ទំនាក់ទំនងខ្មែរថៃ៖ ដំណោះស្រាយដែលមានតែរូបភាពច្រើនជាងខ្លឹមសារ
ចុះផ្សាយនៅថ្ងៃ៖
ស្តាប់ - ០៣:៥៨
នៅចុងសប្តាហ៍នេះ កម្ពុជា និងថៃនឹងប្រារព្ធខួនទី៦០ឆ្នាំនៃទំនាក់ទំនងការទូតរបស់ខ្លួន។ ព្រឹត្តិការណ៍នេះបានកើតឡើងចំពេលដែលចំណងទាក់ទងរវាងប្រទេសជិតខាង ទាំងពីរបានប្រសើរឡើងវិញ បន្ទាប់ពីការប្រឈមមុខដាក់គ្នាដ៏តឹងតែង អស់រយៈពេលជាង២ឆ្នាំ ក្នុងជម្លោះព្រំដែនប្រាសាទព្រះវិហារ។ ខួបទី៦០នៃទំនាក់ទំនងការទូតរវាងបាងកក និងភ្នំពេញនឹងត្រូវគេប្រារព្ធឡើងដោយផ្សារភ្ជាប់ជាមួយនឹងកិច្ច ខិតខំប្រឹងប្រែងផ្សះផ្សាមុខរបួសការទូតដ៏ជូរចត់ដែលដក់ជាប់ក្នុង ចិត្តរវាងប្រជាជាតិទាំងសងខាង។ តើបញ្ហារវាងខ្មែរ និងថៃជុំវិញបញ្ហាព្រះវិហារបានចប់ហើយ ឬនៅ?
នៅថ្ងៃទី១៨ធ្នូនេះ កម្ពុជា និងថៃគ្រោងប្រារព្ធពិធីដ៏មហោឡារិកមួយដើម្បីរំលឹកខួបទី៦០ឆ្នាំ នៃទំនាក់ទំនងការទូតរបស់ខ្លួន(១៩៥០-២០១០)។ ការប្រគំតន្ត្រីរួមគ្នាមួយ ត្រូវគេគ្រោងនឹងធ្វើ នៅក្នុងសាលសន្និសីទចតុម្មុខដោយមានការផ្សាយបន្តផ្ទាល់តាមទូរទស្សន៍ទៅកាន់ប្រទេសថៃ ផងដែរ។
ការរៀបចំប្រគំតន្ត្រីរួមគ្នារវាងកម្ពុជានិងថៃ និងការផ្សាយបន្តផ្ទាល់ពីភ្នំពេញទៅបាងកកនូវ ព្រឹត្តិការណ៍ដ៏អធិកអធមនេះមិនមែនជារឿងចៃដន្យឡើយ តែវាគឺជាកិច្ចខិតខំប្រឹងប្រែងរបស់រដ្ឋាភិបាលទាំងពីរក្នុងការបង្ហាញរូបភាពល្អៗ នៅចំពោះក្រសែភ្នែកនៃប្រជាជាតិទាំងសងខាង។ កិច្ចខិតខំប្រឹងប្រែងទាំងនេះត្រូវបានគេសង្កេតឃើញ ជាពិសេសតាំងពីនាយករដ្ឋមន្ត្រីខ្មែរ និងថៃបានជួបគ្នាចំនួន៤លើកចុងក្រោយនេះមក។
កាលពីសប្តាហ៍មុន លោកនាយករដ្ឋមន្ត្រីហ៊ុន សែន បានប្រកាសដោយមោទនភាពថា ឥឡូវនេះបញ្ហាព្រះវិហារបានវិលត្រឡប់ទៅរកស្ថានភាព មុនថ្ងៃ១៥កក្កដាឆ្នាំ២០០៨ឡើងវិញហើយ។ ការអះអាងយ៉ាងនេះ បន្ទាប់ពីភាគីទាំងពីរបានយល់ព្រមដកទ័ពចេញពីវត្តកែវសិក្ខាគិរីស្វារៈរៀងៗខ្លួន។ លោកនាយករដ្ឋមន្ត្រីហ៊ុន សែនក៏បានសម្តែងមោទនភាពចំពោះដំណោះស្រាយដោយសន្តិវិធីដែលជានយោបាយឈ្នះៗរបស់ខ្លួនផងដែរ។
ឥឡូវនេះ គឺជាពេលវេលាដែលភាគីទាំងពីរត្រូវថ្នាក់ថ្នមចិត្តគ្នាទៅវិញទៅមក ខុសពីពេលមុនដែលម្នាក់ៗបានដំឡើងសរសៃ កដាក់គ្នាស្ទើរតែដាច់ទៅហើយ។ ការថ្នាក់ថ្នមចិត្តរវាងរដ្ឋាភិបាល និងរដ្ឋាភិបាលគឺជារឿងមួយ តែការផ្សះផ្សារបួសផ្លូវចិត្តរវាងប្រជាជាតិខ្មែរ និងថៃគឺជារឿងមួយទៀត ពីព្រោះថា ទោះតិច ឬច្រើនជម្លោះព្រំដែន រយៈពេលជាង២ឆ្នាំនេះបានបង្កើតឲ្យមានអរិភាពយ៉ាងខ្លាំងរវាងពលរដ្ឋទាំងសងខាង។
ជាការពិត ប្រទេសថៃនិងកម្ពុជាក៏ដូចជាកម្ពុជា និងវៀតណាមដែរសុទ្ធតែធ្លាប់មានប្រវត្តិជូរចត់ ជាមួយគ្នាក្នុងអតីតកាល។ សម្រាប់រយៈពេល៦០ឆ្នាំចុងក្រោយនេះ មានព្រឹត្តិការណ៍ពីរដែលបានកើតឡើងរវាងខ្មែរ និងថៃ នៅក្នុងសំណុំរឿងតែមួយ គឺបញ្ហាប្រាសាទព្រះវិហារនេះឯង។ ជម្លោះបានកើតឡើងយ៉ាងតានតឹងម្តងរួចមកហើយ កាលពីក្នុងអំឡុងចុងទសវត្សរ៍៥០ តែវាបានស្ងប់ស្ងាត់ទៅវិញ បន្ទាប់ពីកម្ពុជាបានឈ្នះក្តី នៅឯតុលាការយុត្តិធម៌អន្តរជាតិក្រុងឡាអេ កាលពីខែមិថុនាឆ្នាំ១៩៦២។
ជាង៥០ឆ្នាំក្រោយមក គឺនៅថ្ងៃទី១៥កក្កដាឆ្នាំ២០០៨ បញ្ហាព្រះវិហារបានកើតឡើងជាថ្មីដែលធ្វើឲ្យប្រទេសជិតខាងគ្នា ក្នុងភូមិភាគអាស៊ីអាគ្នេយ៍ទាំងពីរនេះប្រឈមមុខដាក់គ្នាយ៉ាងតឹងតែងម្តងទៀត ទាំងផ្នែកការទូត និងយោធា។ ឥឡូវនេះស្ថានការណ៍បានស្ងប់ស្ងាត់ទៅវិញក៏ពិតមែន ប៉ុន្តែដំណោះស្រាយមានតែរូបភាពប៉ុណ្ណោះ តែជាខ្លឹមសារវិញបញ្ហានៅតែដដែល ពោលគឺថៃនៅតែមិនបានបោះបង់ការទាមទារដីខ្មែរនៅក្បែរប្រាសាទព្រះវិហារនៅឡើយ។
សំណួរដែលនៅតែចោទក្តៅគគុកនោះគឺ តើមេដឹកនាំថៃណាមួយដែលនឹងសុខចិត្តបោះបង់ចោលការទាមទារផ្ទៃដី ៤,៦ គីឡូម៉ែត្រក្រឡា ដែលពួកជ្រុលនិយមថៃអះអាងថា ជាដីរបស់ខ្លួននោះ? សំណួរនេះអាចឆ្លុះបញ្ចាំងបានអំពីជម្រៅនៃបញ្ហាពិតប្រាកដរវាងខ្មែរ និងថៃជុំវិញបញ្ហាព្រះវិហារ។
យ៉ាងណាក៏ដោយ ដំណោះស្រាយជារូបភាពក៏ជាដំណោះស្រាយវិជ្ជមានមួយដែរ ពីព្រោះថាការប្រឈមមុខដាក់គ្នាខាងយោធាដ៏តានតឹង រយៈពេលជាងពីរឆ្នាំមកនេះ ភាគីទាំងពីរសុទ្ធតែខាតបង់យ៉ាងធ្ងន់ធ្ងរទាំងជីវិតមនុស្ស ពេលវេលា និងធនធាន។ ដូច្នេះវាល្មមដល់ពេលដែលត្រូវបញ្ចប់ជម្លោះ ដោយទុកពេលសម្រាប់អភិវឌ្ឍប្រទេសវិញទើបប្រសើរជាង។
ប៉ុន្តែ តើភាគីថៃពិតជាមានភាពស្មោះត្រង់ នៅក្នុងការបញ្ចប់ជម្លោះនេះដែរឬទេ? តើភាពស្ងប់ស្ងាត់ នៅពេលនេះជាសញ្ញានៃការបញ្ចប់បញ្ហាពិតប្រាកដ ឬវាគ្រាន់តែជាការសម្ងំយកពិសដើម្បីបង្កើតព្រឹត្តិការណ៍ណាមួយផ្សេងទៀតនៅពេលខាងមុខ? សំណួរនេះក៏សំខាន់ណាស់ដែរ ដែលភាគីកម្ពុជាមិនគួរភ្លេចខ្លួនឡើយ។ សូមឲ្យខួបទី៦០ឆ្នាំនៃចំណងការទូតខ្មែរ និងថៃនៅពេលនេះក្លាយជានិមិត្តរូបនៃការផ្សះផ្សារវាងជាតិសាសន៍ទាំងពីរដ៏ពិតប្រាកដមួយ កុំបីក្លាយជាប្រការដទៃឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ