លោកទេពនីថា៖«មានគណបក្សមិនដល់១០ទេដែលប្រកួតក្នុងខែកក្កដា»
គណៈកម្មាធិការជាតិរៀបចំការបោះឆ្នោតហៅកាត់ថាគជប បានប្រកាសអោយគណបក្សនយោបាយទាំងអស់ត្រៀមចុះឈ្មោះចូលប្រកួតក្នុងការបោះឆ្នោតជ្រើសតាំងតំណាងរាស្ត្រក្នុងខែកក្កដាខាងមុខនេះ។ កាលបរិច្ឆេទផ្តើមចុះឈ្មោះមិនទាន់ដល់នៅឡើយទេ ប៉ុន្តែថ្នាក់ដឹកនាំរបស់ គជប បានព្រលយអោយដឹងហើយថា ចំនួនគណបក្សនយោបាយដែលនឹងចុះឈ្មោះនោះទំនងជាមិនមានដល់១០ឡើយ។
ចុះផ្សាយនៅថ្ងៃ៖
ស្តាប់ - ០១:៣៩
បើទោះជាកាលបរិច្ឆេទនៃការចុះបញ្ជីគណបក្សនយោបាយឈឈ្មោះបោះឆ្នោតនិងបញ្ជីបេក្ខជនឈរឈ្មោះសម្រាប់ការបោះឆ្នោតនៅមិនទាន់មកដល់ក៏ដោយ។ ប៉ុន្តែ បើតាមការស្ទាបស្ទង់របស់គណៈកម្មាធិការជាតិរៀបចំការបោះឆ្នោត គជប នោះ គណបក្សនយោបាយប្រកួតប្រជែងនៅថ្ងៃខាងមុខនោះ ប្រហែលជាមានមិនដល់១០គណបក្សឡើយ។
ការចុះបញ្ជីគណបក្សនយោបាយឈឈ្មោះបោះឆ្នោត និងបញ្ជីបេក្ខជនឈឈ្មោះសម្រាប់ការបោះឆ្នោតនឹងប្រព្រឹត្តិទៅចន្លោះពីថ្ងៃទី២៩ខែមេសានេះដល់ថ្ងៃទី១៣ខែឧសភា។
អគ្គលេខាធិការ គជប លោកទេព នីថាបានបញ្ជាក់ប្រាប់វិទ្យុបារាំងអន្តរជាតិនៅរសៀលថ្ងៃព្រហស្បតិ៍នេះថា ការប៉ាន់ស្មានឃើញចំនួនគណបក្សនយោបាយមិនដល់១០ថានឹងចូលរួមក្នុងការប្រកួតប្រជែងក្នុងការបោះឆ្នោតនោះ ត្រូវបានយោងទៅលើមូលហេតុមួយចំនួន។
លោកអគ្គលេខាធិការ គជប បន្តថា ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់លើកចុងក្រោយមានគណបក្សនយោបាយតែ១០ប៉ុណ្ណោះដែលបានចូលរួមក្នុងការបោះឆ្នោតនោះ ហើយឥឡូវនេះមានគណបក្សមួយចំនួនបានរួមបញ្ចូលគ្នាធ្វើជាបក្សតែមួយ។ ម្យ៉ាងវិញទៀត ការចូលរួមក្នុងការបោះឆ្នោតជ្រើសតាំងតំណាងរាស្ត្រ ត្រូវការចំណាយច្រើន ហើយតាមច្បាប់បោះឆ្នោត គណបក្សដែលចូលរួមក្នុងការប្រកួតប្រជែងនេះត្រូវមានបេក្ខជនតំណាងរាស្ត្រឈរឈ្មោះអោយបានយ៉ាងហោចណាស់១ភាគ៣នៃចំនួនអាសនៈក្នុងរដ្ឋសភាដែរ។
បើតាមការអត្ថាធិប្បាយរបស់លោកទេព នីថាទំហំចំនួនគណបក្សនយោបាយនៅពេលខាងមុខនេះគឺជាចំនួនគណបក្សដ៏តិចមិនធ្លាប់មាននៅក្នុងប្រវត្តិនៃការបោះឆ្នោតនៅកម្ពុជា។ ប៉ុន្តែលោកអះអាងថា ការធ្លាក់ចុះនៃចំនួនគណបក្សនយោបាយនេះ មិនមែនជាសញ្ញានៃការធ្លាក់ចុះនៃលទ្ធិប្រជាធិបតេយ្យនិងរបបសេរីពហុបក្សអ្វីនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ