ជប៉ុនមិនព្រងើយកន្តើយចំពោះការគំរាមកំហែងរបស់កូរ៉េខាងជើងទេ
កូរ៉េខាងជើងបាននិងកំពុងបន្តគំរាមកំហែងបងប្អូនបង្កើតគូសត្រូវរបស់ខ្លួន គឺកូរ៉េខាងត្បូង។ បន្ទាប់ពីបានប្រកាសថា ខ្លួនកំពុងស្ថិតក្នុងស្ថានភាពសង្រ្គាមជាមួយទីក្រុងសេអ៊ូលមក ឥឡូវនេះ ទីក្រុងព្យុងយ៉ាងបានគំរាមបិទតំបន់ឧស្សាហកម្ម Kaesong នៅតាមបណ្តោយព្រំដែនដែលជាតំបន់នៃកិច្ចសហប្រតិបត្តិការសេដ្ឋកិច្ច និងឧស្សាហកម្មរវាងគ្នា។ ក្រៅពីកូរ៉េខាងត្បូងដែលបានចាត់ទុកការគំរាមកំហែងរបស់កូរ៉េខាងជើងថា មិនជារឿងធំដុំនោះ សហគមន៍អន្តរជាតិជាទូទៅមិនបានមើលស្រាលចំពោះបញ្ហានេះទេ។ ជាក់ស្តែងប្រទេសជប៉ុនដែលបានបញ្ជាក់ថា ការគំរាមកំហែងរបស់កូរ៉េខាងជើងនារយៈពេលចុងក្រោយនេះ ហាក់ដូចជាមានលក្ខណៈខុសប្លែកច្រើន បើធៀបនឹងការគំរាមកំហែងលើកមុនៗ។
ចុះផ្សាយនៅថ្ងៃ៖
ស្តាប់ - ០១:៥៤
សម្រាប់ប្រទេសជប៉ុន ការគំរាមកំហែងរបស់កូរ៉េខាងជើងជាបន្តបន្ទាប់ក្នុងរយៈពេលចុងក្រោយនេះ គឺជាកាយវិការមួយដែលហាក់ដូចជាបានឃ្លាតឆ្ងាយពីទម្លាប់ធម្មតារបស់ខ្លួន មានន័យថា ហាក់ដូចជាមានលក្ខណៈប្រាកដប្រជាដែលគេមិនគួរធ្វើព្រងើយកន្តើយទេ។ បច្ចុប្បន្ននេះ ថ្នាក់ដឹកនំាជាន់ខ្ពស់នៃក្រសួងការពារជាតិជប៉ុនបានប្រកាសទទួលស្គាល់ពីការចម្រើនទៅមុខជាលំដាប់នៃបច្ចេកវិទ្យាគ្រាប់មីស៊ីលរបស់កូរ៉េខាងជើង។ ក្រសួងការពារជាតិជប៉ុនបានបន្ថែមថា ពិភពលោកពិតជាច្រឡំធំហើយដែលបានមើលស្រាលកូរ៉េខាងជើង នៅពេលដែលរបបកុម្មុយនិស្តមួយនេះបានគំរាមវាយប្រហារមូលដ្ឋានយោធាអាមេរិកនៅក្នុងទីក្រុងអូគីណាវ៉ា ប្រទេសជប៉ុន និងនៅ Guam នោះ។
គេពិតជាចំាបានមិនភ្លេចទេថា កាលពីប្រមាណជា ១០ឆ្នំាមុន មានមីស៊ីលមួយគ្រាប់របស់កូរ៉េខាងជើងបានហោះរំលងដែនដីប្រទេសជប៉ុន ដោយគ្មានប្រព័ន្ធរ៉ាដាណាមួយចាប់បានទេ និងដែលកាលណោះ បានធ្វើឲ្យគ្រប់គ្នាភ្ញាក់ផ្អើល និងអ្នកដែលបានញាក់សាច់យ៉ាងខ្លំាងជាងគេ គឺជប៉ុនតែម្តង។ តំាងពីពេលនោះមក រដ្ឋាភិបាលជប៉ុនក៏បានសម្រេចដំឡើងប្រព័ន្ធខែលមីស៊ីលប្រឆំាងមីស៊ីលជាមួយសហរដ្ឋអាមេរិក ដោយបានចំណាយលុយរហូតដល់ទៅ ៥ ០០០លានដុល្លារ។ ប្រព័ន្ធខែលមីស៊ីលប្រឆំាងមីស៊ីលនេះបានដាក់ឲ្យដំណើរការតំាងពីកូរ៉េខាងត្បូង និងអាមេរិកបានផ្តើមសមយុទ្ធរវាងគ្នាមក។ សមយុទ្ធដែលចូលរួមដោយកម្លំាងទាហានប្រមាណជា ៤០ ០០០នាក់ ក្នុងនោះ ក៏មានការចូលរួមពីទាហានអាមេរិកំាងមួយភាគដែលមានមូលដ្ឋានក្នុងប្រទេសជប៉ុនដែរ។
អ្នកទទួលខុសត្រូវម្នាក់នៃក្រសួងការពារជាតិជប៉ុនបានបញ្ជាក់ថា ក្នុងរយៈពេលដែលទាហានកូរ៉េខាងត្បូង និងអាមេរិកកំពុងធ្វើសមយុទ្ធជាមួយគ្នា និងដែលគ្រោងបញ្ចប់នៅដំណាច់ខែមេសាខាងមុខនោះ កូរ៉េខាងជើងនឹងបន្តបញ្ចេញប្រតិកម្មគំរាម ព្រមទំាងជៀសវាងមិនទាក់ទងជាមួយសហរដ្ឋអាមេរិកទេ។ តែនេះមិនមែនមានន័យថា នៅក្រោយសមយុទ្ធរវាងទីក្រុងសេអ៊ូល និងវ៉ាស៊ីនតោន ទីក្រុងព្យុងយ៉ាងនឹងបញ្ឈប់ការបន្តផ្គើនសហគមន៍អន្តរជាតិដូចដែលគេធ្លាប់បានធ្វើជារឿយៗកន្លងមកនោះទេ។ ជាក់ស្តែង ការសាកល្បងនុយក្លេអ៊ែរជាលើកទី៤ ប្រកបដោយជោគជ័យនាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ