គូសត្រូវអារ៉ាប៊ីសាអូឌីត និងអ៊ីស្រាអែលកំពុងចាប់ដៃគ្នាដើម្បីប្រឆំាងសត្រូវរួមក្នុងតំបន់ គឺអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៥:០១
កាលពីថ្ងៃព្រហស្បតិ៍ ទី៤ មិថុនាសប្តាហ៍កន្លងទៅ មានបែកធ្លាយព័ត៌មានឲ្យដឹងថា អ្នកតំណាងប្រទេសអ៊ីស្រាអែល និងអ្នកតំណាងប្រទេសអារ៉ាប៊ីសាអូឌីតបានជួបចរចាគ្នាស្ងាត់ៗនៅក្នុងទីក្រុងវ៉ាស៊ីនតោន សហរដ្ឋអាមេរិក។ ភាគីអ៊ីស្រាអែលតំណាងដោយអតីតឯកអគ្គរដ្ឋទូត រីឯភាគីអារ៉ាប៊ីសាអូឌីតបានតំណាងដោយអតីតឧត្តមសេនីយ។ ក្រៅពីវត្តមានអ្នកតំណាងនៃប្រទេសគូសត្រូវទំាងពីរ ក៏មានវត្តមានពីភាគីអាមរិកំាងដែរ។ កម្មវត្ថុនៃជំនួបរវាងគូសត្រូវទំាងពីរ អ៊ីស្រាអែល និងអារ៉ាប៊ីសាអូឌីតមិនមែនដើម្បីស្វែងរកការផ្សះផ្សាគ្នាទេ តែដើម្បីប្រឆំាងនឹងសត្រូវរួមក្នុងតំបន់ គឺប្រទេសអ៊ីរ៉ង់។
សត្រូវនៅតែជាសត្រូវ តែនៅពេលណាដែលសត្រូវទំាងពីរមានសត្រូវរួមដូចគ្នាដែលត្រូវប្រឆំាង គេក៏អាចចាប់ដៃគ្នាមួយរយៈដើម្បីចាត់ការលើសត្រូវរួមជាមុនសិន មុននឹងវិលមកពាក់មុខយក្សដាក់គ្នាជាថ្មី។ ករណីនេះបាន និងកំពុងអនុវត្តន៍ដោយប្រទេសអារ៉ាប៊ីសាអូឌីត និងប្រទេសអ៊ីស្រាអែលដែលកំពុងបន្តជាសត្រូវនឹងគ្នាមកដល់សព្វថ្ងៃ។ អារ៉ាប៊ីសាអូឌីត ក៏ដូចជាក្រុមប្រទេសអារ៉ាប់ភាគច្រើននៅក្នុងតំបន់ បានបន្តចេញមុខប្រឆំាងនឹងអ៊ីស្រាអែល និងមិនព្រមទទួលស្គាល់រដ្ឋជ្វីហ្វមួយនេះ ដោយសារតែអ៊ីស្រាអែលបន្តរារំាងមិនឲ្យប៉ាឡេស្ទីនបង្កើតរដ្ឋស្របច្បាប់ និងការដែលរដ្ឋាភិបាលអ៊ីស្រាអែលបន្តសាងសង់លំនៅដ្ឋានឲ្យពលរដ្ឋខ្លួននៅក្នុងទឹកដីប៉ាឡេស្ទីន។
តែគេក៏មិនត្រូវភ្លេចនិយាយទេថា អ៊ីស្រាអែល និងអារ៉ាប៊ីសាអូឌីតកំពុងមានសត្រូវរួមដូចគ្នានៅក្នុងតំបន់ នោះគឺប្រទេសអ៊ីរ៉ង់។ អ៊ីស្រាអែល និងអារ៉ាប៊ីសាអូឌីតបានយល់យ៉ាងច្បាស់ថា ខ្លួនកំពុងជាសត្រូវនឹងគ្នា និងកំពុងមិនចុះសម្រុងគ្នានៅលើបញ្ហាមួយចំនួននៅក្នុងតំបន់ តែមិនរហូតដល់ចាត់ទុកគ្នាជាសត្រូវស៊ូពូជនោះទេ។ អ៊ីស្រាអែលបានទទួលស្គាល់ថា ប្រទេសដែលប្រកបដោយគ្រោះថ្នាក់ និងកំពុងគំរាមកំហែងលើសន្តិសុខរបស់ខ្លួន គឺមិនមែនអារ៉ាប៊ីសាអូឌីតទេ តែប្រទេសអ៊ីរ៉ង់។ ចំណែកអារ៉ាប៊ីសាអូឌីតក៏បានគិតដូចគ្នាអ៊ីចឹងដែរ។ គឺនៅក្នុងន័យនេះហើយបានជាអ៊ីស្រាអែល និងអារ៉ាប៊ីសាអូឌីតបានព្យាយាមខំាមាត់ សង្កត់ចិត្តបំភ្លេចមួយរយៈភាពជាសត្រូវរវាងគ្នាដើម្បីពួតដៃវ៉ៃសត្រូវរួមក្នុងតំបន់ គឺអ៊ីរ៉ង់។
តាមពិតទៅ ព័ត៌មានជុំវិញរឿងអ៊ីស្រាអែល និងអារ៉ាប៊ីសាអូឌីតបានលួចចរចាគ្នាស្ងាត់ៗដើម្បីរកមធ្យាបាយប្រឆំាងទប់នឹងឥទ្ធិពល និងការគំរាមកំហែងរបស់អ៊ីរ៉ង់មិនមែនទើបតែកើតមាននៅថ្ងៃម្សិលមិញ ឬមួយក៏ថ្ងៃនេះឯណា តែប្រហែលជាបានកើតមានតំាងពីដើមឆ្នំា ២០១៤ មកម្ល៉េះ។ ក្នុងរយៈពេល ១ឆ្នំាកន្លះកន្លងទៅ ភាគីគូសត្រូវទំាងពីរបានជួបចរចាគ្នាដោយសម្ងាត់យ៉ាងតិច ៥ដងដើម្បីនិយាយពីអ៊ីរ៉ង់ដែលជាសត្រូវរួមទី១ របស់ខ្លួននៅក្នុងតំបន់។ មួយវិញទៀត កិច្ចចរចាកាន់តែបង្កើនល្បឿនទៅមុខបន្ថែមទៀត នៅពេលដែលសហគមន៍អន្តរជាតិ មានអាមេរិកដឹកមុខ និងអ៊ីរ៉ង់កំពុងបង្កើនល្បឿនកិច្ចចរចាក្នុងគោលដៅសម្រេចឲ្យបាននូវកិច្ចព្រមព្រៀងស្ថាពរមួយឲ្យបានមុនថ្ងៃទី៣០ មិថុនាខាងមុខស្តីពីនុយក្លេអ៊ែរអ៊ីរ៉ង់ដ៏ចម្រូងចម្រាស។
គឺទើបតែនៅក្រោយកិច្ចចរចាជាថ្មីរវាងអ៊ីស្រាអែល និងអារ៉ាប៊ីសាអូឌីតក្នុងទីក្រុងវ៉ាស៊ីនតោន សហរដ្ឋមេរិកនាថ្ងៃព្រហស្បតិ៍ ទី៤ មិថុនាកន្លងទៅថ្មីៗនេះទេដែលព័ត៌មានសម្ងាត់មួយនេះត្រូវបានបែកធ្លាយជាផ្លូវការ។ អ្នកដែលទម្លាយឲ្យដឹងព័ត៌មានសម្ងាត់នេះជាផ្លូវការ គឺគ្មាននរណាក្រៅពីសាមីខ្លួនអ្នកចរចាផ្ទាល់អ៊ីស្រាអែលតំណាងដោយអតីតឯកអគ្គរដ្ឋទូត និងអារ៉ាប៊ីសាអូឌីតតំណាងដោយអតីតឧត្តមសេនីយនោះទេ ព្រោះនៅចុងបញ្ចប់នៃកិច្ចចរចា ឥស្សរជនទំាងពីររូបបានឈរថតបង្ហាញមុខរួមគ្នាជាលើកទី១ និងដែលរូបភាពនោះត្រូវបានមធ្យោបាយឃោសនាមហាជនយកទៅចុះផ្សាយយ៉ាងព្រោងព្រាត។
អ្វីដែលគ្រប់គ្នាកំពុងចង់ដឹង ចង់ឮពេលនេះគឺថា តើអ៊ីស្រាអែល និងអារ៉ាប៊ីសាអូឌីតបាននិយាយគ្នាពីរឿងអ្វីខ្លះ និងសម្រេចបានអ្វីខ្លះនៅក្នុងកិច្ចចរចាកន្លងមក?
បើគេជឿលើសម្តីរបស់ប្រតិភូអ៊ីស្រាអែលម្នាក់ដែលបានចូលរួមដោយផ្ទាល់នៅក្នុងកិច្ចចរចាឲ្យដឹងថា អ៊ីស្រាអែល និងអារ៉ាប៊ីសាអូឌីតបានចុះហត្ថលេខាលើកិច្ចព្រមព្រៀងមួយស្តីពីភាពចំាបាច់ក្នុងការប្រឈមទប់នឹងការគំរាមកំហែងរបស់អ៊ីរ៉ង់។ គេពិតជាមិនអាចផ្ទៀងផ្ទាត់ព័ត៌មាននេះបានឡើយ តែបើពិតដូច្នោះមែន នេះជាព្រឹត្តិការណ៍ទី១ មិនធ្លាប់មានរវាងអ៊ីស្រាអែល និងអារ៉ាប៊ីសាអូឌីតដែលគ្មានទំនាក់ទំនងការទូតរវាងគ្នា តែមានសត្រូវរួមគ្នានៅក្នុងតំបន់។ ជាការពិត អ្វីដែលសហគមន៍អន្តរជាតិកំពុងប្រឹងប្រែងស្វែងរកកិច្ចព្រមព្រៀងជាមួយអ៊ីរ៉ង់ពេលនេះ គឺទប់ស្កាត់កុំឲ្យអ៊ីរ៉ង់បំពាក់អាវុធបរិមាណូ។
តែបញ្ហានៅត្រង់ថា អ៊ីស្រាអែល និងអារ៉ាប៊ីសាអូឌីតមិនបានយល់ឃើញដូច្នោះឯណា ព្រោះអ្វីដែលគូសត្រូវទំាងពីរកំពុងបារម្ភខ្លំាងនោះ គឺខ្លាចតែការខិតខំប្រឹងប្រែងរបស់លោកប្រធានាធិបតីអាមេរិកអូបាម៉ាបែរជាជួយបង្កើនឥទ្ធិពលអ៊ីរ៉ង់ឲ្យប្រឆំាងនឹងខ្លួនទៅវិញ ពិសេសអនុញ្ញាតឲ្យរបបសាធារណរដ្ឋអ៊ីស្លាមអ៊ីរ៉ង់ក្លាយជារដ្ឋនុយក្លេអ៊ែរ និងបង្កឲ្យមានការប្រកួតប្រជែងគ្រឿងសព្វាវុធនៅក្នុងតំបន់ទៅវិញ។ ក្រុមអ្នកជំនាញបានយល់ឃើញថា គឺដោយសារតែមើលឃើញពីប្រយោជន៍រួមនៅក្នុងតំបន់ដែលអ៊ីស្រាអែល និងអារ៉ាប៊ីសាអូឌីតបង្ខំចិត្តជ្រលក់មាត់រកគ្នា ពិសេសទាក់ទងនឹងសំណុំរឿងសំខាន់ពីរ គឺការគំរាមកំហែងរបស់អ៊ីរ៉ង់ និងអស្ថិរភាពក្នុងតំបន់បង្កដោយពួកអ៊ីស្លាមជ្រុលនិយម។
តែយ៉ាងណាក៏ដោយ និងបើទោះបីជាអ៊ីស្រាអែល និងអារ៉ាប៊ីសាអូឌីតកំពុងសម្លឹងឃើញប្រយោជន៍រួមដូចគ្នា ពិសេសមានសត្រូវតែមួយដែលត្រូវកំចាត់រួមគ្នានៅក្នុងតំបន់ក៏ដោយ ក៏គ្មានសញ្ញាវិជ្ជមានណាមួយដែលអាចបញ្ជាក់ពីការបើកផ្លូវឲ្យគូសត្រូវទំាងពីរឆ្ពោះទៅភ្ជាប់ទំនាក់ទំនងប្រក្រតីរវាងគ្នាបានឡើយ ល្គឹកណាជម្លោះរុំារ៉ៃអ៊ីស្រាអែល ប៉ាឡេស្ទីននៅមិនទាន់ដោះស្រាយចប់សព្វគ្រប់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ