ហេតុអ្វីបានជាអ៊ីស្រាអែលក្តៅក្រហាយ កើតទុក្ខមិនសុខចិត្តនឹងសេចក្តីសម្រេចរបស់ក្រុមប្រឹក្សាសន្តិសុខ?
ចុះផ្សាយនៅថ្ងៃ៖
ស្តាប់ - ០៥:២៥
នៅក្នុងប្រទេសអ៊ីស្រាអែល រដ្ឋាភិបាលរបស់លោកនាយករដ្ឋមន្រ្តីបិនយ៉ាមីន នេតាន់យ៉ាហ៊ូកំពុងបន្តបញ្ចេញប្រតិកម្មប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រ ទី២៣ ធ្នូ។ ក្រៅពីកោះហៅក្រុមប្រទេសដែលបានបោះឆ្នោតគាំទ្រសេចក្តីសម្រេចនោះទៅសួរ អ៊ីស្រាអែលក៏បានចេញមុខវ៉ៃប្រហារលើរដ្ឋបាលអាមេរិករបស់លោកអូបាម៉ាដែរ។ ហេតុអ្វីបានជាអ៊ីស្រាអែលក្តៅក្រហាយនឹងសេចក្តីសម្រេចរបស់ក្រុមប្រឹក្សាសន្តិសុខខ្លាំងម្ល៉េះ?
តាំងពី ២ថ្ងៃមកហើយដែលអ៊ីស្រាអែលដេកមិនលក់ បក់មិនល្ហើយ និងបន្តបរិហារលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិអនុម័តក្នុងថ្ងៃសុក្រ ទី២៣ ធ្នូ។ ដេកមិនលក់ បក់មិនល្ហើយ ព្រោះជាសេចក្តីសម្រេចចិត្តដែលបានទាមទារឲ្យអ៊ីស្រាអែលបញ្ឈប់ជាបន្ទាន់នូវការបន្តសាងសង់ និងការតាំងលំនៅឋាននៅក្នុងដែនដីរបស់ប៉ាឡេស្ទីន។ នៅយប់ថ្ងៃអាទិត្យ ទី២៥ ធ្នូចំថ្ងៃបុណ្យណូអែល ក្រសួងការបរទេសអ៊ីស្រាអែលបានកោះហៅឯកអគ្គរដ្ឋទូត និងឯកអគ្គរាជទូតបរទេសប្រចាំអ៊ីស្រាអែលចំនួន ១០នាក់ឲ្យចូលជួប សួរនាំ។
នៅចំពោះមុខឯកអគ្គរដ្ឋទូត និងឯកអគ្គរាជទូតបរទេសទាំង ១០នាក់ ក្រសួងការបរទេសអ៊ីស្រាអែលបានសម្តែងការមិនសប្បាយចិត្តចំពោះទង្វើរបស់ប្រទេសគេដែលបានបោះឆ្នោតគាំទ្រលើសេចក្តីសម្រេចចិត្ត និងចង់ដឹងថា ហេតុអ្វីបានជាពួកគេបានបោះឆ្នោតគាំទ្រ។ សូមរម្លឹកជូនថា សេចក្តីសម្រេចចិត្តនោះត្រូវបានបោះឆ្នោតគាំទ្រដោយ១៤ប្រទេសជាសមាជិកក្រុមប្រឹក្សាសន្តិសុខ តែការដែលអ៊ីស្រាអែលបានកោះហៅអ្នកតំណាងតែ ១០ប្រទេសក៏ដោយសារថា មាន៤ប្រទេសមិនមានទំនាក់ទំនងផ្លូវទូតជាមួយអ៊ីស្រាអែល ឬមួយក៏មានអ្នកតំណាងប្រចាំនៅអ៊ីសា្រអែលទេ។
អ្វីជាការកត់សម្គាល់ នៅក្នុងចំណោមឯកអគ្គរដ្ឋទូត និងឯកអគ្គរាជទូតបរទេសដែលអ៊ីស្រាអែលកោះហៅឲ្យចូលជួប មានតែឯកអគ្គរដ្ឋទូតអាមេរិកម្នាក់គត់ដែលបានជួបសន្ទនាផ្ទាល់ជាមួយលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូ។ បន្ទាប់នៅថ្ងៃចន្ទ ទី២៦ ធ្នូនាកិច្ចប្រជុំគណៈរដ្ឋមន្រ្តី លោកនេតាន់យ៉ាហ៊ូបានបន្តចេញមុខបរិហារលើសេចក្តីសម្រេចចិត្តរបស់ក្រុមប្រឹក្សាសន្តិសុខជាថ្មីម្តងទៀត ដោយធ្វើការវាយប្រហារពាក្យសម្តីត្រង់លើលោកប្រធានាធិបតីអាមេរិកអូបាម៉ាតែម្តង។
តាមលោកនេតាន់យ៉ាហ៊ូ រដ្ឋបាលអាមេរិករបស់លោកអូបាម៉ាជាអ្នកផ្តួចផ្តើមគំនិតឲ្យមានសំណើប្រឆាំងអ៊ីស្រាអែល ជាអ្នកគាំទ្រចេញមុខ និងជាអ្នកដែលបានជំរុញប្រទេសសមាជិកផ្សេងឲ្យបោះឆ្នោតគាំទ្រលើសេចក្តីសម្រេចចិត្តនោះ។ ថ្លែងជាភាសាកំណើត និងភាសាអង់គ្លេស លោកនេតាន់យ៉ាហ៊ូចង់បញ្ជូនសារទៅកាន់ពលរដ្ឋអាមរិក និងប្រទេសដៃគូរបស់អាមេរិកឲ្យដឹងពីកំហឹងរបស់អ៊ីស្រាអែលដោយបញ្ជាក់ថា មិនមែនទង្វើរបៀបនេះទេដែលគេត្រូវធ្វើជាមួយសម្ព័ន្ធមិត្ត និងថា គេមិនដែលចាប់បញ្ជូនមិត្តភក្តិទៅកាន់ក្រុមប្រឹក្សាសន្តិសុខដូចដែលអាមេរិកបានធ្វើចំពោះអ៊ីស្រាអែលពេលនេះទេ។
សូមជម្រាបជូនថា នេះជាលើកទី១ គិតតាំងពីឆ្នាំ ១៩៧៩ ដែលក្រុមប្រឹក្សាសន្តិសុខបានអនុម័តលើសេចក្តីសម្រេចចិត្តមួយដែលទាមទារឲ្យអ៊ីស្រាអែលបញ្ឈប់ជាបន្ទាន់នូវការបន្តសាងសង់ និងការតាំងលំនៅឋាននៅក្នុងដែនដីរបស់ប៉ាឡេស្ទីន។ ការដែលលោកនេតាន់យ៉ាហ៊ូបានខឹងច្រឡោតខ្លាំង និងចង្អុលមុខដាក់រដ្ឋបាលអាមេរិករបស់លោកអូបាម៉ាក៏ដោយសារថា អាមេរិកមិនបានប្រើសិទ្ធិវ៉េតូប្រឆាំងនឹងសេចក្តីសម្រេចចិត្តនោះដូចដែលខ្លួនធ្លាប់បានចេញមុខការពារអ៊ីស្រាអែលរហូតមកដល់សព្វថ្ងៃទេ។ តើអាមេរិកមិនមែនកំពុងដោះដៃចោលសម្ព័ន្ធមិត្តមួយនេះរបស់ខ្លួនទេ ឬយ៉ាងណា?។
មិនបាច់ផ្តល់ចម្លើយក៏គេដឹងដែរថា គ្មានថ្ងៃដែលអាមេរិកបោះបង់ចោលអ៊ីស្រាអែលដែលជាសម្ព័ន្ធមិត្តប្រពៃណី និងចាក់ទឹកមិនលេចមួយនេះរបស់ខ្លួនទេ ហើយអ៊ីស្រាអែលក៏បានដឹងច្បាស់ណាស់ចំពោះរឿងនេះ។ តែបញ្ហានៅត្រង់ថា រដ្ឋបាលអាមេរិករបស់លោកអូបាម៉ាកំពុងទើសទាល់ចិត្តខ្លាំងក្នុងរឿងដែលអ៊ីស្រាអែលបន្តធ្វើអាណានិគមលើទឹកដីប៉ាឡេស្ទីន។ គឺទង្វើរបស់អ៊ីស្រាអែលមួយនេះហើយដែលបានធ្វើឲ្យផែនការស្វែងរកសន្តិភាពឲ្យគូបដិបក្ខអ៊ីស្រាអែល ប៉ាឡេស្ទីនរបស់លោកអូបាម៉ាទទួលបរាជ័យ។ តាំងពីចូលកាន់តំណែងក្នុងឆ្នាំ ២០០៩ លោកអូបាម៉ាបានសន្យាសម្រេចឲ្យបាននូវកិច្ចព្រមព្រៀងសន្តិភាពមួយរវាងអ៊ីស្រាអែល និងប៉ាឡេស្ទីន តែកាន់តំណែងជិតចប់អាណត្តិទី២ ទៀតទៅហើយ សូម្បីតែស្រមោលនៃកិច្ចព្រមព្រៀងសន្តិភាពក៏លែងមានដែរ។
ជាការពិត សេចក្តីសម្រេចចិត្តរបស់ក្រុមប្រឹក្សាសន្តិសុខកាលពីថ្ងៃសុក្រ ទី២៣ ធ្នូ មិនបានចែងពីការដាក់ទ័ណ្ឌកម្មអ្វីទេ ប្រសិនបើអ៊ីស្រាអែលមិនគោរពតាមនោះ។ តែគេត្រូវហ៊ាននិយាយថា សេចក្តីសម្រេចចិត្តមួយនេះជាសម្ពាធនយោបាយមួយយ៉ាងធ្ងន់ចំពោះរដ្ឋាភិបាលអ៊ីស្រាអែលរបស់លោកនេតាន់យ៉ាហ៊ូ ពិសេសនឹងអាចបើកផ្លូវឲ្យមានការអូស ក ថ្នាក់ដឹកនាំអ៊ីសា្រអែលទៅកាត់ទោសនៅតុលាការព្រហ្មទ័ណ្ឌអន្តរជាតិ និងការធ្វើពហិការលើផលិតផលរបស់អាណានិគមជនអ៊ីស្រាអែលដែលរស់លើទឹកដីប៉ាឡេស្ទីនដោយខុសច្បាប់។
គឺការបន្តអនុវត្តន៍នយោបាយអាណានិគមលើទឹកដីប៉ាឡេស្ទីនរបស់លោកនេតាន់យ៉ាហ៊ូនេះឯងដែលបានបំផុសឲ្យមានមន្ទិលសង្ស័យលើឆន្ទៈស្វែងរកសន្តិភាពរបស់ភាគីអ៊ីស្រាអែលជាមួយភាគីប៉ាឡេស្ទីន។ ដូច្នេះចង់ ឬមិនចង់ សេចក្តីសម្រេចចិត្តនេះអាចជាការដាស់សតិអ៊ីស្រាអែលឲ្យពិនិត្យមើលឡើងវិញនូវនយោបាយអាណានិគមរបស់ខ្លួន ហើយក៏ជាបច្ច័យថ្មីជួយលើកទឹកចិត្តដល់ក្រុមប្រទេសដែលតស៊ូដើម្បីបុព្វហេតុប្រជាជនប៉ាឡេស្ទីនដែរ។ ប៉ាឡេស្ទីនដែលបន្តិចម្តងៗ បានបង្វែរសង្រ្គាមប្រឆាំងអ៊ីស្រាអែលនៅលើសមរភូមិ និងនៅតុចរចាមួយទល់មួយទៅជាសង្រ្គាមការទូតនៅលើឆាកអន្តរជាតិវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ