កម្ពុជា

លោក កឹម សុខា សន្យាតម្លើងប្រាក់ខែកម្មករ ១៥០ ដុល្លារក្នុងមួយខែ

ក្នុងពិធីជួបជុំជាមួយកម្មករកាត់ដេរ នៅព្រឹកថ្ងៃអាទិត្យនេះ លោក កឹម សុខា ប្រធានគណបក្សសិទ្ធិមនុស្ស និងជាអនុប្រធានគណបក្សសង្គ្រោះជាតិដែលបានរួបរួមជាមួយលោកសមរង្ស៊ី បានប្រកាសសន្យាតម្លើងប្រាក់ខែកម្មកររហូតដល់ ១៥០ ដុល្លារ ប្រាក់ខែមន្ត្រីរាជការ ១ លានរៀល ដែលស្មើនឹង ២៥០ ដុល្លារ ហើយនិងផ្តល់ប្រាក់ខែដល់មនុស្សចាស់ៗ ចាប់ពីអាយុ ៦៥ ឆ្នាំឡើង ចំនួន ៤ ម៉ឺនរៀល ក្នុងមួយខែ។ សេចក្តីប្រកាសរបស់លោក កឹម សុខាដូច្នេះបានធ្វើឡើង ខណៈដែលកិច្ចប្រជុំចរចាតម្លើងប្រាក់ខែកម្មករកាត់ដេរនឹងធ្វើឡើងជាថ្មីម្តងទៀត នៅរសៀលថ្ងៃចន្ទ ទី១១មីនាស្អែក។

ចុះផ្សាយនៅថ្ងៃ៖ 10/03/2013 - 13:26

ដោយ៖ លី ម៉េងហួរ

ផ្សាយពាណិជ្ជកម្ម

នៅថ្ងៃទី២៨ កក្កដាខាងមុខ ជាថ្ងៃបោះឆ្នោតជាតិជ្រើសតាំងតំណាងរាស្ត្រ និងនាយករដ្ឋមន្ត្រីសម្រាប់អាណត្តិថ្មី។ ដើម្បីទទួលបានសន្លឹកឆ្នោតពីកម្មករ នៅព្រឹកថ្ងៃអាទិត្យនេះ លោក កឹម សុខា ប្រធានគណបក្សសិទ្ធិមនុស្ស និងជាអនុប្រធានគណបក្សសង្គ្រោះជាតិដែលជាសម្ព័ន្ធមិត្តនឹងលោកសមរង្ស៊ី បានប្រកាសថា បើសិនជាគណបក្សសង្គ្រោះជាតិឈ្នះការបោះឆ្នោត ហើយដឹកនាំរដ្ឋាភិបាលនោះ កម្មករកាត់ដេរនឹងទទួលបានប្រាក់ខែ ១៥០ ដុល្លារ ខណៈដែលកម្មករកាត់ដេរសព្វថ្ងៃទទួលបានត្រឹមតែ ៦១ ដុល្លារ។ រីឯប្រាក់ខែមន្ត្រីរាជការ គ្រូបង្រៀន និងប៉ូលិសទាហានជាដើមនឹងទទួលបាន ១ លានរៀល ឬ ២៥០ ដុល្លារ។ រដ្ឋាភិបាលរបស់គណបក្សសង្គ្រោះជាតិក៏នឹងផ្តល់ប្រាក់ខែដល់មនុស្សចាស់ ៤ម៉ឺនរៀលផងដែរ។

ក្នុងកិច្ចប្រជុំជាមួយក្រុមកម្មករកាត់ដេរដឹកនាំដោយលោក រ៉ុង ឈុន នៅព្រឹកថ្ងៃអាទិត្យនេះ នៅជាយទីក្រុងភ្នំពេញ ក្រៅពីលោក កឹម សុខា ក៏មានការចូលរួមពីលោកស្រី មូរ សុខហួរ និងលោក យឹម សុវណ្ណ អ្នកតំណាងរាស្ត្រ និងជាថ្នាក់ដឹកនាំគណបក្សសមរង្ស៊ី។ លោក កឹម សុខា បានលើកសរសើរយ៉ាងច្រើនពីវីរភាពរបស់លោក សម រង្ស៊ី ព្រមទាំងប្រកាសថា បើសិនជាគណបក្សសង្គ្រោះជាតិឈ្នះបោះឆ្នោតនៅខែកក្កដា នោះលោកសមរង្ស៊ីដែលកំពុងនិរទេស រស់នៅក្រៅប្រទេស ដើម្បីគេចពីការផ្តន្ទាទោស នឹងឡើងធ្វើជានាយករដ្ឋមន្ត្រី ហើយខ្លួនលោកផ្ទាល់នឹងធ្វើជាប្រធានរដ្ឋសភាដើម្បីត្រួតពិនិត្យការងាររបស់រដ្ឋាភិបាលឲ្យមានតុល្យភាពអំណាច។

ការសន្យារបស់គណបក្សប្រឆាំងលើការតម្លើងប្រាក់ខែមន្ត្រីរាជការ គ្រូបង្រៀន ត្រូវបានលោកនាយករដ្ឋមន្ត្រី ហ៊ុន សែន តែងតែចំអកឲ្យ ដោយថា ជាការសន្យាខ្យល់ មិនអាចធ្វើបានទេ។ តាមលោកនាយករដ្ឋមន្ត្រី រដ្ឋាភិបាលកម្ពុជាមានលទ្ធភាពត្រឹមតែតម្លើងប្រាក់ខែមន្ត្រីរាជការ ២០% ក្នុងមួយឆ្នាំប៉ុណ្ណោះ បើសិនជាតម្លើងប្រាក់ខែច្រើនពីនេះ នោះរដ្ឋាភិបាលនឹងជួបវិបត្តិថវិកា ដូចបណ្តាប្រទេសមួយចំនួននៅអឺរ៉ុបជាមិនខាន។

និយាយពីប្រាក់ខែកម្មករកាត់ដេរវិញ កិច្ចប្រជុំត្រីភាគី រវាងរាជរដ្ឋាភិបាល សហជីពកម្មករ និងថៅកែរោងចក្រ នឹងជួបចរចាជាថ្មីម្តងទៀត នៅរសៀលថ្ងៃចន្ទ ទី១១ ខែមីនា ឆ្នាំ២០១៣។ កិច្ចប្រជុំចរចាតម្លើងប្រាក់ខែកម្មករនៅថ្ងៃចន្ទ នៅក្រសួងសង្គមកិច្ចនឹងធ្វើឡើង បន្ទាប់ពីកិច្ចចរចាជាបន្តបន្ទាប់បានជាប់គាំង កាលពីចុងខែកុម្ភៈ។ ចុងក្រោយនេះ ភាគីថៅកែរោងចក្រកាត់ដេរបានព្រមព្រៀងតម្លើងប្រាក់ខែកម្មករ ពី ៦១ ដុល្លារ ទៅត្រឹមតែ ៧៥ ដុល្លារប៉ុណ្ណោះ។ រីឯភាគីសហជីពកម្មករកាត់ដេរបានបញ្ចុះការទាមទារតម្លើងប្រាក់ខែកម្មករជាង ៦ សែននាក់ ពី ១២០ ដុល្លារ មកនៅត្រឹម ៩១ ដុល្លារ៕