ក្រុមហ៊ុនតេបកូជប៉ុនជួបបញ្ហាក្នុងការបង្កកទឹកមានធាតុវិទ្យុសកម្ម នៅហ្វូគូស្ហ៊ីម៉ា
នៅថ្ងៃអង្គារនេះ ក្រុមហ៊ុនថាមពលអគ្គិសនីតេបកូ ដែលជាម្ចាស់មជ្ឈមណ្ឌលនុយក្លេអ៊ែរហ្វូគូស្ហ៊ីម៉ានៅជប៉ុន បានទទួលស្គាល់ថា ជួបបញ្ហាលំបាក ក្នុងការបង្កកទឹកមានធាតុវិទ្យុសកម្ម នៅមជ្ឈមណ្ឌល។ អាជ្ញាធរជប៉ុននិងក្រុមហ៊ុនតេបកូ ចង់ប្រើបច្ចេកទេសបង្កកទឹកមានធាតុវិទ្យុសកម្ម ដើម្បីទប់ចរន្តទឹកក្រោមដី នៅជុំវិញប្រតិករនុយក្លេអ៊ែរ មិនអោយទឹកហូរចូលសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ថ្ងៃអង្គារនេះ ក្រុមហ៊ុនតេបកូជប៉ុន បានទទួលស្គាល់ថា ក្នុងទិសដៅកាត់បន្ថយការរាលដាលធាតុវិទ្យុសកម្មទឹកក្រោមដី បច្ចេកទេសរបស់ក្រុមហ៊ុន ដើម្បីធ្វើជញ្ជាំងទឹកកក បង្កកទឹកជុំវិញប្រតិករនុយក្លេអ៊ែរ បានជួបបញ្ហា។ ក្រុមហ៊ុនពិបាកនឹងបញ្ចុះសីតុណ្ហភាពទឹកនៅគ្រប់ទីកន្លែង ដូច្នេះ ទឹកមានធាតុវិទ្យុសកម្មមិនបានកករឹង ក្លាយជាផ្ទាំងទឹកកក ដូចការគ្រោងទុក។ ក្នុងបច្ចេកទេសបង្កកនេះ ក្រុមហ៊ុនតេបកូ ដាក់ទុយយោជាច្រើនបញ្ឈរ។ ទុយយោទាំងនេះ មានផ្ទុកវត្ថុរាវសម្រាប់បង្កកនៅដី។ ប៉ុន្តែ ជញ្ជាំងទឹកកកមិនបានលេចរូបរាងដូចការគិតទុក។
គួររំលឹកដែរថា មុននឹងសាងសង់ជញ្ជាំងទឹកកកក្រោមដី មួយគីឡូម៉ែត្រកន្លះ នៅជុំវិញម៉ាស៊ីនប្រតិកម្មចំនួន៤ ដែលរងគ្រោះដោយរលកយក្សស៊ូណាមី ឆ្នាំ២០១១នោះ ក្រុមហ៊ុនថាមពលអគ្គិសនីជប៉ុន ក៏បានប្រើបច្ចេកទេសដូចគ្នានេះ សម្រាប់ប្រតិករនុយក្លេអ៊ែរទី២ដែរ ដើម្បីទប់ទឹកមិនអោយហូរចេញពីក្រោមដី ចូលសមុទ្រ។ កន្លងមក អ្នកជំនាញជាច្រើន ធ្លាប់គិតរួចហើយថា ការអនុវត្តន៍បច្ចេកទេសធ្វើជញ្ជាំងទឹកកកនេះ នឹងជួបការលំបាក ព្រោះថា ជញ្ជាំងទឹកកកក្នុងគម្រោងមានប្រវែងវែងគួរសម។
រលកយក្សស៊ូណាមីឆ្នាំ២០១១ បានធ្វើអោយប្រព័ន្ធបូមទកឹត្រជាក់នៅមជ្ឈមណ្ឌល ខូចខាត ជាហេតុធ្វើអោយរ៉េអាក់ទ័រនុយក្លេអ៊ែរ ដែលត្រូវការទឹកត្រជាក់ជាប្រចាំ កើនសីតុណ្ហភាពខ្ពស់ ធ្វើឲ្យរលាយស្នូលផ្ទុកសារធាតុនុយក្លេអ៊ែរ បណ្តាលអោយធាតុវិទ្យុសកម្មលេចធ្លាយមកក្រៅ។
ក្រុមហ៊ុនតេបកូបានប្រើទឹកត្រជាក់រាប់រយតោនរាល់ថ្ងៃ ដើម្បីបញ្ចុះសីតុណ្ហភាពស្នូលរ៉េអាក់ទ័រ។ ទឹកត្រជាក់ត្រូវបានលាយឡំជាមួយធាតុវិទ្យុសកម្ម នៃស្នូលរ៉េអាក់ទ័រ។ ក្រុមហ៊ុនបានសម្រេចផ្ទុកទឹកមានធាតុវិទ្យុសកម្មទាំងនេះ ក្នុងធុងទឹកធំៗ រាប់ពាន់។ ប៉ុន្តែ គុណភាពធុងមិនល្អ ធ្វើអោយទឹកលេចចេញពីធុង ជ្រាបចូល ប្រព័ន្ធទឹកក្រោមដី ហើយហូរចូលក្នុងសមុទ្ររៀងរាល់ថ្ងៃ។
ដោយសារការលេចធ្លាយធាតុវិទ្យុសកម្មក្នុងកម្រិតខ្ពស់ អាជ្ញាធរទទួលបន្ទុកផ្នែកសុវត្ថិភាពនុយក្លេអ៊ែរនៅជប៉ុន បានសម្រេចដំឡើងចំណាត់ថ្នាក់វិបត្តិនុយក្លេអ៊ែរ ពីកម្រិតទី១ ដល់កម្រិត ទី៣។ កម្រិតធ្ងន់ធ្ងរតាមបទដ្ឋានអន្តរជាតិមានដល់កម្រិតទី៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ