ជម្លោះដីធ្លី នៅបាត់ដំបង ក្លាយជាជម្លោះរវាងព្រះសង្ឃ និងតំណាងរាស្ត្រ
ប្រជាពលរដ្ឋខេត្តបាត់ដំបង ដែលមានជម្លោះដីធ្លីរ៉ាំរ៉ៃ ហើយឡើងមកដេកតវ៉ា នៅក្នុងវត្តចាស់ ស្ថិតនៅសង្កាត់ជ្រោយចង្វា រាជធានីភ្នំពេញ យូរថ្ងៃមកហើយ នៅពេលនេះ បែរជាជម្លោះដីធ្លីនោះ រាលដាលទៅជាជម្លោះរវាងព្រះសង្ឃ និងលោក ឈាង វុន អ្នកតំណាងរាស្ត្រ គណបក្សប្រជាជនកម្ពុជា ប្រចាំខេត្តបាត់ដំបង។ នោះគឺកាលពីល្ងាច ថ្ងៃទី៣វិច្ឆិកា ព្រះសង្ឃ អះអាងថា លោក ឈាង វុន បានប្រើពាក្យសំដីទ្រគោះបោះបោកឥតគួរសម មកលើព្រះសង្ឃ ហើយថែមទាំងបណ្តេញឲ្យព្រះសង្ឃ ឲ្យបកស្បងចីវរចេញទៀតផង។ ប៉ុន្តែលោកឈាងវុន បានបដិសេធ។
ចុះផ្សាយនៅថ្ងៃ៖
បណ្តាញព្រះសង្ឃឯករាជ្យដើម្បីយុត្តិធម៌សង្គម បានធ្វើសន្និសីទកាសែត នៅព្រឹកថ្ងៃទី៤វិច្ឆិកា ហើយលើកឡើងពីការប្រមាថមកលើព្រះសង្ឃ ពីសំណាក់អ្នកតំណាងរាស្ត្រ ប្រចាំមណ្ឌលខេត្តបាត់ដំបង មកពីគណបក្សប្រជាជនកម្ពុជា លោក ឈាង វុន។ លោក ឈាងវុន ត្រូវបានបណ្តាញព្រះសង្ឃ លើកឡើងថា កាលពីល្ងាចថ្ងៃទី៣វិច្ឆិកា លោកឈាងវុន បានទិញស្រាបៀរ យកទៅចែកចាយ និងផឹកក្នុងវត្តចាស់ សង្កាត់ជ្រោយចង្វា រាជធានីភ្នំពេញ ហើយប្រើពាក្យសំដីទ្រគោះបោះបោក ឥតគួរសម មកលើព្រះសង្ឃ ដែលជាសមាជិកបណ្តាញព្រះសង្ឃឯករាជ្យដើម្បីយុត្តិធម៌សង្គម ដែលគង់នៅវត្តនោះ។ ព្រះសង្ឃ ក៏បានអះអាងថា តំណាងរាស្ត្រពូកែវោហាស័ព្ទ លោក ឈាង វុន ថែមទាំងបណ្តេញឲ្យព្រះសង្ឃ បកស្បងចីវរចេញទៀតផង។
ព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ បានបញ្ជាក់ថា ក្រុមព្រះសង្ឃ ទាមទារ ទី១ ឲ្យលោក ឈាង វុន សុំទោសព្រះសង្ឃ និងទី២ លោកឈាង វុន ត្រូវសងជំងឺចិត្តដល់ព្រះសង្ឃនូវលុយ ១០០០ រៀល ស្របតាមក្រមព្រហ្មទណ្ឌ ដើម្បីលុបលាងទង្វើប្រមាថលើព្រះពុទ្ធសាសនា។
បណ្តាញព្រះសង្ឃ ក៏បានព្រមានថា បើលោកឈាងវុន មិនព្រមសុំទោស និងបង់ប្រាក់ពិន័យនោះទេ គឺនៅក្រោយបុណ្យអុំទូក បណ្តាញព្រះសង្ឃ នឹងធ្វើបាតុកម្ម ដាក់ញត្តិ នៅរដ្ឋសភា ដើម្បីទាមទារឲ្យលោកឈាងវុន សុំទោសព្រះសង្ឃ។ ព្រះសង្ឃ ក៏គ្រោងនឹងស្ទាក់ព័ទ្ធ បង្ខំឲ្យលោកឈាងវុន សុំទោស នៅពេលលោកចូលវត្ត។
ក៏ប៉ុន្តែលោក ឈាង វុន បានបដិសេធនូវការលើកឡើងរបស់ព្រះសង្ឃ ហើយទាមទារឲ្យព្រះសង្ឃ ទទួលស្គាល់ការពិត។ ក្នុងន័យនេះ លោកឈាងវុន ដែលជាអតីតក្មេងវត្ត មិនព្រមធ្វើតាមបណ្តាញព្រះសង្ឃទេ និងប្រកាសរង់ចាំទទួលបាតុកម្មរបស់ព្រះសង្ឃ នៅមុខរដ្ឋសភា ក្រោយពិធីបុណ្យអុំទូក។
យ៉ាងណាក៏ដោយ តាមតំណាងរាស្ត្រខេត្តបាត់ដំបង លោកឈាងវុន ជម្លោះដីធ្លីរវាងប្រជាពលរដ្ឋ និងប្រជាពលរដ្ឋ នៅខេត្តបាត់ដំបង គឺប្រជាពលរដ្ឋ ដែលកំពុងស្នាក់នៅវត្តចាស់ ក្នុងសង្កាត់ជ្រោយចង្វារ ត្រូវវិលត្រឡប់ទៅដោះស្រាយនៅដីជម្លោះ ឯខេត្តបាត់ដំបង ទើបមានដំណោះស្រាយ។ ក្នុងជម្លោះដីធ្លីនេះ តាមលោកឈាងវុន បើព្រះសង្ឃ ចង់ចូលរួមដោះស្រាយ ក៏ត្រូវតែដោះស្បងចីវរចេញសិន ត្បិតអី ជាជម្លោះរវាងប្រជាពលរដ្ឋមួយក្រុម និងប្រជាពលរដ្ឋមួយក្រុមផ្សេងទៀត។
ជាការកត់សម្គាល់ នេះជាប្រតិកម្ម លើកទី២ ហើយ លើទង្វើ និងពាក្យសម្តីរបស់លោកតំណាងរាស្ត្រ ឈាងវុន។ កាលពីចុងអាណត្តិទី៤ ក្នុងឆ្នាំ២០១២ លោកឈាងវុន បានថ្លែងក្នុងវេទិការដ្ឋសភា ដែលជនជាតិដើមភាគតិចព្នង ចាត់ទុកថា ជាការប្រមាថ ហើយទាមទារឲ្យលោកសុំទោសម្តងរួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ