អ្នកកាសែត និងអ្នកទេសចរមិនត្រូវអនុញ្ញាតអោយឡើងប្រាសាទព្រះវិហារឡើយ
បញ្ហាសន្តិសុខត្រូវបានពង្រឹងកាន់តែខ្លាំងនៅថ្ងៃនេះ នៅលើកំពូលភ្នំប្រាសាទព្រះវិហារ និងនៅជុំវិញស្ថានទូតថៃក្នុងទីក្រុងភ្នំពេញ។ អ្នកទេសចរ និងអ្នកសារព័ត៌មានដែលកាលពីថ្ងៃអាទិត្យម្សិលមិញ អាចឡើងដល់លើកំពូលភ្នំនោះ នៅថ្ងៃចន្ទនេះ ពួកគេមិនត្រូវអនុញ្ញាតអោយឡើងលើភ្នំទៀតឡើយ។ ប្រធានអាជ្ញាធរជាតិព្រះវិហារ លោក ជុច ភឿន បានបញ្ជាក់ថា នេះជាវិធានការសន្តិសុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ខុសពីថ្ងៃអាទិត្យម្សិលមិញ ដែលអ្នកទេសចរត្រូវបានអនុញ្ញាតអោយឡើងទស្សនាប្រាសាទព្រះវិហារ នៅថ្ងៃចន្ទនេះ ក្រៅពីសមត្ថកិច្ចដែលមានតួនាទីបំពេញភារកិច្ចនៅលើកំពូលភ្នំនោះ ទាំងអ្នកទេសចរ និងអ្នកសារព័ត៌មានមិនត្រូវបានអនុញ្ញាតអោយឡើងទៅប្រាសាទព្រះវិហារទៀតឡើយ។
បទបញ្ជាថ្មីនេះ ត្រូវបានលោកជុច ភឿន ប្រធានអាជ្ញាធរជាតិព្រះវិហារពន្យល់ថា គឺដើម្បីសន្តិសុខ និងសុវត្ថិភាពរបស់អ្នកទេសចរ។ ប្រធានអាជ្ញាធរជាតិព្រះវិហារបន្តថា អ្នកទេសចរដែលបានទៅដល់តំបន់ព្រះវិហារហើយនោះ ត្រូវបានស្នើអោយទស្សនានៅត្រឹមសារៈមន្ទីរធម្មជាតិសម្តេចតេជោដែលមានទីតាំងនៅក្នុងឃុំទីប្រជុំជនស្រអែម ចំងាយ១៥គីឡូម៉ែត្រ មុនទៅដល់ភ្នំប្រាសាទព្រះវិហារ។
ការពង្រឹងបញ្ហាសន្តិសុខជារឿងដែលចៀសមិនរួច។ បើតាមការបញ្ជាក់របស់លោកជុច ភឿន មន្ត្រីអាជ្ញាធរជាតិព្រះវិហារត្រូវបានណែនាំអោយតាមដានការប្រកាសសាលដីការបស់តុលាការឡាអេ នៅរសៀលថ្ងៃនេះផង និងត្រូវត្រៀមលក្ខណៈទទួលបញ្ជាពីថ្នាក់លើ។
ប្រសិនបើគេសួរថា តើនៅពេលណាទើបអ្នកទេសចរ នឹងត្រូវអនុញ្ញាតអោយឡើងទស្សនាបេតិកភណ្ឌពិភពលោកវិញនោះ លោក ជុច ភឿនបានឆ្លើយថា សេចក្តីសម្រេចថ្មីនោះ នឹងត្រូវធ្វើឡើងតាមស្ថានភាពជាក់ស្តែង។
នៅឯក្នុងរាជធានីភ្នំពេញវិញ កំលាំងសមត្ថកិច្ចត្រូវបានបង្កើនដើម្បីការពារ និងរក្សាសន្តិសុខនៅជុំវិញស្ថានទូតថៃ។ ប៉ុន្តែ បើតាមការបញ្ជាក់របស់អ្នកនាំពាក្យក្រសួងការបរទេសកម្ពុជា លោកកុយ គួង រដ្ឋាភិបាលថៃក៏បានពង្រឹងសន្តិសុខនៅជុំវិញស្ថានទូតកម្ពុជា នៅក្នុងទីក្រុងបាងកកដូចគ្នាដែរ។ អ្នកនាំពាក្យដដែលបន្តថា នេះគឺជាវិធានការបង្ការមិនអោយមានករណីជាយថាហេតុអាចកើតឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ