ផ្សារមូលបត្រឡាវចាប់បើកទ្វារលក់ដូរនៅដើមសប្តាហ៍ក្រោយ
នៅដើមសប្តាហ៍ក្រោយនេះ ទីផ្សារមូលបត្រដ៏ថ្មីស្រឡាងមួយនឹងចាប់ដំណើរការ នៅប្រទេសឡាវ។ សម្រាប់ប្រទេសប្រកាន់យករបបដឹកនាំបែបកុម្មុយនិស្តមួយនេះ ការបើក ផ្សារមូលបត្រ គឺជាការបោះជំហានដ៏សំខាន់ចូលទៅក្នុងពិភពមូលធននិយម។ ក៏ប៉ុន្តែ ឡាវទំនងជាត្រូវការពេលវេលាច្រើន ដើម្បីស្វែងរកទំនុកចិត្តពីអ្នកវិនិយោគ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
ទីផ្សារមូលបត្រឡាវ (ឬផ្សារភាគហ៊ុន) នឹងចាប់បើកទ្វារលក់ដូរជាផ្លូវការ នៅថ្ងៃអង្គារ ១១ មករា ២០១១នេះ។
រដ្ឋាភិបាលកុម្មុយនិស្តឡាវ កំពុងតែព្យាយាមស្វែងរកមធ្យោបាយធ្វើយ៉ាងណាឲ្យប្រជាជនទាំង ៦លាននាក់ អាចកាត់បន្ថយការពឹងផ្អែកតែលើវិស័យកសិកម្ម និងជំនួយបរទេស ដោយងាកទៅអភិវឌ្ឍវិស័យផ្សេងវិញ ជាពិសេស ការធ្វើអាជីវកម្មរ៉ែ និងការផលិតថាមពលអគ្គិសនី។ ឡាវរំពឹងថា ទីផ្សារមូលបត្រនឹងអាចជួយប្រមូលទុន ដើម្បីយកទៅអភិវឌ្ឍវិស័យទាំងនេះ។
នៅក្នុងចំណោមក្រុមហ៊ុន ដែលចុះឈ្មោះលក់ភាគហ៊ុន គេឃើញមានក្រុមហ៊ុនអគ្គិសនីដ៏ធំមួយរបស់រដ្ឋឡាវ គឺក្រុមហ៊ុន EDL ។ EDL បានសម្រេចយកភាគហ៊ុនមួយផ្នែក ទៅលក់នៅផ្សារភាគហ៊ុន ដើម្បីប្រមូលដើមទុនទៅវិនិយោគ ក្នុងការសាងសង់រោងចក្រអគ្គិសនី នៅតាមទីជនបទ។
អគ្គនាយកផ្សារមូលបត្រឡាវបានប្រាប់ទីភ្នាក់ងារព័ត៌មាន AFP ថា ផ្សារមូលបត្រ គឺជាមធ្យោបាយប្រមូលទុនវិនិយោគបានលឿនបំផុត។ ការបើកផ្សារមូលបត្រនឹងអាចជាកម្លាំងចលករដ៏សំខាន់មួយ សម្រាប់សេដ្ឋកិច្ចឡាវ ដើម្បីចូលរួមចំណែកដ៏សំខាន់ក្នុងការកាត់បន្ថយភាពក្រីក្រ។
គួរបញ្ជាក់ថា ឡាវ គឺជាប្រទេសកុម្មុយនិស្ត ប្រកាន់យករបបដឹកនាំបែបឯកបក្ស ក៏ប៉ុន្តែ អនុវត្តនយោបាយសេដ្ឋកិច្ចទីផ្សារសេរី ដោយយកគំរូតាមចិន និងវៀតណាម ដែលជាប្រទេសជិតខាង និងជាប្រទេសកុម្មុយនិស្តដូចគ្នា។
គួររំឭកថា វៀតណាមបានចាប់បើកផ្សារមូលបត្រ កាលពីឆ្នាំ២០០០។ នៅពេលបើកលក់ដំបូង មូលបត្រ ដែលចរាចរលើទីផ្សារវៀតណាម មានតម្លៃតែប្រមាណ ៤៣លានដុល្លារប៉ុណ្ណោះ ហើយពោរពេញទៅដោយរឿងចម្រូងចម្រាស ដោយគេសង្ស័យអំពីការលក់ដូរដោយខុសច្បាប់ ជាហេតុធ្វើឲ្យអ្នកវិនិយោគគ្មានទំនុកចិត្ត។ នៅពេលនេះ ១១ឆ្នាំក្រោយពីការចាប់ដំណើរការតម្លៃមូលបត្រនៅលើទីផ្សារវៀតណាមបានកើនឡើងជិត១ពាន់ដង ពោលគឺ រហូតដល់ ៣៣ពាន់លានដុល្លារឯណោះ។
សម្រាប់ឡាវ ដើម្បីឲ្យទុនវិនិយោគហូរចូលមកបាន ផ្សារមូលបត្រឡាវត្រូវតែធានាឲ្យបាននូវការគោរពច្បាប់ និងតម្លាភាព ក្នុងការទិញដូរមូលបត្រ ដើម្បីឲ្យអ្នកវិនិយោគទុកចិត្ត ហ៊ានប្រថុយប្រថានបោះទុនមកវិនិយោគ។ ផ្សារមូលបត្រឡាវទំនងជានឹងត្រូវការពេលវេលាច្រើន ដើម្បីបង្កើតទំនុកចិត្តនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ