សមយុទ្ធផ្លូវអាកាសរវាងអាមេរិក និងជប៉ុនធ្វើឡើងក្នុងបរិយាកាសតានតឹងរវាងចិន និងជប៉ុន
នៅថ្ងៃអង្គារ ទី១៥ មករានេះ សហរដ្ឋអាមេរិក និងជប៉ុនបានបើកសមយុទ្ធផ្លូវអាកាសរួមគ្នា។ សមយុទ្ធនេះបានធ្វើឡើង ចំពេលដែលជប៉ុន និងចិនកំពុងមានភាពតានតឹងរវាងគ្នាពាក់ព័ន្ធនឹងជម្លោះដណ្តើមទីប្រជុំកោះសេនកាគុនៅក្នុងសមុទ្រចិនខាងកើត។
ចុះផ្សាយនៅថ្ងៃ៖
ស្តាប់ - ០២:១០
សមយុទ្ធផ្លូវអាកាសរវាងសហរដ្ឋអាមេរិក និងជប៉ុនបានរៀបចំធ្វើនៅក្នុងសមុទ្រជប៉ុនក្បែរកោះស៊ីកូគុ (Shikoku) ដែលជាកោះដ៏សំខាន់ទី៤របស់ជប៉ុន។ សមយុទ្ធផ្លូវអាកាសនេះចូលរួមដោយយន្តហោះប្រដេញអាមេរិកំាងប្រភេទ FA-១៨ ចំនួន ៦គ្រឿង និងមានទាហានអាមេរិកំាងចំនួន ៩០នាក់ ចំណែកនៅខាងភាគីជប៉ុនវិញ មានយន្តហោះប្រដេញប្រភេទ F-៤ ចំនួន ៤គ្រឿង តែគេបានមិនដឹងអំពីចំនួនទាហានជប៉ុនដែលចូលរួមទេ។ ឃើញថា ជាមួយនឹងវត្តមានយន្តហោះ ក៏ដូចវត្តមានទាហានដែរ សមយុទ្ធនោះហាក់ដូចជាមិនសូវមានទ្រង់ទ្រាយធំប៉ុន្មានទេ។ តែសម្រាប់ទីក្រុងតូក្យូ វាបានបង្កប់ដោយអត្ថន័យធំធេងណាស់ ពិសេសនៅក្នុងបរិយាកាសនៃភាពតានតឹងជាមួយប្រទេសចិនពាក់ព័ន្ធនឹងជម្លោះដណ្តើមទីប្រជុំកោះសេនកាគុនៅក្នុងសមុទ្រចិនខាងកើត។
ការកត់សម្គាល់មួយទៀត សមយុទ្ធផ្លូវអាកាសរវាងជប៉ុន និងសហរដ្ឋអាមេរិកពេលនេះបានធ្វើឡើង មួយខែ ក្រោយពីការឈ្នះឆ្នោតរបស់លោក Shinzo Abé នៅក្នុងការបោះឆ្នោតសភាកាលពីថ្ងៃទី ១៦ ធ្នូកន្លងទៅ។ លោក Shinzo Abé ដែលបានប្រកាសភ្លាមៗ បិទទ្វារនៅរាល់ការចរចារជាមួយប្រទេសចិនទាក់ទងនឹងសំណុំរឿងទីប្រជុំកោះសេនកាគុ ជាភាសាជប៉ុន និងទាវយូ ជាភាសាចិន។ សម្រាប់លោក Shinzo Abé ទីប្រជុំកោះសេនកាគុជាអធិបតេយ្យរបស់ជប៉ុនដែលមិនអាចចរចាបានឡើយ។ ទន្ទឹមគ្នានេះ លោក Abé ក៏បានបញ្ជាក់ពីឆន្ទៈរបស់លោកក្នុងការបង្កើនទំនាក់ទំនងជាមួយសហរដ្ឋអាមេរិកឡើងវិញ។ ទំនាក់ទំនងដែលបានស្គាល់ភាពរកំារកូសអស់រយៈពេល ៣ឆ្នំា នៅក្រោមការកាន់អំណាចរបស់គណបក្សប្រជាធិបតេយ្យជប៉ុនពីឆ្នំា ២០០៩ ដល់ឆ្នំា ២០១២។
នៅថ្ងៃអាទិត្យ ទី១៣ មករាកន្លងទៅ កងកម្លំាងស្វ័យការពារជប៉ុនបានបើកធ្វើសមយុទ្ធជាលើកទីមួយជាមួយនឹងទ័ពចំនួន ៣០០នាក់ និងយន្តហោះចម្បំាង បូកនឹងឧទ្ធម្ភាកចក្រសរុប ២០គ្រឿង។ សមយុទ្ធក្រោមឈ្មោះថា « ដណ្តើមយកវិញនូវកោះមួយកាន់កាប់ដោយកម្លំាងសត្រូវ »។
សូមរម្លឹកជូនថា កាលពីខែតុលាឆ្នំា ២០១២ សហរដ្ឋអាមេរិក និងជប៉ុនបានលុបចោលសមយុទ្ធមួយ ដោយចង់បន្ថែមឲ្យមានទ័ពឡើងលើកោះ។ ការសម្រេចលុបចោលកាលណោះ មកពីមិនចង់ឲ្យមានការប៉ះទង្គិចជាមួយប្រទេសចិន។ យ៉ាងណាក៏ដោយ ការដែលជប៉ុនបានយល់ព្រមធ្វើសមយុទ្ធជាមួយសហរដ្ឋអាមេរិកពេលនេះបានបង្ហាញយ៉ាងច្បាស់ថា រដ្ឋាភិបាលទីក្រុងតូក្យូ ក្រោមអំណាចរបស់លោក Shizo Abé នឹងមិនបន្តទុកបណ្តោយឲ្យទីក្រុងប៉េកំាងធ្វើអ្វីស្រេចតែចិត្តនៅក្នុងរឿងទីប្រជុំកោះសេនកាគុនោះទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ