ជប៉ុនរកឃើញវិធីធ្វើវិភាគ៣០នាទី រកឃើញមេរោគអេបូឡា
ក្រុមអ្នកស្រាវជ្រាវវេជ្ជសាស្ត្រជប៉ុន បានប្រកាស ប្រាប់ភ្នាក់ងារសារព័ត៌មានបារាំង AFP នៅថ្ងៃអង្គារទី២កញ្ញានេះ រកឃើញវិធីសាស្ត្រថ្មី ដែលអាចចាប់វត្តមានវីរ៉ុសអេបូឡា ក្នុងខ្លួនអ្នកជំងឺ ដោយចំណាយពេលតែកន្លះម៉ោងប៉ុណ្ណោះ។ ជាមួយនឹងបច្ចេកវិទ្យាថ្មីនេះ គេអាចធ្វើវិនិច្ឆ័យរកសញ្ញារោគជំងឺអេបូឡាបានឆាប់ ដូច្នេះគេក៏អាចទប់ស្កាត់ការឆ្លងរាតត្បាតនៃជំងឺនេះបានប្រកបដោយប្រសិទ្ធិភាពជាងពេលបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោកសាស្ត្រាចារ្យ Jiro Yasuda និងក្រុមការងារនៅសាកលវិទ្យាល័យណាហ្កាសាគី បានអះអាងថា វិធីសាស្ត្រថ្មីនៃដំណើរការស្វែងរកមេរោគអេបូឡានេះ មិនត្រឹមតែមានប្រសិទ្ធិភាព ដោយចំណាយពេលអស់ខ្លីបំផុតប៉ុណ្ណោះទេ ប៉ុន្តែថែមទាំងមានតម្លៃថោកជាងប្រព័ន្ធដែលដាក់ឱ្យប្រើប្រាស់ក្នុងបណ្តាប្រទេស មានការរាតត្បាតរោគអេបូឡា នៅអាហ្វ្រិកខាងលិចទៅទៀត។
អ្នកស្រាវជ្រាវជប៉ុន បានសម្រេចរកឃើញវិធីថ្មីនេះ ហៅតាមបែបជីវវិទ្យាថា Amorce ដែលអាចពង្រីកខ្លួនតែជាមួយនឹងវត្តមាននៃហ្សែនពិសេសរបស់វីរ៉ុសអេបូឡាប៉ុណ្ណោះ នៅពេលមានកម្តៅត្រឹមពី៦០ទៅ៦៥អង្សារ។ ប្រសិនបើឈាមមានវីរ៉ុសអេបូឡា នោះអាដេអិនពិសេសនឹងពង្រីកខ្លួនក្នុងរយៈពេល៣០នាទី តែបើគ្មានអេបូឡាទេ សារធាតុរាវនឹងឡើងល្អក់ ដែលអាចបញ្ជាក់បានដោយភ្នែកទទេ។
វិធីសាស្ត្រដែលគេប្រើនាពេលបច្ចុប្បន្ននេះ មានឈ្មោះថាប្រតិកម្មជាខ្សែ ប៉ូលីម៉េរ៉ាស ឬPCR ដែលទាមទារពេលវេលាពីមួយទៅពីម៉ោង និងត្រូវការសម្ភារៈបរិក្ខារពិសេស ដើម្បីវិភាគហ្សែនមួយ ជាច្រើនលើកច្រើនសាបន្តបន្ទាប់គ្នាទើបអាចទាញយកព័ត៌មានមកបូកសរុបការវិភាគបាន។ ឯរបបគំឃើញរបស់គ្រូពេទ្យជប៉ុន ត្រូវការតែឧបករណ៍កម្តៅមួយប្រើដោយថ្មពិល មានតម្លៃត្រឹមមួយរយពីររយដុល្លារ ដែលប្រទេសជឿនលឿនអាចទិញបានយ៉ាងងាយ។
បើតាមប្រសាសន៍លោកសាស្ត្រាចារ្យ យ៉ាស៊ូដា ពុំទាន់មានប្រទេសណាបញ្ជាទិញឧបករណ៍ធ្វើតេស្ត៍អេបូឡាលោកនៅឡើយទេ ប៉ុន្តែលោករីករាយនឹងជូនជាអំណោយ នៅពេលផលិតរួច។ អេបូឡា រោគឆ្លងតាមវត្ថុរាវចេញពីខ្លួនមនុស្សបានបង្កជំងឺរាតត្បាត ដូចពិភពលោកទាញសញ្ញាអាសន្ន។ អង្គការសុខភាពពិភពលោកបានរាប់ឃើញមានស្លាប់១៥៥២នាក់ ក្នុងចំណោមអ្នកមានផ្ទុកមេរោគអេបូឡាទាំង៣០៦៩នាក់នៅលីបេរីយ៉ា ហ្គីណេ សៀរ៉ាឡេអូន នីហ្សេរីយ៉ា និងម្នាក់នៅសេណេហ្កាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ