សង្រ្គាមក្នុងប្រទេសស៊ីរីកំពុងបង្កចេញជាដំបៅរលួយបន្តិចម្តងៗនៅក្នុងប្រទេសលីបង់!
ចុះផ្សាយនៅថ្ងៃ៖
ស្តាប់ - ០៥:២៩
អស់រយៈពេលជាង ៣ឆ្នំាមកហើយដែលប្រទេសស៊ីរីបានធ្លាក់ក្នុងសង្រ្គាមស៊ីវិល និងដែលវិបត្តិមួយនេះបាន និងកំពុងអូសបន្លាយគ្មានច្រកចេញ។ ទន្ទឹមគ្នានេះ ប្រជាជនស៊ីវិលស្លូតត្រង់ក៏កំពុងធ្វើដំណើរចាកចេញពីតំបន់ជម្លោះទៅកាន់កន្លែងផ្សេង និងដែលមានអ្នកខ្លះបានសម្រេចចាកចេញពីប្រទេសកំណើតទៅកាន់ប្រទេសជិតខាងតែម្តង។ ប្រទេសដែលបានទទួលជនភៀសខ្លួនស៊ីរីឲ្យជ្រកកោនច្រើនជាងគេ ច្រើនជាប្រទេសក្នុងតំបន់ មានដូចជាហ៊្សកដានី តួកគី អ៊ីរ៉ាក់ អេហ្ស៊ីប ឬមួយក៏ប្រទេសលីបង់ជាដើម។ ប្រទេសលីបង់តែមួយបានទទួលជនភៀសខ្លួនស៊ីរីឲ្យជ្រកកោនជាង ១លាននាក់។ តែសព្វថ្ងៃ រដ្ឋអំណាចលីបង់នៅតាមព្រំដែនជាមួយស៊ីរីកំពុងក្រពុលមុខនឹងទង្វើលួចប្លន់ និងបទឧក្រិដ្ឋផ្សេងៗដែលបង្កឲ្យជនភៀសខ្លួនស៊ីរី។ តើលីបង់មិនមែនកំពុងទទួលថ្មបាក់ដោយសារចិត្តមនុស្សធម៌របស់ខ្លួនទេ ឬយ៉ាងណា?
« គេត្រូវចេះជួយគ្នាទៅវិញ ទៅមកនៅពេលមានអាសន្នអន់ក្រ » នេះជាសុភាសិតមួយដែលមនុស្សលោកម្នាក់ៗត្រូវប្រកាន់យក និងដែលប្រទេសលីបង់បានអនុវត្តន៍ជាក់ស្តែងក្នុងការជួយស្រោចស្រង់ជីវិតប្រជាជនស៊ីរីដែលបាននំាគ្នារត់គេចពីសង្រ្គាមស៊ីវិល។ បច្ចុប្បន្ននេះ គ្រាន់តែប្រទេសលីបង់ម្នាក់ឯងបានទទួលយកជនភៀសខ្លួនស៊ីរីយ៉ាងតិច ១លាន ៥សែននាក់ ពោលស្មើនឹង ១ភាគ៤នៃប្រជាជនសរុបរបស់ខ្លួនទៅហើយ។ តើទង្វើមួយនេះ មិនមែនជាទង្វើមនុស្សធម៌ទេ ឬយ៉ាងណា។ វាពិតជាទង្វើល្អមួយដែលគ្មាននរណាម្នាក់ហ៊ាននិយាយផ្ទុយបានទេ តែបញ្ហានៅត្រង់ថា បន្តិចម្តងៗ រដ្ឋអំណាចក្នុងស្រុកលីបង់នៅតាមព្រំដែនដែលទទួលជនភៀសខ្លួនស៊ីរីឲ្យជ្រកកោនបែរជាកំពុងទទួលផលវិបាកបង្កឡើងដោយជនភៀសខ្លួនទំាងនោះទៅវិញ ដូចយ៉ាងអំពើលួច ប្លន់ និងបទឧក្រិដ្ឋផ្សេងៗ។
អ៊ីចឹងហើយបានជានៅពេលនេះ រដ្ឋអំណាចបានសម្រេចចាត់វិធានការមួយចំនួនដោយផ្តើមដំបូង ដាក់បម្រាមគោចរហាមមិនឲ្យមានការដើរហើរចម្លោះពីម៉ោង ១០យប់ទៅទល់នឹងម៉ោង ៦ភ្លឺ។ ទោះបីជាបម្រាមគោចរនោះមិនបានដាក់សំដៅលើក្រុមណាក៏ដោយ ក៏ប្រជាជនលីបង់ក្នុងស្រុកយល់ភ្លាមថា គឺសំដៅលើជនភៀសខ្លួនស៊ីរីនោះឯង។ អ៊ីចឹងហើយបានជាមានការលើកឡើងថា នេះជាទង្វើប្រកាន់ពូជសាសន៍។ វាដូចជាប្រកាន់ពូជសាសន៍បន្តិចមែន នេះជាការប្រកាសទទួលស្គាល់ដោយលោករដ្ឋមន្រ្តីក្រសួងការងារលីបង់។ តែលោករដ្ឋមន្រ្តីក៏បានបញ្ជាក់ថា បើគ្មានទង្វើលួច ប្លន់ និងបទឧក្រិដ្ឋផ្សេងៗទេ ក៏គ្មានវិធានការបម្រាមគោចរនេះដែរ។
តាមពិតទៅ កាយវិការប្រឆំាងជនភៀសខ្លួនស៊ីរីដោយប្រយោលនៅលីបង់ពេលនេះបានផ្តើមកើតមានឡើង ក្រោយពីមានឃាតកម្មសម្លាប់ទាហានលីបង់ចំនួន ១៨នាក់ដោយពួកជីហាតស៊ីរីដែលបន្លំខ្លួនឆ្លងចូលក្នុងតំបន់ជនភៀសខ្លួនស៊ីរីក្នុងទឹកដីលីបង់។ ភាពតានតឹងបានកើនឡើងមួយកម្រិតទៀត នៅពេលដែលក្រុមជីហាតរបស់ចលនារណសិរ្យអាល់ណូស្រា និងអង្គការរដ្ឋអ៊ីស្លាមបានសម្លាប់ទាហានលីបង់ទំាង ២៩នាក់ដែលពួកគេបានចាប់ជាចំណាប់ខ្មំាង។ អ្វីដែលពួកជីហាតបានទាមទារ គឺសុំឲ្យរដ្ឋាភិបាលលីបង់ដោះលែងគ្នីគ្នាគេដែលកំពុងជាប់ក្នុងគុកលីបង់ និងដែលទីក្រុងបេរូតធ្លាប់បានបដិសេធមិនដោះលែងជាដាច់ខាតដោយលើកយកហេតុផលថា ពួកគេជាភេរវជន។ ដោយឡែក ក្រៅពីឈឺក្បាលដោយសាររឿងជនភៀសខ្លួនស៊ីរី លីបង់ក៏កំពុងបែកបាក់ផ្ទៃក្នុងដោយសារវិបត្តិនៅស៊ីរីដែរ។
នៅម្ខាង គឺក្រុមអ្នកកំពុងគំាទ្រពួកឧទ្ទាមស៊ីរីដែលប្រឆំាងនឹងរដ្ឋាភិបាលរបស់លោកប្រធានាធិបតីស៊ីរីអាសាដ និងនៅម្ខាងទៀត គឺក្រុមអ្នកដែលកំពុងកាន់ជើងលោកអាសាដប្រឆំាងនឹងពួកបះបោរ ដូចយ៉ាងពួកហេបូឡាលីបង់ជាដើម។ ផ្តើមចេញពីចំណុចនេះនំាឲ្យមានសំណួរចោទឡើងថា តើលីបង់ខ្លួនឯងមិនមែនកំពុងធ្វើដំណើរទៅរកសង្រ្គាមស៊ីវិលជាថ្មី ដោយសារវិបត្តិផ្ទៃក្នុងនៅស៊ីរីទេ ឬយ៉ាងណា ឬមួយក៏ថា តើលីបង់មិនមែនកំពុងទទួលថ្មបាក់ដោយសារចិត្តមនុស្សធម៌របស់ខ្លួនទេដឹង?។ សម្រាប់លោកដាណា ស្លេម៉ាន់ អ្នកនំាពាក្យរបស់ឧត្តមស្នងការសហប្រជាជាតិទទួលបន្ទុកជនភៀសខ្លួននៅលីបង់បានយល់ឃើញថា វិបត្តិផ្ទៃក្នុងនៅស៊ីរីពិតជាបានធ្វើឲ្យប៉ះពាល់ដល់នយោបាយផ្ទៃក្នុងលីបង់ តែមិនទាន់នំាលីបង់ឲ្យធ្លាក់ក្នុងសង្រ្គាមស៊ីវិលជាថ្មីទេ។
គួរជម្រាបជូនថា ប្រឈមមុខនឹងការហូរជនភៀសស៊ីរីចូលក្នុងទឹកដីខ្លួន រដ្ឋាភិបាលលីបង់បានសម្រេចបិទព្រំដែនតំាងពីដើមខែកញ្ញា ឆ្នំា ២០១៤ មកម្ល៉េះ។ តែក្តីកង្វល់របស់រដ្ឋាភិបាលលីបង់ពេលនេះ គឺចំនួនជនភៀសខ្លួនស៊ីរីពី ១លាន ៥សែន ទៅ ១លាន ៨សែននាក់ដែលកំពុងមានវត្តមានក្នុងទឹកដីលីបង់សព្វថ្ងៃ ព្រោះថាចង់ ឬមិនចង់ គឺពួកជនភៀសខ្លួនស៊ីរីនេះហើយដែលនឹងអាចក្លាយជាជនអន្តោប្រវេសន៍រស់នៅស្របច្បាប់ក្នុងទឹកដីលីបង់ និងវាយលុកចូលដណ្តើមទីផ្សារការងារពីប្រជាជនលីបង់។ រដ្ឋាភិបាលទីក្រុងបេរូតធ្លាប់បានទាញសញ្ញាអាសន្នរួចហើយថា វិបត្តិស៊ីរី និងវត្តមានជនភៀសខ្លួនស៊ីរីក្នុងទឹកដីខ្លួនបានធ្វើឲ្យសេដ្ឋកិច្ចលីបង់ធ្លាក់ចុះយ៉ាងខ្លំាង។ តំាងពីឆ្នំា ២០១១ មក លីបង់បានបាត់បង់កំណើនសេដ្ឋកិច្ចចំនួន ១០ពិន្ទុ ចំនួនអ្នកអត់ការងារធ្វើបានកើនបន្ថែម ៣៤ម៉ឺននាក់ និងរដ្ឋបាត់បង់ចំណូល ៧ ៥០០លានដុល្លារដោយសារតែវិស័យទេសចរណ៍ដំាក្បាលចុះខ្លំាង។
វាពិតណាស់ថា គឺលុយរបស់បរទេសទេដែលកំពុងចិញ្ចឹមជនភៀសខ្លួនស៊ីរីរស់ក្នុងទឹកដីលីបង់សព្វថ្ងៃ តែគេក៏មិនត្រូវភ្លេចនិយាយទេថា ក្រុមប្រទេសផ្តល់ជំនួយក៏ហាក់ដូចជាធុនទ្រាន់ និងកំពុងប្រឈមទប់នឹងវិបត្តិផ្ទៃក្នុងរបស់ខ្លួនដែរ ពោលគឺវិបត្តិសេដ្ឋកិច្ច។ ទន្ទឹមគ្នានេះ ក្រុមប្រទេសផ្តល់ជំនួយក៏កំពុងប្រឈមនឹងវិបត្តិអន្តរជាតិផ្សេងទៀត ដូចយ៉ាងនៅក្នុងប្រទេសអ៊ីរ៉ាក់ ឬមួយក៏នៅសាធារណរដ្ឋអាហ្រ្វិកកណ្តាល។ ក្នុងឆ្នំា ២០១៤ អង្គការសហប្រជាជាតិបានអំពាវនាវរកជំនួយចំនួន ១ ៨៩០លានដុល្លារសម្រាប់ជនភៀសខ្លួនស៊ីរីនៅលីបង់ តែមានមិនដល់ពាក់កណ្តាលផងដែលទទួលបានជាក់ស្តែង។ សម្រាប់ឆ្នំា ២០១៥ អ.ស.ប.ត្រូវការជំនួយដល់ទៅ ២ ១៤០លានដុល្លារឯណោះ តែគេនៅមិនដឹងថា តើនឹងមានការផ្តល់ឲ្យជាក់ស្តែងចំនួនប៉ុន្មានទេ។
សម្រាប់លីបង់ក្នុងនាមជាប្រទេសម្ចាស់ផ្ទះ គឺមានតែបន្តការងារមនុស្សធម៌របស់ខ្លួនជាបន្ត តែអ្វីដែលលីបង់ចង់បានត្រឡប់វិញនោះ គឺសុំឲ្យអ្នកជ្រកកោនគោរពសិទ្ធិ និងច្បាប់របស់ប្រទេសម្ចាស់ផ្ទះផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ