រុស្ស៊ីប្តឹង ជប៉ុនមិនទទួលស្គាល់, រុស្ស៊ីតវ៉ា ជប៉ុនច្រានចោល
ទំនាក់ទំនងរវាងទីក្រុងម៉ូស្គូនិងតូក្យូ ដែលបន្តតានតឹង ដោយមកពីបញ្ហាដែនដីជាប់វិវាទ គឺ “កោះ៤នៃជួរកោះគួរីលខាងត្បូង” ដែលម្ខាងៗចាត់ទុកជារបស់ខ្លួន ឥឡូវ ស្រាប់តែឆ្លងទៅក្នុងផ្ទៃនីតិវិធី ដ្បិតតាមយោបល់ម៉ូស្គូ ការដែលពួកជាតិនិយមជប៉ុនបានដុតទង់ជាតិរុស្ស៊ី ដើម្បីទាមទារកោះនោះទៅវិញ គឺជា “បទឧក្រិដ្ឋ” ប៉ុន្តែ តាមយោបល់តូក្យូ ទង្វើនេះ “ឥតល្មើសច្បាប់ទេ”។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីម៉ូស្គូ
រសៀលថ្ងៃ២មីនាម្សិលមិញ ភារធារីស្ថានទូតជប៉ុននៅម៉ូស្គូ លោក Keiji Ide បានត្រូវកោះអញ្ជើញទៅកាន់ក្រសួងការបរទេសរុស្ស៊ី ជាទីដែលភាគីរុស្ស៊ីបានធ្វើសេចក្តីថ្លែងការណ៍តវ៉ាទៅអ្នកការទូតជប៉ុននេះថា រុស្ស៊ីប្រឆាំងនឹងការដែលអាជ្ញាធរជប៉ុនពុំព្រមចងក្រងជាសំណុំរឿងព្រហ្មទណ្ឌ ទល់នឹងពួកជាតិនិយមជ្រុលជប៉ុនមួយក្រុម ដែលកាលពីថ្ងៃ៧កុម្ភៈកន្លងទៅ បានប្រមាថលើកេតនភណ្ឌរបស់រដ្ឋរុស្ស៊ី ដោយបានប្រញាយគ្នាហែកទង់ជាតិរុស្ស៊ីទាំងចងកំហឹង ហើយដុតវាចោលតែម្តង នៅពីមុខស្ថានទូតរុស្ស៊ី ក្នុងក្រុងតូក្យូ។
រុស្ស៊ីទាមទារឲ្យ “ធ្វើការស៊ើបអង្កេតសាឡើងវិញដើម្បីកំណត់ទោសពិរុទ្ធ និងដាក់ទណ្ឌកម្មពួកយូកូមទាំងនោះ។ ឥរិយាបថទន់ជ្រាយរបស់អាជ្ញាធរជប៉ុន ចំពោះពួកយូកូមជាតិនិយមគឺមានន័យថា បើកដៃបណ្តោយឲ្យពួកវាប្រព្រឹត្តទង្វើបែបនេះទៀតទៅអនាគត”។ ការតវ៉ានេះរបស់រុស្ស៊ីបន្លឺឡើង គឺបន្ទាប់ពីក្រុងតូក្យូមិនចាត់ទុកសកម្មភាពពួកជាតិនិយមនោះថាជាឧក្រិដ្ឋកម្មអ្វីណាទេ។ មិនតែប៉ុណ្ណោះ ទីក្រុងតូក្យូបានបញ្ចេញប្រតិកម្មភ្លាមភ្លែត នៅព្រឹកថ្ងៃព្រហស្បតិ៍នេះ ដោយច្រានចោលការតវ៉ាពីខាងក្រុងម៉ូស្គូ ក្រោមទឡ្ហីករណ៍ថា ជប៉ុនជារដ្ឋប្រជាធិបតេយ្យ និងជាទីដែលពលរដ្ឋមានសេរីភាពបង្ហាញពីគោលជំហរខ្លួន។
សំរាប់ជាការកត់សំគាល់ រៀងរាល់ឆ្នាំ ថ្ងៃ៧កុម្ភៈ តែងត្រូវពួកជាតិនិយមជប៉ុនប្រារព្ធជាទិវានឹកចងចាំដល់កោះទាំង៤នោះ ក្នុងឋានៈជា “ទឹកដីប៉ែកខាងជើងបង្អស់របស់ជប៉ុន” ពីព្រោះ ពិតជាថ្ងៃ៧កុម្ភៈនេះឯង ដែលស្របនឹង “សន្ធិសញ្ញាទ្វេភាគីចុះក្នុងឆ្នាំ១៨៥៥ ស្តីអំពីពាណិជ្ជកម្ម និងព្រំដែន” ស្តេច Tsar រុស្ស៊ី បានផ្ទេរ “កោះគួរីលបួននៅខាងត្បូងនោះ” ដែលស្ថិតនៅជិតនឹងជប៉ុនជាង ឲ្យទៅអាណាចក្រជប៉ុនតែម្តង។ ប៉ុន្តែ ៩០ឆ្នាំក្រោយមក គឺជំនាន់សហភាពសូវៀត នាសន្និសីទនៃ៣មហាអំណាច នៅក្រុងYalta ក្នុងខែកុម្ភៈឆ្នាំ១៩៤៥ មេដឹកនាំសូវៀត Staline បានចងជាល័ក្ខខ័ណ្ឌ ទៅប្រធានាធិបតីអាមេរិកាំង Roosevelt និងនាយករដ្ឋមន្ត្រីអង់គ្លេស Churchill ថា ទីក្រុងម៉ូស្គូសុខចិត្តចូលខ្លួនច្បាំងទល់នឹងជប៉ុនដែរ លុះណាតែក្រោយពីជប៉ុនចាញ់សង្គ្រាម “កោះគួរីលទាំងបួននោះ” ត្រូវផ្ទេរមកដាក់ក្រោមអធិបតេយ្យរុស្ស៊ីវិញ។ នៅថ្ងៃទី២កញ្ញាឆ្នាំ១៩៤៥ របបយោធានិយមជប៉ុនក៏បានចុះហត្ថលេខាសុំចុះចាញ់មែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ