ឥណ្ឌូណេស៊ីអនុម័តច្បាប់ស្តីពីការធ្វើអាជីវកម្មថាមពលភ្នំភ្លើង
នៅថ្ងៃអង្គារនេះ សភាឥណ្ឌូណេស៊ីបានបោះឆ្នោតអនុម័តច្បាប់ស្តីពីការធ្វើអាជីវកម្មលើថាមពលភ្នំភ្លើង។ ច្បាប់នេះត្រូវបានគេរង់ចាំយូរណាស់មកហើយ ក្នុងប្រទេស ដែលសំបូរទៅដោយភ្នំភ្លើងមួយនេះ។ ប្រធានាធិបតី ស៊ូស៊ីឡូ បំបាំង យូដូយ៉ូណូ នឹងត្រូវចុះហត្ថលេខាលើច្បាប់នេះមួយដំណាក់កាលទៀត ទើបអាចអោយប្រើច្បាប់នេះក្នុងស្រុកបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ច្បាប់ស្តីពីការធ្វើអាជីវកម្មលើថាមពលភ្នំភ្លើង ដែលសភាឥណ្ឌូណេស៊ីអនុម័តនៅថ្ងៃអង្គារនេះ ត្រូវបានអ្នកវិនិយោគទន្ទឹងរង់ចាំយូរហើយ។ ដែនដីឥណ្ឌូណេស៊ីផ្គុំឡើងដោយកោះប្រមាណ១៧០០០ លាតសន្ធឹង ពី មហាសមុទ្រឥណ្ឌា ដល់មហាសមុទ្រប៉ាស៊ីហ្វិក។ ឥណ្ឌូណេស៊ីមានភ្នំភ្លើងដែលកំពុងសំងំ ក្រោមដី ប្រមាណ១៣០ សបង្ហាញថា ឥណ្ឌូណេស៊ីសំបូរធនធានកំដៅក្រោមដីដែលគេអាចចម្រាញ់ថាមពល យកទៅផលិតជាអគ្គិសនីប្រើប្រាស់បាន។
ក្នុងពេលរង់ចាំប្រើច្បាប់ស្តីពីអាជីវកម្មថាមពលភ្នំភ្លើងនេះ ឥណ្ឌូណេស៊ីប្រើប្រាស់តែថាមពលក្រោមដីមួយចំណែកតូចប៉ុណ្ណោះ ដើម្បីផលិតអគ្គិសនី។ ប្រៀបជាមួយហ្វីលីពីននិងសហរដ្ឋអាមេរិក សកម្មភាពផលិតអគ្គិសនីបានមកពីថាមពលភ្នំភ្លើង នៅមានកម្រិតតិចតួចណាស់។ ច្បាប់អាជីវកម្មថាមពលភ្នំភ្លើងនេះ នឹងជួយអភិវឌ្ឍន៍ឧស្សាហកម្មថាមពលក្រោមដី ដែលបានមកពីថាមពលភ្នំភ្លើងបន្ថែមទៀត។
ដើម្បីសម្រួលអាជីវកម្មទាញយកថាមពលកំដៅក្រោមដីមកប្រើប្រាស់ ខ្លឹមសារច្បាប់ស្តីពីអាជីវកម្មថាមពលភ្នំភ្លើងរបស់ឥណ្ឌូណេស៊ី ចែងថា ការធ្វើអាជីវកម្មថាមពលកំដៅក្រោមដី លែងត្រូវបានគេចាត់ទុកថា ជាអាជីវកម្មរ៉ែទៀតហើយ។ ឥណ្ឌូណេស៊ីសំបូរដោយព្រៃឈើ ជាចលករជំរុញអោយប្រទេសនេះកាន់តែមានសក្តានុពលផ្នែកកំដៅក្រោមដី។ ប៉ុន្តែ ដោយសារតែព្រៃឈើទាំងនោះ ត្រូវគេការពារ ហើយការធ្វើអាជីវកម្មរ៉ៃត្រូវគេហាមឃាត់ ឧស្សាហកម្មចម្រាញ់យកថាមពលកំដៅក្រោមដីមកប្រើប្រាស់ បានជួបការលំបាកច្រើន។ ឥណ្ឌូណេស៊ីមានរោងចក្រផលិតអគ្គិសនី ដែលប្រើថាមពលភ្នំភ្លើង នៅកោះចាវ៉ា។ រោងចក្រនេះសង់ឡើងក្នុងឆ្នាំ១៩៨០។ ប៉ុន្តែ បើចង់សង់រោងចក្រថ្មីដូច្នេះទៀត គេត្រូវការថវិកាសន្ធឹកសន្ធាប់ណាស់ គឺទ្វេដងប្រៀបនឹងរោងចក្រផលិតអគ្គិសនី បានមកពីថាមពលអុសធ្យូង។
ទោះយ៉ាងនេះក្តី ដើម្បីផលិតអគ្គិសនី ការប្រើថាមពលភ្នំភ្លើង បំពុលបរិស្ថានតិចជាងការប្រើថាមពលអុសធ្យូង។ ចាប់ពីឆ្នាំ២០០៥ រហូតដល់ឆ្នាំ២០២០ រដ្ឋាភិបាលឥណ្ឌូណេស៊ីមានគម្រោងកាត់បន្ថយឧស្ម័នផ្ទះកញ្ចក់អោយបាន២៦ភាគរយ ដូច្នេះ ប្រធានាធិបតីយូដូយ៉ូណូ ដែលត្រូវចប់អាណត្តិដឹកនាំប្រទេសនៅខែតុលាខាងមុខ អាចចុះហត្ថលេខាលើច្បាប់អាជីវកម្មលើថាមពលភ្នំភ្លើងក្នុងប្រទេស ក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ