អ៊ីស្រាអែល-ប៉ាឡេស្ទីន៖តើសង្រ្គាមនឹងផ្ទុះជាថ្មីនៅតំបន់ហ្គាហ្សាក្នុងទឹកដីប៉ាឡេស្ទីន ឬ?
ចុះផ្សាយនៅថ្ងៃ៖
ស្តាប់ - ០៤:២៨
៤ខែ ក្រោយសង្រ្គាមបង្ហូរឈាមនៅក្នុងតំបន់ហ្គាហ្សាក្នុងទឹកដីប៉ាឡេស្ទីនរវាងទ័ពអ៊ីស្រាអែល និងទ័ពចលនាហាម៉ាស់ប៉ាឡេស្ទីនមក ការគំរាមថានឹងអាចមានផ្ទុះសង្រ្គាមជាថ្មីកំពុងលេចឮឡើងគួរឲ្យព្រួយបារម្ភ ពិសេសគឺប្រជាជនប៉ាឡេស្ទីនរស់ក្នុងតំបន់ហ្គាហ្សាដែលស្នាមរបួសរបស់ពួកគេនៅមិនទាន់ជាដាច់នៅឡើយនោះ។ មួយវិញទៀត ៤ខែក្រោយមក លំនៅដ្ឋានដែលបានខូចខាតខ្ទេចខ្ទីរដោយគ្រាប់កំាភ្លើងអ៊ីស្រាអែល ក៏នៅមិនទាន់បានសាងសង់ឡើងវិញទំាងអស់ដែរ។ ទន្ទឹមគ្នានេះ ការហែកហួរគ្នាក៏កំពុងបន្តមានរវាងចលនាប៉ាឡេស្ទីនពីរ គឺចលនាហាម៉ាស់ជ្រុលនិយម និងចលនាហ្វាតាកណ្តាលនិយមរបស់លោកប្រធានរដ្ឋអំណាចប៉ាឡេស្ទីនម៉ាដមូត អាប៉ាស់។
តំាងពីក្រោយការបិទបញ្ចប់សង្រ្គាមរវាងទ័ពអ៊ីស្រាអែល និងទ័ពចលនាប៉ាឡេស្ទីនហាម៉ាស់នៅតំបន់ហ្គាហ្សាក្នុងទឹកដីប៉ាឡេស្ទីនកាលពីថ្ងៃទី២៦ សីហាកន្លងមក គេមិនសូវឃើញមានអ្វីផ្លាស់ប្តូរច្រើនប៉ុន្មានទេនៅក្នុងតំបន់ហ្គាហ្សាដែលមានប្រជាជនប៉ាឡេស្ទីនរស់នៅប្រមាណជា ១លាន ៨សែននាក់ និងដែលរចនាសម្ព័ន្ធភាគច្រើនក្នុងតំបន់បានខូចខាតដោយសារសង្រ្គាម។ រដូវត្រជាក់បានឈានមកដល់ តែមានប្រជាជននៅតំបន់ហ្គាហ្សាចំនួន ១០០ ០០០នាក់កំពុងគ្មានទីជម្រក ហើយដំណើរការសាងសង់លំដ្ឋានរបស់ពួកគេនៅមានការយឺតយ៉ាវខ្លំាងមែនទែន។ នេះក៏ដោយសារថា នៅម្ខាង ភាគីអ៊ីស្រាអែលបានបន្តបិទខ្ទប់ ឬមួយក៏អនុញ្ញាតឲ្យដឹកចូលតិចតួចនូវគ្រឿងសំណង់ ដោយខ្លាចពួកប៉ាឡេស្ទីនបង្វែរយកទៅផលិតអាវុធ រីឯនៅម្ខាងទៀត ជម្លោះនយោបាយរវាងចលនាប៉ាឡេស្ទីនពីរ គឺហាម៉ាស់ដែលកំពុងកាន់អំណាចនៅតំបន់ហ្គាហ្សា និងចលនាហ្វាតារបស់លោកប្រធានរដ្ឋអំណាចប៉ាឡេស្ទីនម៉ាដមូត អាប៉ាស់ដែលកំពុងកាន់អំណាចនៅរ៉ាម៉ាឡាក៏កំពុងបន្តមានយ៉ាងក្តៅគគុកដដែល។
គឺដោយយោងលើហេតុផលខាងលើនេះហើយបានជាមានការលើកឡើងថា បើគ្មានអ្វីប្រែប្រួលក្នុងទិសដៅវិជ្ជមានចាប់ពីឥឡូវនេះទៅទេ នោះសង្រ្គាមនឹងត្រូវផ្ទុះជាថ្មីដោយចៀសមិនរួច។ ការគំរាមព្រមានយ៉ាងដូចនេះបានចេញមកពីមាត់ថ្នាក់ដឹកនំាចលនាហាម៉ាស់។ នៅក្នុងពិធីរម្លឹកខួបគម្រប់ ២៧ឆ្នំានៃការបង្កើតចលនាហាម៉ាស់ ចលនាអ៊ីស្លាមនិយមជ្រុលមួយនេះបានបញ្ចេញសាច់ដុំនៅក្នុងក្បួនព្យុះហយាត្រាមួយ ដោយបង្ហាញឲ្យឃើញនូវការប្តេជ្ញាចិត្តរបស់យុទ្ធជន ព្រមទំាងគ្រាប់រ៉ូកែត និងគ្រឿងអាវុធដទៃទៀត។ ចំណែកសាខាយោធារបស់ចលនាហាម៉ាស់ គឺកាសាមដែលមានវត្តមាននាឱកាសនោះបានព្រមានថា បើគ្មានការសាងសង់តំបន់ហ្គាហ្សាដែលបំផ្លិចបំផ្លាញដោយបច្ចាមិត្តអ៊ីស្រាអែលឡើងវិញទេ នោះប្រជាជន និងថ្នាក់ដឹកនំាបច្ចាមិត្តនឹងទទួលផលវិបាកធ្ងន់ធ្ងរដោយចៀសមិនរួច។
នៅចុងសប្តាហ៍កន្លងទៅ និងជាលើកទី១ តំាងពីថ្ងៃបញ្ចប់សង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាស់នៅតំបន់ហ្គាហ្សាកាលពីថ្ងៃទី២៦ សីហា ទ័ពអាកាសអ៊ីស្រាអែលបានទម្លាក់គ្រាប់បែកលើប៉ែកខាងត្បូងតំបន់ហ្គាហ្សាដើម្បីតបនឹងការបាញ់គ្រាប់រ៉ូកែតរបស់ពួកហាម៉ាស់។ ឧប្បត្តិហេតុថ្មីនេះមិនបានបង្កឲ្យមានរបួស ឬស្លាប់ទេ តែវាជាតម្រុយមួយដែលបញ្ជាក់ថា ស្ថានភាពនៅក្នុងតំបន់ហ្គាហ្សាធ្លាប់រងគ្រោះដោយសង្រ្គាមចំនួន ៣ដង ក្នុងរយៈពេល ៦ឆ្នំាចុងក្រោយកំពុងផ្តើមរំជើបរំជួលជាថ្មី។ សូម្បីតែក្រុមអ្នកវិភាគក៏បានសម្លឹងឃើញយ៉ាងដូច្នេះដែរដោយពួកគេអះអាងថា បើអ៊ីស្រាអែលនៅបន្តនយោបាយបិទខ្ទប់ បើនៅតែការបិទព្រំដែន និងបើគ្មានការសាងសង់តំបន់ហ្គាហ្សាឡើងវិញនៅរយៈពេល ៦ខែខាងមុខទេ នោះចលនាហាម៉ាស់គ្មានជម្រើសផ្សេងក្រៅពីកាន់អាវុធធ្វើសង្រ្គាមជាថ្មីទេ។
ក្រៅពីប្រឈមមុខផ្ទាល់នឹងប្រទេសអ៊ីស្រាអែល ការប្រឈមមុខដាក់គ្នារវាងប៉ាឡេស្ទីនគ្នាឯងក៏កំពុងបន្តមានជាប់ជាប្រចំាដែរ។ កាលពី ៨ខែមុន ចលនាហាម៉ាស់ និងចលនាហ្វាតាបានចុះហត្ថលេខាលើកិច្ចព្រមព្រៀងផ្សះផ្សាគ្នា ដោយចលនាហាម៉ាស់យល់ព្រមប្រគល់អំណាចទៅឲ្យរដ្ឋាភិបាលឯកភាពជាតិមួយ។ តែបញ្ហានៅត្រង់ថា ៨ខែក្រោយមក រដ្ឋាភិបាលឯកភាពជាតិអាចដាក់ជើងជាន់ទឹកដីហ្គាហ្សាបានតែម្តងគត់ និងដែលពួកហាម៉ាស់នៅតែបន្តធ្វើស្តេចសោយរាជ្យក្នុងតំបន់នោះដដែល។ ៨ខែក្រោយមក ការសន្យារៀបចំបោះឆ្នោតក៏នៅមិនបានរៀបចំ។ នៅពេលនេះទៀត ហាម៉ាស់ និងហ្វាតាបានផ្តើមចង្អុលមុខដាក់គ្នាថា មិនបានគោរពតាមកិច្ចព្រមព្រៀងផ្សះផ្សាដែលបានចុះហត្ថលេខា។
អ្វីជាការកត់សម្គាល់ ការបន្តប្រេះឆារវាងចលនាហាម៉ាស់ និងហ្វាតាបានកើតមានឡើង ចំពេលដែលរដ្ឋអំណាចប៉ាឡេស្ទីនកំពុងប្រើយុទ្ធសាស្រ្តការទូតយ៉ាងសកម្មប្រឆំាងនឹងប្រទេសអ៊ីស្រាអែល។ កាលពីថ្ងៃទី១៧ ធ្នូកន្លងទៅថ្មីៗនេះ ប៉ាឡេស្ទីន តាមរយៈប្រទេសហ្ស៊កដានីបានបញ្ជូនគម្រោងសេចក្តីសម្រេចចិត្តរបស់ខ្លួនទៅកាន់ក្រុមប្រឹក្សាសន្តិសុខអង្គការសហប្រជាជាតិ។ គឺជាគម្រោងសេចក្តីសម្រេចចិត្តមួយដែលរដ្ឋអំណាចប៉ាឡេស្ទីនបានទាមទារឲ្យអ៊ីស្រាអែលបញ្ឈប់ការធ្វើអាណានិគមក្នុងទឹកដីប៉ាឡេស្ទីន ដោយទុកពេលឲ្យអ៊ីស្រាអែលរយៈពេល ២ឆ្នំា។ ក្រុមអ្នកវិភាគបានយល់ឃើញថា បើប៉ាឡេស្ទីនចង់សម្រេចឲ្យបាននូវរាល់ការប៉ងប្រាថ្នារបស់ខ្លួននោះ ប៉ាឡេស្ទីនខ្លួនឯងត្រូវតែរួបរួមគ្នាដោយទុកចោលមួយឡែកនូវភាពមិនចុះសម្រុងគ្នា។ នៅខាងអ៊ីស្រាអែលឯណោះ ទីក្រុងហ៊្សេរុយឡាឡិមបានបញ្ជាក់ថា ខ្លួនមិនមើលស្រាលចំពោះការគំរាមរបស់ហាម៉ាស់ទេ ទោះបីជាការគំរាមនោះបានធ្វើឡើងក្រោមរូបភាពអ្វីក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ