រដ្ឋាភិបាលឥណ្ឌូណេស៊ីសុខចិត្តបង់លុយជួយជីវិតស្រី្តមេផ្ទះម្នាក់ឲ្យរួចពីការប្រហារជីវិត
នៅក្នុងប្រទេសឥណ្ឌូណេស៊ី រដ្ឋាភិបាលទីក្រុងហ្សាការតាទើបបានប្រកាសឲ្យដឹងថា ខ្លួនយល់ព្រមបង់ប្រាក់ដើម្បីជួយសង្រ្គោះជីវិតស្រី្តមេផ្ទះឥណ្ឌូណេស៊ីម្នាក់ឲ្យរួចផុតពីការប្រហារជីវិតនៅក្នុងប្រទេសអារ៉ាប៊ីសាអូឌីត។ សូមជម្រាបជូនថា ស្រ្តីមេផ្ទះឥណ្ឌូណេស៊ីរូបនោះត្រូវបានតុលាការអារ៉ាប៊ីសាអូឌីតកាត់ទោសប្រហារជីវិតកាលពីឆ្នំា ២០១១ ពីបទលួចលុយ និងបានធ្វើឲ្យស្លាប់ស្រ្តីម្ចាស់ផ្ទះអារ៉ាប៊ីសាអូឌីតម្នាក់។
ចុះផ្សាយនៅថ្ងៃ៖
ស្តាប់ - ០២:២៧
គឺនៅប៉ុន្មានថ្ងៃទៀតខាងមុខនេះដែលស្រ្តីមេផ្ទះជនជាតិឥណ្ឌូណេស៊ីឈ្មោះ សាទីណា ប៊ីនទី យូម៉ាឌី អាម៉ាដនឹងត្រូវរដ្ឋអំណាចអារ៉ាប៊ីសាអូឌីតយកទៅប្រហារជីវិតចោលដោយកាត់ ក។ ស្រ្តីមេផ្ទះរូបនេះត្រូវបានតុលាការអារ៉ាប៊ីសាអូឌីតកាត់ទោសប្រហារជីវិតក្នុងឆ្នំា ២០១១ ពីបទលួចលុយ និងបានធ្វើឲ្យសម្លាប់ស្រ្តីម្ចាស់ផ្ទះដែលខ្លួនធ្វើជាអ្នកបម្រើ។ រឿងអាស្រូវជុំវិញស្រ្តីមេផ្ទះឥណ្ឌូណេស៊ីទទួលទោសប្រហារជីវិតរូបនេះត្រូវបានមធ្យោបាយឃោសនាមហាជនឥណ្ឌូណេស៊ីលើកយកមកនិយាយយ៉ាងខ្ចរខ្ចាយ។ បើយោងតាមច្បាប់អារ៉ាប៊ីសាអូឌីត គ្រួសារជនរងគ្រោះអាចទារសំណងជាលុយកាក់ប្តូរនឹងការប្រហារជីវិតជនជាប់ចោទ
ពីដំបូងឡើយ គ្រួសារជនរងគ្រោះអារ៉ាប៊ីសាអូឌីតបានទាមទារឲ្យស្រ្តីមេផ្ទះឥណ្ឌូណេស៊ីបង់ប្រាក់ចំនួនជិត ៤លានដុល្លារជាថ្នូរនឹងការប្រហារជីវិតចោល។ តែទីបំផុត ចំនួនទឹកលុយទាមទារបានធ្លាក់មកនៅត្រឹម ១លាន ៩សែនដុល្លារវិញ។ សម្រាប់គ្រួសារស្រ្តីមេផ្ទះ គឺមិនមានលទ្ធភាពបង់ឡើយ តែក្រុមអង្គការដែលរៀបចំបញ្ជូនពលករឥណ្ឌូណេស៊ីឲ្យទៅធ្វើការនៅបរទេសបាននំាគ្នារៃអង្គាសលុយបានតែ ១លានដុល្លារប៉ុណ្ណោះ ពោលគឺនៅខ្វះ ៩សែនដុល្លារទៀត។ គឺចំនួនដែលខ្វះនេះហើយដែលរដ្ឋាភិបាលឥណ្ឌូណេស៊ីបានប្រកាសថា ខ្លួនជាអ្នកចេញបង្រ្គប់ តាមសំណើរបស់គ្រួសារស្រ្តីមេផ្ទះ។ គួររម្លឹកជូនថា រដ្ឋាភិបាលទីក្រុងហ្សាការតាបានព្យាយាមជួយសង្រ្គោះស្រ្តីមេផ្ទះសាទីណាតំាងពីដំបូងទី ដោយបានជួយលើកពេលប្រហារជីវិតរូបស្រ្តីមេផ្ទះនោះចំនួន ៥ដង។
សូមបញ្ជាក់ជូនថា ទីក្រុងហ្សាការតា និងទីក្រុងរីយ៉ាដបានស្គាល់ភាពតានតឹងរវាងគ្នារួចហើយ តំាងពីមានការកាត់ ក ស្រ្តីមេផ្ទះឥណ្ឌូណេស៊ីម្នាក់ដែលបានទទួលស្គាល់ថា ខ្លួនពិតជាអ្នកសម្លាប់ថៅកែខ្លួនមែន។ ទង្វើរបស់អារ៉ាប៊ីសាអូឌីតកាលណោះបានធ្វើឲ្យឥណ្ឌូណេស៊ីក្តៅក្រហាយខ្លំាង ដោយបានទីក្រុងរីយ៉ាដថាមិនបានប្រាប់ឲ្យដឹងជាមុន។ តំាងពីពេលនោះមក រដ្ឋាភិបាលឥណ្ឌូណេស៊ីបានកាត់បន្ថយការបញ្ជូនប្រជាជនខ្លួនឲ្យទៅធ្វើការក្នុងប្រទេសអារ៉ាប៊ីសាអូឌីត។ គឺទើបតែនៅខែកុម្ភៈកន្លងទៅទេ ដែលឥណ្ឌូណេស៊ី និងអារ៉ាប៊ីសាអូឌីតបានចុះហត្ថលេខាលើកិច្ចព្រមព្រៀងមួយផ្តល់សិទ្ធិបន្ថែមឲ្យស្រ្តីមេផ្ទះឥណ្ឌូណេស៊ី។ សិទ្ធិបន្ថែមនោះមាន ការគោរពសិទ្ធិស្រ្តីមេផ្ទះ មិនត្រូវដកលិខិតឆ្លងដែនទុក ផ្តល់ប្រាក់ខែសមរម្យ និងទៀងទាត់ ផ្តល់ថ្ងៃឈប់សម្រាកប្រចំាខែ ព្រមទំាងពេលឈប់សម្រាកចំនួន ១ខែរៀងរាល់ ២ឆ្នំាម្តង។ ជាថ្នូរត្រឡប់វិញ ស្រ្តីមេផ្ទះត្រូវរៀនសូត្រសាសនាអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ