព្រែក និងបឹងបួ។
សូមបញ្ជាក់ថា បទបញ្ជារបស់លោក នាយករដ្ឋមន្ត្រី ហ៊ុន សែន បានធ្វើឡើងស្របពេលដែលអ្នកនេសាទតូចធំ និងម្ចាស់ឡូត៍នេសាទមួយចំនួនត្អូញត្អែរអោយដឹងជារឿយៗថា ផលនេសាទនៅក្នុងប្រទេសកម្ពុជាមានការថយចុះពីមួយឆ្នាំទៅមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ