លោកស្រីគ្លីនតុនចេញផ្សាយសៀវភៅ បង្ហាញទស្សនៈដឹកនាំផ្ទុយពីលោកអូបាម៉ា
ចុះផ្សាយនៅថ្ងៃ៖
ស្តាប់ - ០៤:២១
នៅថ្ងៃអង្គារ១០មិថុនានេះ លោកស្រីហ៊ីលឡារី គ្លីនតុន នឹងចេញផ្សាយជាសាធារណៈ នូវសៀវភៅមួយ ក្រោមចំណងជើងថា “ជម្រើសដ៏លំបាក”។ សៀវភៅនេះកត់ត្រាកិច្ចការដឹកនាំរយៈពេល៤ឆ្នាំ របស់លោកស្រីគ្លីនតុន កាលពីពេលលោកស្រីកាន់កាប់ក្រសួងការបរទេសអាមេរិក។ សារព័ត៌មាន CBS News បានចុះផ្សាយខ្លឹមសារខ្លះៗ នៃសៀវភៅនេះ បង្ហាញពីការយល់ឃើញផ្ទុយគ្នារវាងលោកស្រីគ្លីនតុន និងប្រធានាធិបតីអូបាម៉ា ក្នុងកិច្ចការអន្តរជាតិមួយចំនួន បែបយ៉ាងវិបត្តិស៊ីរី រឺក៏ទាហានអាមេរិកមួយរូប នៅអាហ្វហ្កានីស្ថាន ដែលក្រុមតាលីបង់ទើបបានដោះលែង កាលពីពេលថ្មីៗនេះ។
នៅថ្ងៃអង្គារ១០មិថុនានេះ សៀវភៅរបស់លោកស្រី ហ៊ីលឡារី គ្លីនតុន មានចំណងជើងថា “ជម្រើសដ៏លំបាក” នឹងចេញផ្សាយជាសាធារណៈ បង្ហាញពីកិច្ចការដឹកនាំរយៈពេល៤ឆ្នាំ របស់លោកស្រីគ្លីនតុន នៅក្រសួងការបរទេសអាមេរិក មុននឹងលោកចន ឃែររី ឡើងមកកាន់កាប់ក្រសួង នៅឆ្នាំ២០១៣។ ភរិយាអតីតប្រធានាធិបតីគ្លីនតុន ដែលកំពុងមានប្រជាប្រិយភាពក្នុងគណបក្សប្រជាធិបតេយ្យ បានបង្ហាញនូវទស្សនៈឃ្លាតឆ្ងាយជាមួយប្រធានាធិបតីអូបាម៉ា ក្នុងកិច្ចការអន្តរជាតិមួយចំនួន បែបយ៉ាង វិបត្តិសង្គ្រាមស៊ីរី។
លោកស្រីគ្លីនតុនលើកឡើងក្នុងសៀវភៅនេះថា ក្នុងវិបត្តិស៊ីរី តាំងតែពីដំបូងទី លោកស្រីចង់បំពាក់អាវុធអោយក្រុមឧទ្ទាមស៊ីរី ដែលប្រយុទ្ធប្រឆាំងប្រធានាធិបតីអាសាដ ចង់អោយមានការបណ្តុះបណ្តាលក្រុមឧទ្ទាម។ លោកស្រីគិតថា នេះជាជម្រើសដ៏ប្រសើរបំផុត ក្នុងការប្រយុទ្ធជាមួយកងទ័ពស៊ីរី។ លោកស្រីគ្លីនតុនលើកឡើងថា លោកអូបាម៉ាបានជំទាស់នឹងគំនិតនេះ លោកអូបាម៉ាមិនចង់អោយស្ថានភាពស៊ីរីប្រែប្រួលហួសពីនេះ មិនចង់អោយរហូតដល់ថ្នាក់បំពាក់អាវុធក្រុមឧទ្ទាមនោះទេ។
លោកស្រីគ្លីនតុនលើកឡើងទៀតថា គ្មានអ្នកណាម្នាក់ចង់ចាញ់ ក្នុងការជជែកគ្នានោះទេ តែនេះជាជម្រើសរបស់ប្រធានាធិបតី ហើយលោកស្រីត្រូវតែគោរពទស្សនៈនិងការសម្រេចចិត្តរបស់លោកអូបាម៉ា។ សម្រាប់លោកស្រីគ្លីនតុន គេពិបាកនឹងរកបានដំណោះស្រាយល្អ ចំពោះបញ្ហាដ៏លំបាកណាស់។ ចំពោះវិបត្តិសង្គ្រាមស៊ីរី អាមេរិកសម្រេចនៅស្ងៀម រឺក៏បញ្ចេញសកម្មភាព គឺអាមេរិកមានការប្រឈមខ្ពស់ដូចគ្នា។
ការបង្ហាញទស្សនៈខុសពីប្រធានាធិបតីអូបាម៉ា អាចអោយយើងគិតថា លោកស្រីគ្លីនតុននិងលោកអូបាម៉ា មិនមែនជាមិត្តភក្តិល្អ ដូចដែលលោកអូបាម៉ាទើបបានលើកឡើង កាលពីចុងខែឧសភាទេ។ ពេលនេះ នយោបាយការបរទេសរបស់លោកអូបាម៉ាកំពុងរងការរិះគន់ថា ទន់ជ្រាយ ប្រឈមនឹងរុស្ស៊ី ក្នុងវិបត្តិអ៊ុយក្រែន រឺក៏ប្រឈមនឹងចិនក្នុងជម្លោះបូរណភាពនៅសមុទ្រចិន។ ដូច្នេះ សៀវភៅរបស់លោកស្រីគ្លីនតុន មិនបានជួយលើកស្ទួយនយោបាយរដ្ឋាភិបាលអូបាម៉ាទេ តែវាហាក់បានរិះគន់ជាន់កលោកអូបាម៉ាមួយកម្រិតទៀត។
លោកស្រីគ្លីនតុនកំពុងមានប្រជាប្រិយភាព ជាងគេ ក្នុងចំណោមបេក្ខជនឈរឈ្មោះតំណាងបក្សកាន់អំណាចប្រជាធិបតេយ្យ សម្រាប់ការបោះឆ្នោតប្រធានាធិបតីឆ្នាំ២០១៦។ ថ្មីៗនេះ លោកអូបាម៉ាក៏ទើបតែបានអួតថា លោកស្រីគ្លីនតុននិងរូបលោក បានក្លាយជាមិត្តភក្តិនឹងគ្នា។ លោកអូបាម៉ាសរសើរទៀតថា លោកស្រីគ្លីនតុនមានប្រសិទ្ធភាព ក្នុងកិច្ចការប្រធានាធិបតី។ តាមរយៈសៀវភៅបង្ហាញការយល់ឃើញផ្សេងពីលោកអូបាម៉ា ក្នុងកិច្ចការអន្តរជាតិ បង្ហាញពីបំណងបំពាក់អាវុធក្រុមឧទ្ទាមស៊ីរី ពីដំបូងទីដើម្បីចៀសវាងសង្គ្រាមរ៉ាំរ៉ៃសម្លាប់មនុស្សនៅស៊ីរី លោកស្រីគ្លីនតុន ប្រហែលចង់បង្ហាញអោយប្រជាជនអាមេរិក ដឹងថា លោកស្រីខុសពីលោកអូបាម៉ា លោកស្រីមិនទន់ជ្រាយទេ។
ប្រសិនបើប្រជាជនអាមេរិកយល់ថា លោកស្រីគ្លីនតុនមិនទន់ជ្រាយ លោកស្រីគ្លីនតុនអាចងាយនឹងទទួលពិន្ទុខ្ពស់ក្នុងស្រុក ពិសេសអាចជាប់ឈ្មោះតំណាងបក្សប្រជាធិបតេយ្យ ដើម្បីដណ្តើមជោគជ័យក្នុងការបោះឆ្នោតប្រធានាធិបតីឆ្នាំ២០១៦ទៀតផង។
ប្រាកដណាស់ ក្រៅពីភាពជោគជ័យទាំងនេះ លោកស្រី គ្លីនតុនប្រហែលជានៅមិនទាន់បំភ្លេចពីបរាជ័យរបស់លោកស្រី កាលពីឆ្នាំ២០០៨ ប្រឈមនឹងលោកអូបាម៉ានៅឡើយទេ។ កាលពីឆ្នាំ២០០៨ លោកស្រីនិងលោកអូបាម៉ា ជាបេក្ខជនប្រជែងគ្នាតំណាងបក្សប្រជាធិបតេយ្យ ក្នុងការបោះឆ្នោតប្រធានាធិបតីឆ្នាំ២០០៩។ កាលណោះ លោកអូបាម៉ាបានជាប់ឈ្មោះជាតំណាងបក្ស ហើយបន្ទាប់មក បានឈ្នះឆ្នោតជាប្រធានាធិបតីអាមេរិក។ ដូច្នេះ លោកស្រីគ្លីនតុនប្រហែលមិនងាយបំភ្លេចភាពជូរចត់នេះទេ ទោះជាលោកអូបាម៉ាធ្លាប់បានប្រគល់តំណែងការទូតសំខាន់អោយលោកស្រីកាន់កាប់ រឺក៏ប្រកាសថា លោកស្រីជាមិត្តភក្តិក៏ដោយចុះ។
ដើម្បីបង្ហាញថា ខ្លួនមានលក្ខណៈពិសេសខុសពីលោកអូបាម៉ា ក្នុងសៀវភៅដែលចេញផ្សាយថ្ងៃអង្គារនេះ លោកស្រីគ្លីនតុនក៏បានសរសេរពីទាហានអាមេរិក Bowe Bergdahl នៅអាហ្វហ្កានីស្ថាន ដែលក្រុមតាលីបង់ទើបបានដោះលែង ជាថ្នូរនឹងអ្នកទោសតាលីបង់ កាលពីពេលថ្មីៗនេះដែរ។ លោកស្រីសរសេរថា ពេលកាន់តំណែងជាប្រមុខការទូតអាមេរិក លោកស្រីធ្លាប់ព្យាយាមអោយមានការដោះលែងទាហានរូបនេះ។ លោកស្រីសរសេរថា ប្រជាជនអាមេរិកពិបាកនឹងទទួលយកបានណាស់ នូវការចរចាជាមួយក្រុមតាលីបង់។ ប៉ុន្តែបើតាម អតីតសមាជិករដ្ឋបាលអាមេរិកមួយចំនួន លោកស្រីគ្លីនតុនធ្លាប់បានជំទាស់នឹងការដោះដូរអ្នកទោសតាលីបង់ជាមួយទាហានអាមេរិក កាលពីឆ្នាំ២០១១ ព្រោះថាជាការដោះដូរ គ្មានលក្ខខណ្ឌ។ ពោលគឺអ្នកទោសតាលីបង់ទាំងនោះ ក្រោយទទួលបានសេរីភាព អាចធ្វើដំណើរទៅណាមកណាដោយសេរី គ្មានការហាមឃាត់អ្វីទេ។
និយាយរួមមកវិញ ពេលលោកអូបាម៉ាកំពុងក្រពុលមុខដោះស្រាយបញ្ហាអន្តរជាតិនានា លោកស្រីគ្លីនតុនហាក់មិនបានភ័យខ្លាចនឹងរិះគន់រដ្ឋាភិបាលគណបក្សខ្លួនឯង ដើម្បីដណ្តើមពិន្ទុខ្ពស់ក្នុងក្រសែភ្នែកសាធារណជនអាមេរិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ