អង្គការ NGO Forum ចេញរបាយការណ៍ស្ដីពី ការវិភាគស្ថិតិអំពីវិវាទដីធ្លីនៅកម្ពុជា ឆ្នាំ២០១៣
នៅថ្ងៃចន្ទ ទី៣វិច្ឆិកានេះ វេទិកានៃអង្គការមិនមែនរដ្ឋាភិបាល ស្ដីពីកម្ពុជា សហការជាមួយបណ្ដាញសិទ្ធិដីធ្លីនិងលំនៅដ្ឋាន បានចេញផ្សាយរបាយការណ៍មួយ ស្ដីពីការវិភាគស្ថិតិអំពីវិវាទដីធ្លីនៅកម្ពុជា ក្នុងឆ្នាំ២០១៣។ ការរកឃើញនៅក្នុងរបាយការណ៍នេះបង្ហាញថា ចំនួននៃវិវាទដីធ្លីថ្មីក្នុងឆ្នាំ២០១៣ មានកម្រិតទាប បើធៀបទៅនឹងករណីដែលបានកត់ត្រាទុកក្នុងរយៈពេល៣ឆ្នាំកន្លងមក។
ចុះផ្សាយនៅថ្ងៃ៖
ស្តាប់ - ០២:២៤
ការរកឃើញសំខាន់ៗ នៅក្នុងរបាយការណ៍ ការវិភាគស្ថិតិអំពីវិវាទដីធ្លីនៅកម្ពុជា ឆ្នាំ២០១៣ បង្ហាញថា វិវាទដីធ្លីបានកើតឡើងនៅទូទាំងប្រទេសកម្ពុជា ហើយរាជធានីភ្នំពេញ គឺជាកន្លែងដែលមានអត្រាវិវាទដីធ្លីខ្ពស់ជាងគេ ខណៈដែលខេត្តរតនគិរី ស្ថិតនៅលំដាប់ទី២។ វិវាទដីធ្លីក៏កើតមាននៅខេត្តផ្សេងទៀតដែរ ដូចជាខេត្តពោធិ៍សាត់ កំពង់ស្ពឺ កំពង់ចាម និងបន្ទាយមានជ័យជាដើម។
បើតាមរបាយការណ៍ ចំនួនវិវាទដីធ្លីថ្មីក្នុងឆ្នាំ២០១៣ គឺកម្រិតទាបជាង បើធៀបទៅនឹងករណីដែលបានកត់ត្រាទុក ក្នុងរយៈពេល៣ឆ្នាំកន្លងមក។ នៅក្នុងឆ្នាំ២០១៣ វិវាទដីធ្លីចំនួន៤ បានបណ្ដាលឲ្យប្រជាពលរដ្ឋរងគ្រោះដោយការផ្លាស់ទីលំនៅដោយបង្ខំ ដែលករណីទាំង៤នេះ កើតឡើងនៅក្នុងខេត្តព្រះវិហារ។ ក្រៅពីចំនួនវិវាទដីធ្លីថ្មីមានកម្រិតទាបជាងមុន ចំនួនករណីដែលមិនទាន់ដោះស្រាយ ក៏បានថយចុះពីចំនួន១០៨ករណីក្នុងឆ្នាំ២០១២ មកត្រឹម៨១ករណី ក្នុងឆ្នាំ២០១៣ផងដែរ។
របាយការណ៍ដែលរៀបចំធ្វើដោយវេទិកានៃអង្គការមិនមែនរដ្ឋាភិបាល ស្ដីពីកម្ពុជា សហការជាមួយបណ្ដាញសិទ្ធិដីធ្លីនិងលំនៅដ្ឋាននេះ ឲ្យដឹងទៀតថា សម្បទានដីសេដ្ឋកិច្ច គឺជាមូលហេតុចម្បងនៃវិវាទដីធ្លី។ ៨០វិវាទ ឬ២៥ភាគរយ នៃវិវាទដីធ្លីសរុប គឺ មានពាក់ព័ន្ធនឹងដីសម្បទានសេដ្ឋកិច្ច។ វិវាទទាំងនោះ បើផ្អែកតាមការរកឃើញ គឺពាក់ព័ន្ធជាមួយគ្រួសារចំនួន១ម៉ឺន៩ពាន់៧៤០ ស្មើនឹងប្រជាជនចំនួន ៩ម៉ឺន២ពាន់៧៧៨នាក់។
គួរជម្រាបជូនថា កន្លងមក រដ្ឋាភិបាលកម្ពុជា បានផ្ដល់ដីសម្បទានសេដ្ឋកិច្ចដល់ក្រុមហ៊ុនចំនួន១១១ ដោយដាក់ឲ្យស្ថិតក្រោមការទទួលខុសត្រូវពីក្រសួងបរិស្ថាន។ នៅចំពោះមុខបញ្ហាដីសម្បទានសេដ្ឋកិច្ចដ៏រសើបនេះ រដ្ឋមន្ដ្រីក្រសួងបរិស្ថានថ្មីដែលទើបតែឡើងកាន់តំណែងកាលពីឆ្នាំ២០១៣ បានដកហូតដីសម្បទានពីក្រុមហ៊ុនមួយចំនួនជាបន្តបន្ទាប់។ ចំណាត់ការថ្មីៗទាំងនេះ បានទទួលការសាទរពីសង្គមស៊ីវិលដែលធ្វើការពាក់ព័ន្ធនឹងបញ្ហាដីធ្លី ប៉ុន្តែសង្គមស៊ីវិលខ្លះថា វាហាក់ដូចជាយឺតពេលបន្តិចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ