រដ្ឋាភិបាលជប៉ុនបញ្ចេញនយោបាយថ្មីទាក់ទងថាមពលនុយក្លេអ៊ែរ
ជប៉ុនសម្រេចផ្តល់សារៈសំខាន់ជាថ្មីទៀត ដល់វិស័យនុយក្លេអ៊ែរ។ ៣ឆ្នាំក្រោយមហន្តរាយនៃរលកយក្សស៊ូណាមី ដែលបានបង្កការខូចខាតធ្ងន់ធ្ងរនៅមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ា នៅថ្ងៃសុក្រនេះ រដ្ឋាភិបាលជប៉ុនបានដាក់ចេញនូវនយោបាយមួយថ្មីទៀតទាក់ទងថាមពលនុយក្លេអ៊ែរ។ ក្នុងគម្រោងនយោបាយថ្មីនេះ ជប៉ុនលើកឡើងថា នុយក្លេអ៊ែរជាប្រភពសំខាន់នៃថាមពលគ្រឹះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
នៅក្រុងតូក្យូ ថ្ងៃសុក្រនេះ រដ្ឋាភិបាលជប៉ុនបានបញ្ចេញគម្រោងនយោបាយថ្មីមួយទាក់ទងនឹងថាមពលនុយក្លេអ៊ែរ សំដៅអោយជប៉ុនគិតគូរឡើងវិញនូវមជ្ឈមណ្ឌលនុយក្លេអ៊ែរនានា ដែលបានបិទទ្វារក្រោយការវាយប្រហាររបស់រលកយក្សស៊ូណាមី ក្នុងខែមិនា ឆ្នាំ២០១១។ គម្រោងនយោបាយថាមពលថ្មីនេះ ចាត់ទុកនុយក្លេអ៊ែរជាប្រភពសំខាន់នៃថាមពលគ្រឹះ។ ប៉ុន្តែ ដើម្បីស្រោចស្រង់ផ្នែកនុយក្លេអ៊ែរ គម្រោងនយោបាយនេះ ប្រហែលជាយឺតពេលហើយ ព្រោះថា ដោយសាររលកយក្សស៊ូណាមី នុយក្លេអ៊ែរជប៉ុនបានរងការខូចខាតធ្ងន់ធ្ងរ គិតជាទឹកប្រាក់ មានដល់៣៥ពាន់លានអឺរ៉ូ ឯណោះ។
ក្នុងចំណោមប្រតិករនុយក្លេអ៊ែរសរុប៤៨ ដែលជប៉ុនបានបញ្ឈប់អោយប្រើការនោះ ប្រតិករនុយក្លេអ៊ែរប្រមាណ៣២គ្រឿង ពោលគឺ២ភាគ៣ ប្រហែលជានៅតែមិនអាចបើកដំណើរការឡើងវិញទេ ព្រោះថា ក្នុងការដាក់ដំណើរការ ជប៉ុនត្រូវចាយវាយថវិកាលើសលុប ដើម្បីរៀបចំផ្នែកសុវត្ថិភាពសន្តិសុខអោយបានត្រឹមត្រូវ។
ដោយឡែក រដ្ឋាភិបាលជប៉ុនក៏បានគិតគូរដល់ថាមពលគ្រឹះ ដែលគេអាចយកចេញពីធ្យូងថ្ម និងធារាសាស្ត្រអគ្គិសនីផងដែរ។ យោងតាមរដ្ឋមន្ត្រីឧស្សាហកម្ម លោកតូស្ហ៊ីមីតស៊ូ ម៉ូតេជី ជប៉ុនក៏មានទិសដៅអភិវឌ្ឈន៍ថាមពលមិនចេះសាបសូន្យផងដែរ ដើម្បីកាត់បន្ថយការពឹងផ្អែកលើនុយក្លេអ៊ែរ។ គម្រោងនយោបាយថ្មីរបស់រដ្ឋាភិបាល មានទិសដៅប្រើថាមពលមិនចេះសាបសូន្យ អោយបានលើសពីគម្រោងកន្លងមក ពោលគឺលើសពី១៤១ពាន់លាន៤សែនគីឡូវ៉ាត់ ពីពេលនេះ រហូតដល់ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ