កម្ពុជាបដិសេធថាមិនបានបន្ទន់ឥរិយាបថរឿងអ្នកសង្កេតការណ៍ឥណ្ឌូនេស៊ី
ក្រសួងការពារជាតិកម្ពុជាបានបដិសេធថាខ្លួនមិនបានបន្ទន់ ឥរិយាបថណាមួយជាមួយភាគីថៃស្តីពីវត្តមានរបស់អ្នកសង្កេតការណ៍ ឥណ្ឌូនេស៊ីទេ។ ការបដិសេធនេះបានធ្វើឡើងបន្ទាប់ពីកាសែត Bangkok Post របស់ថៃបានផ្សាយកាលពីថ្ងៃសៅរ៍ម្សិលមិញថា រដ្ឋមន្ត្រីការពារជាតិកម្ពុជាបានព្រមព្រៀងជាមួយសមភាគីថៃថាវត្តមាន របស់អ្នកសង្កេតការណ៍ឥណ្ឌូនេស៊ីមិនចាំបាច់ទៀតឡើយ។ ប៉ុន្តែ អ្នកនាំពាក្យក្រសួងការពារជាតិកម្ពុជាបានបដិសេធចោលទាំងស្រុង ព័ត៌មាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
អ្នកនាំពាក្យក្រសួងការពារជាតិកម្ពុជាបានបដិសេធចោលទាំងស្រុងនូវព័ត៌មានដែលថាកម្ពុជាបានបន្ទន់ឥរិយាបថស្តីពីបញ្ហាអ្នកសង្កេតការណ៍ឥណ្ឌូនេស៊ី។ កាសែត Bangkok Post របស់ថៃបានចុះផ្សាយកាលពីថ្ងៃសៅរ៍ទី២០សីហាថា រដ្ឋមន្ត្រីការពារជាតិថៃ លោក យុទ្ធសាក់ សាស៊ីប្រាផា បានអះអាងថា រដ្ឋមន្ត្រីការពារជាតិកម្ពុជាបានយល់ព្រមអំពីភាពមិនចាំបាច់នៃវត្តមានរបស់អ្នកសង្កេតការណ៍ឥណ្ឌូនេស៊ីនៅតាមតំបន់ព្រំដែនកម្ពុជាថៃ។
ប៉ុន្តែ នៅក្នុងសេចក្តីថ្លែងការណ៍របស់ខ្លួនដែលចេញផ្សាយកាលពីព្រលប់ថ្ងៃសៅរ៍ម្សិលមិញ អ្នកនាំពាក្យក្រសួងការពារជាតិកម្ពុជាបានបញ្ជាក់ជំហរជូនសាធារណជនជាតិ និងអន្តរជាតិថា កម្ពុជាមិនបានងាកចេញពីស្មារតី និងនីតិវិធីនៃដីកាបង្គាប់របស់តុលាការយុត្តិធម៌អន្តរជាតិក្រុងឡាអេឡើយ។ តុលាការក្រុងឡាអេបានចេញដីកាបង្គាប់កាលពីថ្ងៃទី១៨កក្កដាឲ្យកងទ័ពកម្ពុជា និងថៃដកចេញពីតំបន់គ្មានយោធានៅជុំវិញប្រាសាទព្រះវិហារ។ តុលាការអន្តរជាតិនេះក៏បានស្នើឲ្យកម្ពុជានិងថៃអនុវត្តកិច្ចព្រមព្រៀងទាំងឡាយក្នុងក្របខណ្ឌអាស៊ានជាពិសេសទាក់ទងនឹងអ្នកសង្កេតការណ៍ឥណ្ឌូនេស៊ី។
ប៉ុន្តែ តាំងពីរដ្ឋាភិបាលរបស់អតីតនាយករដ្ឋមន្ត្រីអាភីស៊ីត វាចាជីវ៉ា មកម៉្លេះ ភាគីថៃបានព្យាយាមគេចវេះពីអ្នកសង្កេតការណ៍អាស៊ាន។ លោកយុទ្ធសាក់ សាស៊ីប្រាផា រដ្ឋមន្ត្រីការពារជាតិថ្មីថៃដែលតែងតាំងដោយរដ្ឋាភិបាលលោកស្រីយីងឡាក់ ស៊ីណាវ៉ាត្រាហាក់នៅតែបន្តយុទ្ធសាស្ត្រចាស់ដដែល។ ក្រោយពីឡើងកាន់តំណែងភា្លមកាលពីសប្តាហ៍កន្លងទៅ ប្រមុខដឹកនាំយោធាថៃរូបនេះបានប្រកាសថា កម្ពុជានិងថៃបានព្រមព្រៀងគ្នាហើយថា មិនចាំបាច់មានវត្តមានរបស់អ្នកសង្កេតការណ៍ឥណ្ឌូនេស៊ីទេប្រសិនបើភាគីទាំងពីរអាចដោះស្រាយបញ្ហាជាមួយគ្នាបាន។ លោកអះអាងថា បញ្ហានេះត្រូវបានស្នើឡើងដោយភាគីកម្ពុជាទៀតផង។
ប៉ុន្តែ មន្ត្រីរដ្ឋាភិបាលទីក្រុងភ្នំពេញបានបញ្ចេញប្រតិកម្មជាបន្តបន្ទាប់ដោយច្រានចោលការអះអាងរបស់រដ្ឋមន្ត្រីការពារជាតិថៃ។ ទោះជាយ៉ាងនេះក្តី កាសែត Bangkok Post បានលើកបញ្ហានេះមកចុះផ្សាយម្តងទៀតនៅចុងសប្តាហ៍នេះ។ ក្រសួងការពារជាតិកម្ពុជាក៏បានបដិសេធចោលម្តងទៀត។ ព្រឹត្តិការណ៍នេះបានបង្ហាញពីភាពមិនចុះសម្រុងគ្នាអំពីបញ្ហាព្រំដែនដែលហាក់នៅតែបន្តរវាងទីក្រុងភ្នំពេញ និងបាងកក បើទោះបីជាប្រទេសថៃប្តូររដ្ឋាភិបាលថ្មីហើយក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ