សមយុទ្ធកងម៉ារីនចិន-រុស្ស៊ីជាលើកទី១បើគិតក្នុង៧ឆ្នាំចុងក្រោយ
សមយុទ្ធនេះនឹងប្រព្រឹត្តទៅពីថ្ងៃ២២ដល់២៩មេសាខាងមុខនៅ”សមុទ្រលឿង”ដែលជាដៃមហាសមុទ្រប៉ាស៊ីហ្វិកនៅត្រង់ចន្លោះប្រទេសចិននិងកូរ៉េ។ ប៉ុន្តែតាំងពីវាមិនទាន់ចាប់ផ្តើមម៉្លេះ វាត្រូវពួកអ្នកជំនាញការបកស្រាយថា លំហាត់សឹកនេះ អាចមានន័យថារុស្ស៊ីស្ថិតនៅខាងចិនដែលកំពុងជាប់ក្នុងវិវាទដែនដីជាមួយប្រទេសជិតខាង នៅសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:២២
កាសែតរុស្ស៊ី Kommersant រម្លឹកថា គឺក្នុងសប្តាហ៍នេះឯង ដែលមានចាប់ផ្តើមទៅហើយ សមយុទ្ធរបស់ ស.រ.អា. ជាមួយហ្វីលីព្វីន ប្រទេសដែលប្រកាសថា កោះScarboro នៅសមុទ្រ ចិនខាងត្បូងជារបស់ខ្លួនកោះដែលត្រូវចិនចាត់ទុកជារបស់ខ្លួនដែរក្រោមឈ្មោះថា Huanian។ មកពីអធិករណ៍នេះ ពេលថ្មីៗ វិះៗផ្ទុះអាវុធរវាងចិននិងហ្វ៊ីលីព្វីន។
ហើយកាលដែលសមយុទ្ធអាមេរិក-ហ្វ៊ីលីព្វីននោះ ក្រោមឈ្មោះថា Balitikan-2012 មិនទាន់ចប់ផង ដ្បិតវាត្រូវចប់គឺលុះនៅថ្ងៃ២៧មេសាឯណោះ ដោយនឹងមានការចូលរួមទាំងរបស់ជប៉ុនកូរ៉េខាងត្បូងនិងអូស្ត្រាលីផង រុស្ស៊ីនិងចិន បានប្រកាសថា កងម៉ារីនខ្លួន នឹងធ្វើលំហាត់សឹក ក្រោមឈ្មោះថា “ សហប្រតិបត្តិការនៅសមុទ្រ ឆ្នាំ ២០១២ “ ដែលនឹងពន្យារទៅពីថ្ងៃ ២២ ដល់ ២៩មេសា។
ប៉ុន្តែទាំងចិនទាំងរុស្ស៊ីគូសបញ្ជាក់ថា សមយុទ្ធខ្លួននៅថ្ងៃមុខនោះត្រូវបានគ្រោងទុក តាំងពីឆ្នាំមុនម៉្លេះជាលទ្ធផលនៃទស្សនកិច្ចលោកអគ្គមេបញ្ជាការកងទ័ពចិនChan Bindéនៅម៉ូស្គូ។ គូភាគីលំអិតថា សមយុទ្ធថ្ងៃមុខ គឺជាការបន្តទៅនៃលំហាត់សឹក ដែលកងម៉ារីនប្រទេសទាំងពីរ ធ្លាប់់បានធ្វើម្តងទៅហើយ កាលក្នុងឆ្នាំ២០០៥។
កាសែតចិន Jenminh Jibao សរសេរថា សមយុទ្ធថ្ងៃមុខ គឺជាចម្លើយ តបនឹងការកើនឡើង នៃ វត្តមានយោធាអាមេរិកនិងសម្ព័ន្ធមិត្ត នៅតំបន់អាស៊ី-មហាសមុទ្រប៉ាស៊ីហ្វិក ប៉ុន្តែជាចម្លើយ ទាំងបង្ខំចិត្តទេតើ។
ទាក់ទងនឹងសាច់រឿងដែលមាន អ្នកជំនាញការខ្លះ បញ្ចេញយោបល់ទៅហើយថា រុស្ស៊ីត្រូវចិន អន្ទងឲ្យទៅនៅខាងខ្លួន ក្នុងជម្លោះ រវាងចិន និងបណ្តាប្រទេសជិតខាង ជុំវិញប្រជុំកោះ នៅត្រង់សមុទ្រចិនខាងត្បូង ដែលសម្បូណ៌ទៅដោយ កំណប់ប្រេងនិងឧស្ម័ន។
រីឯក្រុងប៉េកាំង បានដៀមដាមទៅហើយឲ្យរុស្ស៊ីដែលកាលពីថ្ងៃ៥មេសា បានចុះកិច្ចព្រមព្រៀង ជាមួយវៀតណាម ឆ្ពោះទៅជីកយកឧស្ម័នពីអណ្តូងពីរកន្លែង នៅបាតសមុទ្រ តាមបណ្តោយឆ្នេរវៀតណាមអណ្តូងដែលសុទ្ធតែស្ថិតនៅក្នុងសមុទ្រចិនខាងត្បូងតែម្តង។ ស្របនឹងឯកសារនេះ ភាគីរុស្ស៊ី ត្រូវទទួលបានផលក្នុងទំហំ៤៩%។ ក្រសួងការបរទេសចិន អំពាវនាវ”ប្រទេសទី៣” ដែលគ្មាននិស្ស័យនឹងសមុទ្រចិនខាងត្បូង ឲ្យទប់ខ្លួន កុំបៀតនឹងតំបន់នោះឡើយ ដរាបណាដែលជម្លោះដែនដីនៅទីនោះមិនទាន់ដោះស្រាយរួចទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ