ជប៉ុនផ្ទុះកំហឹងចំពោះដំណើរទស្សនកិច្ចរបស់ប្រធានាធិបតីរុស្ស៊ីនៅប្រជុំកោះគួរីល
នៅថ្ងៃចន្ទ ទី១ វិច្ឆិកា ២០១០នេះ លោកឌីមីទ្រី មេដវេដេវ (Dmitri Medvedev) ប្រធានាធិបតីរុស្ស៊ី បានធ្វើដំណើរទៅបំពេញទស្សនកិច្ចនៅប្រជុំកោះគួរីល (Kouriles) ដែលជាតំបន់ជប៉ុនកំពុងទាមទារ។ ដំណើរទស្សនកិច្ចនេះបានធ្វើគាស់កកាយឡើងវិញ នូវជម្លោះព្រំដែនដ៏រ៉ាំរ៉ៃរវាងជប៉ុន និងរុស្ស៊ី។ រដ្ឋាភិបាលជប៉ុនបានកោះហៅឯកអគ្គរដ្ឋទូតរុស្ស៊ីប្រចាំទីក្រុងតូក្យូ ដើម្បីជាការតវ៉ា។
ចុះផ្សាយនៅថ្ងៃ៖
បទវិភាគរបស់ សេង ឌីណា
ប្រជុំកោះគួរីល មានកោះសរុបទាំងអស់ ៥៦ ស្ថិតនៅជាប់ៗគ្នាជាខ្សែបន្ទាត់លាតសន្ធឹងពីជ្រោយកាំឆាត់កា (Kamtchatka) របស់រុស្ស៊ី រហូតដល់កោះហុកកៃដូ (Hokkaido) របស់ជប៉ុន ដោយមានប្រវែងសរុប ប្រមាណ ១៣០០គីឡូម៉ែត្រ។ នៅមុនសង្រ្គាមលោកលើកទី២ ជប៉ុនជាអ្នកកាន់កាប់ប្រជុំកោះគួរីលទាំងមូល។ ក្រោយពីជប៉ុនចាញ់សង្រ្គាម រុស្ស៊ី (ពេលនោះជាសហភាពសូវៀត) បានលើកទ័ពមកវាយដណ្តើមយកគួរីលទៅកាន់កាប់ទាំងអស់។ ប៉ុន្តែ ជប៉ុនទាមទារយកកោះ ៤ ក្នុងចំណោមកោះទាំង ៥៦ នៅគួរីលមកវិញ។
នៅក្នុងអំឡុងសង្រ្គាមត្រជាក់ ប្រជុំកោះគួរីល គឺជាទីតាំងយុទ្ធសាស្រ្តដ៏សំខាន់មួយរបស់សហភាពសូវៀត។ ដោយសារតែមានគួរីលនេះហើយ ទើបសហភាពសូវៀតអាចដាក់ទ័ព នៅក្បែរដែនដីជប៉ុន ដែលជាសម្ព័ន្ធមិត្តរបស់សហរដ្ឋអាមេរិក។ ក្រោយពីសង្រ្គាមត្រជាក់បានបញ្ចប់ទៅ តម្លៃជាយុទ្ធសាស្រ្តនៃកោះទាំងនេះ ក៏បានថមថយទៅវិញ។ ក៏ប៉ុន្តែ ប្រជុំកោះនេះនៅតែជាប្រធានបទនៃជម្លោះរវាងរុស្ស៊ី និងជប៉ុន។
ចាប់តាំងពីក្រោយសង្រ្គាមលោកលើកទី២ មក លោកមេដវេដេវ គឺជាប្រធានាធិបតីរុស្ស៊ីទីមួយ ដែលធ្វើដំណើរទៅប្រជុំកោះគួរីល ហើយថែមទាំងទៅដល់កោះ ដែលជប៉ុនកំពុងតែទាមទារទៀត។ ហេតុដូច្នេះហើយបានជាជប៉ុនបញ្ចេញប្រតិកម្មតបតវិញខ្លាំងៗ នៅពេលនេះ។
នៅព្រឹកថ្ងៃចន្ទនេះ នាយករដ្ឋមន្រ្តីជប៉ុនបានបញ្ជាក់ម្តងទៀតអំពីជំហរជប៉ុន ដែលថា កោះចំនួន ៤ នៅគួរីល គឺជាផ្នែកមួយនៃដែនដីរបស់ជប៉ុន ហើយដំណើរទស្សនកិច្ចរបស់លោកមេដវេដេវ បានធ្វើឲ្យប៉ះទង្គិចយ៉ាងខ្លាំងដល់ផ្លូវចិត្តរបស់ប្រជាជនជប៉ុន។ យោងតាមទីភ្នាក់ងារព័ត៌មានជប៉ុន ក្រសួងការបរទេសជប៉ុនបានកោះហៅឯកអគ្គរដ្ឋទូតរុស្ស៊ីប្រចាំក្រុងតូក្យូ ដើម្បីធ្វើការតវ៉ាចំពោះដំណើរទស្សនកិច្ចរបស់លោកមេដវេដេវ។
ជម្លោះព្រំដែន គឺជាឧបសគ្គរារាំងរុស្ស៊ី និងជប៉ុន មិនឲ្យចុះសន្ធិសញ្ញាសន្តិភាពជាមួយគ្នា ចាប់តាំងពីចប់សង្រ្គាមលោកលើកទី២ រហូតមកទល់ពេលនេះ។ បើទោះជាប្រទេសទាំងពីរមានទំនាក់ទំនងជាមួយគ្នា ទាំងផ្នែកការទូត និងផ្នែកសេដ្ឋកិច្ច ក៏ប៉ុន្តែ ភាពតានតឹងតែងតែកើតមានឡើងជារឿយៗ ដោយសារតែបញ្ហាប្រជុំកោះគួរីលនេះ។
ការចរចារជុំវិញប្រជុំកោះគួរីលនេះ ធ្លាប់ត្រូវបានបើកធ្វើជាច្រើនលើក រវាងរុស្ស៊ី និងជប៉ុន។ លោកបូរីស យែលស៊ីន (Boris Yeltsin) ប្រធានាធិបតីរុស្ស៊ី ក្រោយពីសហភាពសូវៀតដួលរលំ ធ្លាប់ចង់ប្រគល់កោះទាំង ៤ ឲ្យទៅជប៉ុន តាមការទាមទារដែរ។ ក៏ប៉ុន្តែ ដោយមានការប្រឆាំងយ៉ាងខ្លាំងក្លា ពីសំណាក់ចលនាអ្នកជាតិនិយមរុស្ស៊ី ទើបលោកយែលស៊ីនបោះបង់គំនិតប្រគល់គួរីលឲ្យជប៉ុន។
ក្នុងការចរចាក្រោយៗមកទៀត រុស្ស៊ីចង់សម្រុះសម្រួលជាមួយជប៉ុន ដោយសុខចិត្តប្រគល់កោះពីរ ក្នុងចំណោមកោះទាំង ៤ ដែលជប៉ុនទាមទារ។ ក៏ប៉ុន្តែ ជប៉ុនមិនសុខចិត្ត ដោយទាមទារយកកោះទាំង ៤។ ការចរចាក៏ជាប់គាំងរហូតមកទល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ