នាយករដ្ឋមន្ត្រីឥណ្ឌាថ្មីដំឡើងសំឡេងដាក់ប៉ាគីស្ថាននៅតំបន់កាសឺម្មៀ
លោក ណារិនដ្រា ម៉ូឌី នាយករដ្ឋមន្ត្រីឥណ្ឌាថ្មី ដែលជាអ្នកជាតិនិយមឥណ្ឌូ បានអញ្ជើញទៅបំពេញ ទស្សនកិច្ចក្នុងថ្ងៃអង្គារទី ១២សីហានេះនៅកាសីម្មៀ តំបន់អស្ថិរភាពជាប់ព្រំប្រទល់ ជាមួយប៉ាគីស្ថាន។ នេះគឺជាលើកទីមួយ គិតចាប់តាំងពីឆ្នាំ១៩៩៩មកដែលប្រមុខរដ្ឋាភិបាលឥណ្ឌា អញ្ជើញទៅតំបន់ជាប់ជម្លោះជាមួយប្រទេសជិតខាង និងថែមទាំងបានឆ្លៀតចោទប្រកាន់ប៉ាគីស្ថានថាបានដឹកនាំធ្វើសង្គ្រាមដោយប្រើដៃពួកឧទ្ទាមភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
តំបន់កាសឺម្មៀត្រូវបានចែកជាពីរ មួយភាគជាកម្មសិទ្ធិឥណ្ឌា និងមួយភាគទៀតជារបស់ប៉ាគីស្ថាន ប៉ុន្តែប្រទេសទាំងពីរដណ្តើមទាមទាររហូតមកចង់យកទាំងមូលជារបស់ខ្លួនម្នាក់ឯងរៀងខ្លួនៗ។ ការដណ្តើមទាមទារដែលបានធ្វើប្រទេសមានអាវុធនុយក្លេអ៊ែរទាំងពីរធ្លាក់ក្នុងសង្គ្រាមដល់ទៅពីរដង ក្នុងចំណោមសង្គ្រាមឥណ្ឌា-ប៉ាគីស្ថានធំៗទាំងបី។ ក្រុមប្រដាប់អាវុធប្រមាណ១០ក្រុម ប្រយុទ្ធតតាំងជារៀងរាល់ថ្ងៃ តាំងពីឆ្នាំ១៩៨៩មក ដើម្បីទាមទារឯករាជ្យតំបន់កាសឺម្មៀ ឬដើម្បីភ្ជាប់ខ្លួនជាមួយប៉ាគីស្ថាន។ ការប្រឈមមុខដាក់គ្នានេះ បានបង្កឱ្យបាត់បង់ជីវិតមនុស្សរាប់ពាន់នាក់ ភាគច្រើនជាស៊ីវិល។
ហេតុដូច្នេះហើយ បានជានៅថ្ងៃអង្គារនេះ ក្នុងឱកាសអញ្ជើញទៅបំពេញទស្សនកិច្ចជាលើកទីមួយ នៅតំបន់កាសឺម្មៀឥណ្ឌា ក្នុងនាមជានាយករដ្ឋមន្ត្រី លោក ណារិនដ្រា ម៉ូឌី បានថ្កោលទោសចំៗ ចោទប្រកាន់ប៉ាគីស្ថាន ជាអ្នកដឹកនាំធ្វើសង្គ្រាម ដោយបានបំពាក់អាវុធឱ្យពួកបះបោរ និងដែលបាន បង្កឱ្យមានអ្នករងគ្រោះភេរវកម្មច្រើនជាងចំណេញពីសង្គ្រាម។ សូមបញ្ជាក់ថានៅព្រឹកមិញថ្ងៃអង្គារនេះ លោកម៉ូឌីបានអញ្ជើញទៅដល់ស្រុក Kargil ស្រុកដែលមានអស្ថិរភាពបំផុត និងទឹកដីដែលប៉ាគីស្ថានរុលចូលលុកលុយ កាលពីឆ្នាំ១៩៩៩ ដែលធ្វើឱ្យប្រទេសទាំងពីរវិះធ្លាក់ក្នុងសង្គ្រាមរវាងគ្នាម្តងទៀត។
ទស្សនកិច្ចនេះក៏ជាឱកាសសម្រាប់លោកនាយករដ្ឋមន្ត្រីចុះសួរសុខទុក្ខពលទាហានឈរជើងនៅតំបន់ព្រំដែនផង និងដើម្បីបើកសម្ពោធមជ្ឈមណ្ឌលអគ្គីសនីដើរដោយប្រភពទឹក ក្នុងតំបន់ហ៊ីម៉ាឡៃយ៉ាផង។ ប៉ុន្តែវាបានប្រព្រឹត្តទៅជួនចំពេលដែល ប៉ាគីស្ថានទើបកោះហៅតំណាងជាន់ខ្ពស់ស្ថានទូតឥណ្ឌាឱ្យចូលពន្យល់បន្ទាប់មានការបាញ់ តាមព្រំដែន បណ្តាលឱ្យជនស៊ីវិលប៉ាគីស្ថានម្នាក់។ អ៊ីស្លាម៉ាបាដ ចោទឥណ្ឌាថាបានរំលោភបទឈប់បាញ់ ដែលចូលជាធរមាននៅឆ្នាំ២០០៣ តែងតែថ្លោះថ្លោយបំពានពីគ្រប់ភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ