ទីក្រុងតូក្យូ និងព្យុងយ៉ាងបានព្រមព្រៀងជួបគ្នាជាថ្មីថ្នាក់រដ្ឋាភិបាល
នៅថ្ងៃព្រហស្បតិ៍ ទី២០ មីនានេះ ប្រទេសជប៉ុន និងកូរ៉េខាងជើងបានយល់ព្រមបើកជំនួបចរចាជាថ្មីរវាងរដ្ឋាភិបាល និងរដ្ឋាភិបាល នេះជាការបញ្ជាក់របស់អ្នកទទួលខុសត្រូវជប៉ុនម្នាក់។ ការសម្រេចនេះត្រូវបានអនុម័តដោយអ្នកការទូតនៃប្រទេសទំាងពីរ នាឱកាសកិច្ចប្រជុំរវាងតំណាងកាកបាទក្រហមជប៉ុន និងកូរ៉េខាងជើងក្នុងស្រុក Shenyang ប្រទេសចិនកាលពីថ្ងៃពុធ និងថ្ងៃព្រហស្បតិ៍ ទី២០ មីនានេះ។ តែនៅមិនទាន់ដឹងថា តើជំនួបជាថ្មីថ្នាក់រដ្ឋាភិបាលនោះនឹងគ្រោងធ្វើនៅពេលណាទេ។
ចុះផ្សាយនៅថ្ងៃ៖
ស្តាប់ - ០១:៥៥
កិច្ចប្រជុំចុងក្រោយថ្នាក់រដ្ឋាភិបាលនៃប្រទេសទំាងពីរបានធ្វើឡើងកាលពីខែវិច្ឆិកា ឆ្នំា ២០១២ ហើយតាមគម្រោង ភាគីទំាងពីរត្រូវបន្តជួបគ្នាជាថ្មីនៅក្នុងខែធ្នូ ឆ្នំាដដែលក្នុងទីក្រុងប៉េកំាង ប្រទេសចិន។ តែគម្រោងជំនួបនោះត្រូវបានភាគីជប៉ុនលប់ចោលភ្លាមៗ បន្ទាប់ពីកូរ៉េខាងជើងបានប្រកាសពីគម្រោងបាញ់សាកល្បងគ្រាប់មីស៊ីលជាថ្មី។ ក្នុងខែមេសា ឆ្នំា ២០១៣ និងបន្ទាប់ពីជប៉ុនបានប្រកាសដំឡើងប្រព័ន្ធខែលមីស៊ីលប្រឆំាងមីស៊ីលដើម្បីស្ទាក់កម្ទេចគ្រាប់កំាជ្រួចរបស់កូរ៉េខាងជើងមក ទីក្រុងព្យុងយ៉ាងក៏បានគំរាមវាយប្រហារទីក្រុងតូក្យូដោយប្រើអាវុធនុយក្លេអ៊ែរ។ បន្ទាប់មកក្នុងខែកុម្ភៈកន្លងទៅថ្មីៗនេះ របបកុម្មុយនិស្តក្រុងព្យុងយ៉ាងថែមទំាងបានប្រដូចលោកនាយករដ្ឋមន្រ្តីជប៉ុនស៊ីនហ្សូ អាបេជា « ហ៊ីតត្លែរអាស៊ី » ទៀតផង។
គឺរឿងរ៉ាវទំាងអស់ខាងលើនេះហើយដែលបានធ្វើឲ្យជំនួបរវាងប្រទេសទំាងពីរជាប់គំាងមកដល់ពេលនេះ។ គឺទើបតែនៅថ្ងៃទី៤ មីនាកន្លងទៅទេ ដែលតំណាងកាកបាទក្រហម និងអ្នកទទួលខុសត្រូវនៃប្រទេសទំាងពីរបានជួបគ្នាជាថ្មី។ នៅក្នុងជំនួបនោះ គេបានលើកឡើងពីដំណើរទៅកាន់ទឹកដីកូរ៉េខាងជើងរបស់ក្រុមគ្រួសារជប៉ុនដើម្បីពិនិត្យផ្នូរសពឱពុក ម្តាយរបស់ពួកគេដែលបានស្លាប់ក្នុងទឹកដីកូរ៉េកាលពី ១០ឆ្នំាមុន។
គួរជម្រាបជូនថា កូរ៉េខាងជើង និងជប៉ុនមិនមានទំនាក់ទំនងផ្លូវទូតរវាងគ្នាទេ។ តែជប៉ុនតែងតែជម្រុញកូរ៉រខាងជើងឲ្យដោះស្រាយបញ្ហាចំណាប់ខ្មំាងជប៉ុនដែលទាហានកូរ៉េខាងជើងបានចាប់ក្នុងសម័យសង្រ្គាមត្រជាក់។ សម្រាប់ទីក្រុងតូក្យូ គឺសំណុំរឿងនេះហើយដែលជាឧបសគ្គចម្បងក្នុងការភ្ជាប់ទំនាក់ទំនងផ្លូវទូតរវាងប្រទេសទំាងពីរ។ តែទីក្រុងព្យុងយ៉ាងធ្លាប់បានអះអាងជារឿយៗថា បញ្ហាចំណាប់ខ្មំាងជប៉ុនទំាង ១៣នាក់ត្រូវបានដោះស្រាយចប់សព្វគ្រប់អស់ហើយ ជាមួយនឹងការបញ្ជូនចំណាប់ខ្មំាងជប៉ុនចំនួន ៥នាក់ទៅឲ្យជប៉ុនវិញ និង ៨នាក់ផ្សេងទៀតបានស្លាប់អស់ហើយ។ តែទីក្រុងតូក្យូដែលគិតថា ចំណាប់ខ្មំាងជប៉ុនមានយ៉ាងតិច ១៧នាក់នោះ មិនជឿការពន្យល់បកស្រាយរបស់ក្រុងព្យុងយ៉ាងដោយគ្មានភស្តុតាងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ