សាលាក្រុងនិងតំណាងគណបក្សសង្គ្រោះជាតិបន្ធូរសសៃកដាក់គ្នានៅព្រឹកនេះ
កិច្ចប្រជុំរវាងគណបក្សសង្គ្រោះជាតិនិងសាលារាជធានីភ្នំពេញបានបញ្ចប់ហើយ កាលពីម៉ោងជាង ១១ព្រឹកនេះ ដោយមានការយោគយល់គ្នា ទាក់ទងទៅនឹងការផ្តល់ព័ត៌មាន ការណែនាំនិងកិច្ចសហការជាមួយអាជ្ញាធរក្រុង។ តំណាងគណបក្សសង្គ្រោះជាតិ ដែលបានចូលរួមនៅក្នុងកិច្ចប្រជុំ ក៏បានទទួលយកផងដែរពីសំណូមពររបស់អាជ្ញាធរ ពាក់ព័ន្ធទៅនឹងសន្តិសុខ អនាម័យ និងចរាចរណ៍តាមដងផ្លូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សាលាក្រុងភ្នំពេញ ណាត់ជួបនិយាយគ្នាពីបញ្ហាមួយចំនួន ដែលទាក់ទងទៅនឹងការធ្វើបាតុកម្មរបស់គណបក្សសង្គ្រោះជាតិ។ បន្ទាប់ពីធ្វើបាតុកម្មជាប់ៗគ្នា អស់រយៈពេលមួយសប្តាហ៍ មេដឹកនាំគណបក្សប្រឆាំង ត្រូវបានកិច្ចប្រជុំជាមួយអភិបាលរាជធានីភ្នំពេញ ប៉ា សុជាតិវង្ស ដែលមានការចូលរួមពីតំណាងគណបក្សសង្គ្រោះជាតិមួយចំនួននោះ បានប្រព្រឹត្តទៅ កាលពីព្រឹកមិញ ដោយមិនមានវត្តមានមេបក្សប្រឆាំងតាមការអញ្ជើញ បានបញ្ចប់ទៅដោយមានការយោគយល់គ្នា និងមិនមានកំដៅឆេះរាលរោលក្នុងអង្គប្រជុំដូចការជួបគ្នាកន្លងមកនោះទេ។
លោក ហូ វ៉ាន់ តំណាងគណបក្សសង្គ្រោះជាតិបានថ្លែងប្រាប់វិទ្យុបារាំង RFI បន្ទាប់ពីជំនួបគ្នា
ប្រមាណជាពីរម៉ោងថា កិច្ចប្រជុំប្រកបដោយការយោគយល់និងសហការគ្នាបានល្អ។
ចំណុចសំខាន់ៗដែលមានការសហការគ្នារវាងបាតុករសង្គ្រោះជាតិ និងអាជ្ញាធរក្រុងនោះគឺមានការកំណត់ផ្លូវដែលត្រូវហែក្បួនឲ្យបានច្បាស់លាស់ ជួយដោះស្រាយបញ្ហាចរាចរណ៍ និងសុវត្ថិភាព។ បញ្ហាសំរាមនិងអនាម័យនៅលើទីលានក៏ត្រូវបង្កើនការយកចិត្តទុកដាក់ផងដែរ។
ដោយឡែក សាលារាជធានីភ្នំពេញ តាមរយៈលោក ហូរ វ៉ាន់ បានសហការបើកផ្លូវ ជួយបង្គន់
អនាម័យដល់បាតុករ និងជួយជារថយន្តពេទ្យ នៅពេលដែលបាតុករត្រូវការ។ លើសពីនេះក៏មានការឯកភាពគ្នារវាងគណបក្សសង្គ្រោះជាតិ និងសមត្ថកិច្ចក្រុង បង្កើតទីតាំងឈរជើង ដែលមានសមាសភាពចំរុះ និងមានការជួយគ្នាពេលមានបញ្ហាអ្វីកើតឡើង។
លោក ឡុង ឌីម៉ង់ អ្នកនាំពាក្យសាលាក្រុងភ្នំពេញ បានប្រាប់RFI ផងដែរថា អ្វីដែលមានការស្នើឡើងហើយទទួលយកដោយតំណាងគណបក្សសង្គ្រោះជាតិនោះ គឺការបញ្ឈប់ការប្រើពាក្យដែលនាំឲ្យប៉ះពាល់សិទ្ធិបុគ្គលដទៃ។ ការគ្រប់គ្រងកំលាំងដើម្បីបង្ការជនឆ្លៀតឱកាស
ឬជនទីបីបង្កបញ្ហានោះ ក៏ជាការលើកឡើងផងដែរ ដែលបញ្ហានេះទាមទារឲ្យមានការសហការគ្នាពីបាតុករនិងសមត្ថកិច្ច។
សូមរំលឹកថា កាលពីថ្ងៃសុក្រទី២០ ខែធ្នូ ម្សិលមិញ សាលារាជធានីភ្នំពេញបានកោះអញ្ជើញ លោកសម រង្ស៊ី និងលោក កឹម សុខា ឲ្យចូលប្រជុំពិភាក្សាស្ដីពីការគ្រប់គ្រងបាតុកម្មនៅទីលាន ប្រជាធិបតេយ្យ និងការដង្ហែក្បួនតាមដងផ្លូវនានា បន្ទាប់ពីការដឹកនាំធ្វើបាតុកម្ម រយៈពេលប៉ុន្មានថ្ងៃន្លងមកនេះ មានភាពមិនប្រក្រតីមួយចំនួនដែលត្រូវកែលំអឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ