អង្គការ Opep៖ហេតុអ្វីបានជាអារ៉ាប៊ីសាអូឌីតយល់ព្រមធ្វើសម្បទានឲ្យអ៊ីរ៉ង់?
ចុះផ្សាយនៅថ្ងៃ៖
ស្តាប់ - ០៥:៤៣
កាលពីថ្ងៃពុធ ទី២៨ កញ្ញាកន្លងទៅ អង្គការនៃក្រុមប្រទេសនាំប្រេងចេញហៅកាត់ថា Opep បានឯកភាពគ្នាលើកិច្ចព្រមព្រៀងមួយជាគោលការណ៍ក្នុងការបញ្ចុះផលិតកម្មប្រេង។ គោលដៅ គឺជួយស្រោចស្រង់តម្លៃប្រេងដែលបានធ្លាក់ថ្លៃខ្លាំងតាំងពីពាក់កណ្តាលឆ្នាំ ២០១៤។ នៅថ្ងៃទី៣០ វិច្ឆិកាខាងមុខ Opep នឹងលើកយកកិច្ចព្រមព្រៀងជាគោលការណ៍នេះទៅជជែកលម្អិតនាជំនួបកំពូលប្រចាំឆមាសទី២ក្នុងទីក្រុងវីយែន ប្រទេសអូទ្រីស។ តើមានហេតុអ្វីខ្លះដែលបានធ្វើឲ្យអង្គការ Opep សម្រេចបានកិច្ចព្រមព្រៀងមួយដ៏គួរឲ្យភ្ញាក់ផ្អើល និងថា តើកិច្ចព្រមព្រៀងនេះអាចជួយឲ្យតម្លៃប្រេងឡើងថ្លៃឡើងវិញដែរ ឬទេ?
នៅទីបំផុត អង្គការនៃក្រុមប្រទេសនាំប្រេងចេញហៅកាត់ថា Opep សម្រេចបានកិច្ចព្រមព្រៀងមួយជាគោលការណ៍។ គឺជាកិច្ចព្រមព្រៀងដែលអង្គការ Opep បានយល់ព្រមកាត់បន្ថយការបូមប្រេងប្រមាណជា ៧០០ ០០០បារីលក្នុងមួយថ្ងៃ ពោលបញ្ចុះការបូមសរុបពី ៣៣ ៤៧០ ០០០លានបារីលក្នុងមួយថ្ងៃឲ្យមកនៅត្រឹមពី ៣២ ៥០០ ០០០លានបារីលទៅ ៣៣ ០០០ ០០០លានបារីលប៉ុណ្ណោះក្នុងមួយថ្ងៃ។ កម្មវត្ថុរបស់អង្គការ Opep គឺជួយស្រោចស្រង់តម្លៃប្រេងដែលបានធ្លាក់ថ្លៃតាំងពីពាក់កណ្តាលឆ្នាំ ២០១៤ ពីតម្លៃជាង ១០០ដុល្លារក្នុងមួយបារីលមកនៅតិចជាង ៣០ដុល្លារក្នុងមួយបារីលនាដើមឆ្នាំ ២០១៦។
អ្វីជាការកត់សម្គាល់ កិច្ចព្រមព្រៀងកាត់បន្ថយផលិតកម្មប្រេងរបស់អង្គការ Opep ពេលនេះនៅជាកិច្ចព្រមព្រៀងជាគោលការណ៍មែន តែជាកិច្ចព្រមព្រៀងដែលទទួលបានការសាទរ ពិសេសទីផ្សារក្នុងលោកតែម្តង ព្រោះនៅក្រោយការសម្រេចរបស់ Opep តម្លៃប្រេងបានស្ទុះឡើងបន្តិចនៅទីផ្សារអាមេរិកក៏ដូចជានៅទីផ្សារអាស៊ី។ ប៉ុន្មានថ្ងៃចុងក្រោយនេះ តម្លៃប្រេងនៅលើទីផ្សារអន្តរជាតិបានឡើងជិត ៥០ដុល្លារក្នុងមួយបារីល តែនៅឆ្ងាយជាងតម្លៃ ១០០ដុល្លារក្នុងមួយបារីលនៅឡើយ។ ខណៈនេះ មានសំណួរចំនួនពីរដែលកំពុងចោទឡើង ទី១ ហេតុអ្វីបានជាអង្គការ Opep មិនសម្រេចរបៀបនេះតាំងពីយូរ និងទី២ តើកិច្ចព្រមព្រៀងមួយនេះនឹងអាចជួយឲ្យតម្លៃប្រេងនៅលើទីផ្សារអន្តរជាតិងើបឡើងវិញដូចតម្លៃជាង ១០០ដុល្លារក្នុង ១បារីលដែរ ឬទេ?។
ពិតណាស់ថា តម្លៃប្រេងធ្លាក់ថ្លៃ វាជាដំណឹងល្អមួយសម្រាប់អ្នកប្រើប្រាស់ តែវាជាក្តីបារម្ភខ្លាំងណាស់ចំពោះអ្នកមានប្រេងលក់។ ក្រុមប្រទេសសមាជិកអង្គការ Opep ពិតជាយល់មិនច្រឡំទេថា មានតែការកាត់បន្ថយបរិមាណបូមទេ ទើបគេអាចជួយដំឡើងតម្លៃប្រេងឡើងវិញបាន។ តែគេមិនត្រូវភ្លេចនិយាយទេថា ប្រទេសសមាជិកអង្គការ Opep ពិបាកនិយាយចុះសម្រុងគ្នាក្នុងការស្វែងរកកុងសង់ស៊ុសរួមមួយដែលអាចទទួលយកបានទាំងអស់គ្នា។ ឧបសគ្គចម្បង គឺការច្រណែនគ្នា និងការប្រជែងឥទ្ធិពលគ្នា ពិសេសរវាងប្រទេសអារ៉ាប៊ីសាអូឌីត និងអ៊ីរ៉ង់ដែលជាមហាអំណាចក្នុងតំបន់ និងជាប្រទេសជង្រុកប្រេងដ៏សំខាន់។
អារ៉ាប៊ីសាអូឌីតតែងតែបានបញ្ជាក់ជាច្រើនដងថា ខ្លួនមិនជំទាស់នឹងការកាត់បន្ថយបរិមាណបូមប្រេងទេ ប្រសិនបើអ៊ីរ៉ង់យល់ព្រមធ្វើដូចគ្នា។ តែអ៊ីរ៉ង់តែងតែបដិសេធដោយលើកយកហេតុផលទៅពន្យល់ថា អត្រានៃការបូមរបស់ខ្លួននៅទាបខ្លាំងណាស់ បើធៀបនឹងអត្រានៅមុនពេលទទួលទ័ណ្ឌកម្មសេដ្ឋកិច្ចអន្តរជាតិដោយសារសំណុំរឿងនុយក្លេអ៊ែរ និយាយឲ្យស្រួលយល់ អ៊ីរ៉ង់ត្រូវការបូមសងសឹកឲ្យទាន់គេឯង។ នៅមួយថ្ងៃ មុនកិច្ចប្រជុំរបស់អង្គការ Opep ក្រៅផ្លូវការក្នុងទីក្រុងអាល់ហ្សេ ប្រទេសអាល់ហ្សេរីកាលពីថ្ងៃទី២ កញ្ញា រដ្ឋមន្រ្តីក្រសួងថាមពលអ៊ីរ៉ង់បានបញ្ជាក់ច្បាស់ៗថា កិច្ចព្រមព្រៀងមិនមែនជារបៀបវារៈនៃកិច្ចប្រជុំ ហើយគេក៏មិនត្រូវរង់ចាំលទ្ធផលអ្វីដុំកំភួនពីកិច្ចប្រជុំនោះដែរ។
តែគួរឲ្យភ្ញាក់ផ្អើល និងខុសពីអ្វីដែលគ្រប់គ្នាបានរង់ចាំ កិច្ចប្រជុំរបស់អង្គការ Opep បានឯកភាពគ្នាលើកិច្ចព្រមព្រៀងមួយជាគោលការណ៍។ នៅក្នុងកិច្ចព្រមព្រៀងជាគោលការណ៍នោះ អង្គការ Opep បានយល់ព្រមកាត់បន្ថយបរិមាណបូម និងអនុញ្ញាតឲ្យប្រទេសសមាជិកចំនួន ៣ អាចបន្តបូមក្នុងកម្រិតអតិបរមារបស់ខ្លួន គឺអ៊ីរ៉ង់ នីហ្សេរីយ៉ា និងប្រទេសលីប៊ី។ រូបលោករដ្ឋមន្រ្តីថាមពលអារ៉ាប៊ីសាអូឌីតបានលើកហេតុផលទៅពន្យល់ថា ការយល់ព្រមឲ្យអ៊ីរ៉ង់បន្តបូមក្នុងកម្រិតអតិបរមា មកពីអ៊ីរ៉ង់ជាប្រទេសដែលមានភាពយឺតយ៉ាវដោយសារជាប់ទ័ណ្ឌកម្មសេដ្ឋកិច្ចអន្តរជាតិអស់រាប់សិបឆ្នាំ ចំណែកនីហ្សេរីយ៉ា ព្រោះជាប្រទេសដែលបានរងការវាយប្រហារពីពួកឧទ្ទាមលើស្ថានីយ៍បូមប្រេង ហើយសម្រាប់លីប៊ី ព្រោះជាប្រទេសដែលកំពុងផុងខ្លួនក្នុងសង្រ្គាមស៊ីវិល។
តាមរយៈការពន្យល់របស់រដ្ឋមន្រ្តីថាមពលអារ៉ាប៊ីសាអូឌីតរូបនេះនាំឲ្យគេយល់បានភ្លាមថា នៅទីបំផុត អារ៉ាប៊ីសាអូឌីតបានបន្ទន់ឥរិយាបទដោយយល់ព្រមធ្វើសម្បទានឲ្យអ៊ីរ៉ង់។ សួរថា ហេតុអ្វីបានជាអារ៉ាប៊ីសាអូឌីតបានប្តូរជំហរ ១៨០អង្សាររបៀបនេះ?
ពិតជាគ្មានអ្វីពិបាកយល់ឡើយ ព្រោះអារ៉ាប៊ីសាអូឌីតត្រូវការលុយជាបន្ទាន់ដើម្បីស្រោចស្រង់ស្ថានភាពសេដ្ឋកិច្ចដែលកំពុងដុនដាបខ្លាំង។ អារ៉ាប៊ីសាអូឌីតក៏ដូចជាប្រទេសសមាជិកផ្សេងក្នុងអង្គការ Opep ដែរ បានពឹងសឹងតែទាំងស្រុងលើចំណូលបានមកពីការលក់ប្រេង។ តែតាំងពីប្រេងធ្លាក់ថ្លៃខ្លាំងជាង ២ឆ្នាំកន្លងទៅមក ប្រទេសថៅកែប្រេងក្នុងលោកមួយនេះកំពុងត្រដរខ្យល់ជាមួយនឹងឱនភាពថវិកាឡើងដល់ ៩៨ ០០០លានដុល្លារក្នុងឆ្នាំ ២០១៥។ ចុងក្រោយនេះ រដ្ឋាភិបាលទីក្រុងរីយ៉ាដបានចាត់វិធានការមួយចំនួន ដូចយ៉ាងចាយត្បិតត្បៀត និងកាត់បន្ថយប្រាក់ខែមន្រ្តីរាជការ។
ជម្រើសចុងក្រោយដោយកាត់កេរ្តិ៍ កាត់ខ្មាស់ និងដើម្បីបានខ្យល់អុកស៊ីសែនថ្មី អារ៉ាប៊ីសាអូឌីតបានបន្ទន់ឥរិយាបទនៅចំពោះមុខអ៊ីរ៉ង់ដែលជាគូប្រជែង ស៊ីសាច់ហុតឈាម។ មហិច្ឆតានយោបាយក្នុងតំបន់នៅតែមានសម្រាប់អារ៉ាបប៊ីសាអូឌីត តែនៅចំពោះមុខ បញ្ហាក្រពះជារឿងចម្បងដែលត្រូវដោះស្រាយជាបន្ទាន់។ គេត្រូវរង់ចាំជំនួបកំពូលរបស់អង្គការ Opep នៅខែវិច្ឆិកាខាងមុខដែលនឹងកំណត់ច្បាស់ពីកូតានៃការបូមប្រេងរបស់ប្រទេសសមាជិកនីមួយៗដោយសង្ឃឹមថា តម្លៃប្រេងនឹងអាចវិលរកតម្លៃដើមរបស់វាវិញ ឬយ៉ាងហោចណាស់ ក៏មិនធ្លាក់ថ្លៃបន្ថែមទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ