សហជីពទាមទារដំឡើងប្រាក់ខែអោយដល់១២០ដុល្លារ នៅថ្ងៃទិវាពលកម្មអន្តរជាតិ១ឧសភា
សហជីពនៅក្នុងប្រទេសកម្ពុជាមួយចំនួនទាមទារដំឡើងប្រាក់ខែនៅថ្ងៃទិវាពលកម្មអន្តរជាតិ១ឧសភា។ កម្មករកាត់ដេរ នៅក្នុងប្រទេសកម្ពុជាទទួលបានប្រាក់ខែអប្បបរមា៦១ដុល្លារអាមេរិក ប៉ុន្តែសហជីពចង់អោយប្រាក់ខែកម្មករកើនឡើងដល់១២០ដុល្លារអាមេរិក។ លើសពីនេះទៅទៀត សហជីពចង់អោយរដ្ឋាភិបាលបង្កើតតុលាការការងារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
«ប្រាក់ខែរបស់កម្មករនិយោជិតត្រូវដំឡើងអោយដល់១២០ដុល្លារអាមេរិក ហើយតម្លៃទំនិញត្រូវតែចុះជាងតម្លៃបច្ចុប្បន្ន»។ នេះគឺជាខ្លឹមសាររួមនៃការទាមទាររបស់សហជីពមួយចំនួនមុនទិវាពលកម្មអន្តរជាតិដែលគ្រោងនឹងរៀបចំឡើងនៅថ្ងៃអង្គារសប្តាហ៍ក្រោយនេះ។
លោក អាត់ ធន់ ប្រធានសហភាពការងារកម្ពុជាបានថ្លែងប្រាប់ថា លោកនឹងរៀបចំក្បួនដង្ហែនៅថ្ងៃទី១ខែឧសភាខាងមុននេះ ដើម្បីទាមទារអោយរដ្ឋាភិបាល និងថៅកែរោងចក្រពិចារណាលើការដំឡើងប្រាក់បៀវត្សរ៍សម្រាប់កម្មករនិយោជិត។ បើយោងតាមសកម្មជនសហជីពរូបនេះ រដ្ឋាភិបាលត្រូវកំណត់ប្រាក់ខែគោលសម្រាប់មន្ត្រីរាជការ កម្មករកាត់ដេរ និងកម្មករក្នុងវិស័យផ្សេងទៀតចំនួន១២០ដុល្លារក្នុងមួយខែ។
រហូតមកដល់ពេលនេះ មានតែកម្មករក្នុងវិស័យកាត់ដេរមួយគត់ដែលទទួលបានប្រាក់ខែអប្បបរមាចំនួន៦១ដុល្លារអាមេរិក។ ក្នុងវិស័យផ្សេងទៀត កម្មករទទួលបានប្រាក់ខែតាមការកំណត់របស់ថៅកែនីមួយៗ។ អ្វីដែលលោក អាត់ ធន់ ចង់បាននៅពេលនេះ គឺកម្មករទូទៅនៅក្នុងគ្រប់វិស័យទទួលបានប្រាក់ខែគោលដូចគ្នា។
លោក រ៉ុង ឈុន ប្រធានសភាពសហជីពកម្ពុជាបានប្រកាសនៅថ្ងៃសៅរ៍នេះថា នៅឆ្នាំនេះក្រុមរបស់លោកនឹងមិនរៀបចំក្បួនដង្ហែអ្វីទេ នៅថ្ងៃទិវាពលកម្មអន្តរជាតិពីព្រោះសមាគមរបស់លោកជាប់រវល់រៀបចំធ្វើសមាជ។ ប៉ុន្តែបើទោះបីជាយ៉ាងនេះក្តី លោកនឹងចេញសេចក្តីថ្លែងការណ៍ទាមទារអោយរដ្ឋាភិបាលដំឡើងប្រាក់ខែអប្បបរមាជូនកម្មករកាត់ដេរចំនួន១២០ដុល្លារអាមេរិក និង២៥០ដុល្លារអាមេរិកសម្រាប់គ្រូបង្រៀននៅក្នុងប្រទេសកម្ពុជា។
សូមបញ្ជាក់ថា សហជីពគ្រោងនឹងទាមទារអោយរដ្ឋាភិបាលដោះស្រាយបញ្ហាមួយចំនួនជូនកម្មករនៅថ្ងៃទិវាពលកម្មអន្តរជាតិខាងមុខនេះ ប៉ុន្តែកាលពីសប្តាហ៍មុននេះ ថៅកែរោងចក្រកាត់ដេរក៏ទាមទារអោយរដ្ឋាភិបាលដោះស្រាយរឿងកម្មករសហជីពធ្វើកូដកម្ម និងបាតុកម្មខុសច្បាប់ដែរ។
ទាក់ទងទៅនឹងការទាមទារដំឡើងប្រាក់ខែ លោក អ៊ិត សំហេង រដ្ឋមន្ត្រីក្រសួងសង្គមកិច្ចបានលើកឡើងក្នុងកិច្ចប្រជុំមួយជាមួយកម្មករ កាលពីព្រឹកថ្ងៃសៅរ៍នេះថា រដ្ឋាភិបាលបានដំឡើងប្រាក់ឈ្នួលអប្បបរមាជូនកម្មករកាត់ដេរជាបន្ដបន្ទាប់ ហើយកាលពីឆ្នាំ២០១០កន្លងមក ប្រាក់ខែគោលត្រូវបានគេដំឡើងពី៥៦ដល់៦១ដុល្លារ និងមានប្រាក់អត្ថប្រយោជន៍បន្ទាប់បន្សំមួយចំនួនផ្សេងទៀត។
ក្រៅអំពីការទាមទារដំឡើងប្រាក់ខែអប្បបរមា លោក រ៉ុង ឈុន និង លោក អាត់ ធន់ បានទាមទារក្នុងសំឡេងតែមួយអោយរដ្ឋាភិបាលបង្កើតតុលាការការងារសម្រាប់កាត់ក្តីវិវាទការងារ។ លោក រ៉ុង ឈុន បានពន្យល់ថា៖«លោកត្រូវការតុលាការជំនាញការងារ ជាជាងតុលាការទូទៅដែលមានដូចសព្វថ្ងៃនេះ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ