អារ៉ាប៊ីសាអូឌីត និងអ៊ីរ៉ង់កំពុងយកសាសនាធ្វើជាឈ្នាន់ដើម្បីប្រយោជន៍នយោបាយក្នុងតំបន់
ចុះផ្សាយនៅថ្ងៃ៖
ស្តាប់ - ០៤:២៤
ការប្រជែងកម្លំាងគ្នារវាងប្រទេសអារ៉ាប៊ីសាអូឌីតនិកាយស៊ុយនីត និងអ៊ីរ៉ង់និកាយឈីអ៊ីតបាន និងកំពុងចិញ្ចឹមភាពតានតឹងផ្នែកសាសនាយ៉ាងក្តៅងំនៅក្នុងតំបន់មជ្ឈិមបូព៌ា។ អារ៉ាប៊ីសាអូឌីត និងអ៊ីរ៉ង់ដែលគោរពសាសនាអ៊ីស្លាមដូចគ្នា តែមាននិកាយខុសគ្នា គឺជាតួអង្គដែលមានទម្ងន់ធ្ងន់ជាងគេនៅក្នុងតំបន់។ តែការមិនចុះសម្រុងគ្នាក្នុងផ្នែកសាសនារវាងគូប្រជែងទំាងពីរត្រូវបានគេមើលឃើញថា គឺដើម្បីប្រយោជន៍នយោបាយសុទ្ធសាធ ពោលគឺប្រជែងកម្លំាងគ្នាដើម្បីធ្វើតួឯកក្នុងតំបន់ដូចដែលឃ្លាមួយចែងថា ភ្នំមួយមិនអាចមានខ្លាពីរទេ។
នៅពេលដែលមានជម្លោះអ្វីមួយបានផ្ទុះឡើងនៅក្នុងតំបន់មជ្ឈិមបូព៌ា គេតែងតែឃើញវត្តមានប្រទេសអារ៉ាប៊ីសាអូឌីត និងប្រទេសអ៊ីរ៉ង់ចេញមុខជួយឈឺឆ្អាលជានិច្ច ពិសេសនៅក្នុងជម្លោះណាដែលមានលក្ខណៈសាសនា ពោលរវាងសហគមន៍សាសនាអ៊ីស្លាមនិកាយស៊ុយនីត និងសហគមន៍សាសនាអ៊ីស្លាមនិកាយឈីអ៊ីត។ ទង្វើរបៀបនេះពិតជាមិនបានធ្វើឲ្យគេភ្ញាក់ផ្អើលឡើយ ព្រោះថា អារ៉ាប៊ីសាអូឌីតដែលសម្បូរដោយអ្នកកាន់សាសនាអ៊ីស្លាមនិកាយស៊ុយនីតរស់នៅត្រូវតែចេញមុខការពារផលប្រយោជន៍របស់ពួកស៊ុយនីត ចំណែកអ៊ីរ៉ង់ដែលសម្បូរដោយអ្នកកាន់សាសនាអ៊ីស្លាមនិកាយឈីអ៊ីតរស់នៅក៏ត្រូវតែចេញមុខការពារផលប្រយោជន៍របស់ពួកឈីអ៊ីតដែរ។
ជាក់ស្តែងជម្លោះផ្ទៃក្នុងនៅក្នុងប្រទេសយេម៉ែន អន្តរាគមន៍វាយប្រហារផ្លូវអាកាសដឹកនំាដោយប្រទេសអារ៉ាប៊ីសាអូឌីតប្រឆំាងនឹងពួកឧទ្ទាមហ៊ូទី្សនិកាយឈីអ៊ីតត្រូវបានទីក្រុងរីយ៉ាដលើកយកហេតុផលមកពន្យល់ថា ជាយុទ្ធនាការការពារសភាវៈល្អប្រឆំាងនឹងសភាវៈអាក្រក់។ ជាចម្លើយតបវិញទាន់ហន់ ប្រទេសអ៊ីរ៉ង់បានចោទអារ៉ាប៊ីសាអូឌីតថា កំពុងប្រពឹត្តអំពើប្រល័យពូជសាសន៍។ ចំណែកជម្លោះផ្ទៃក្នុងនៅក្នុងប្រទេសស៊ីរី អារ៉ាប៊ីសាអូឌីតបានចេញមុខគំាទ្រក្រុមប្រឆំាងនឹងរដ្ឋាភិបាលរបស់លោកប្រធានាធិបតីស៊ីរីអាសាដ។ រីឯអ៊ីរ៉ង់ និងចលនាហេស្បូឡាលីបង់បានចេញមុខគំាទ្រលោកអាសាដដែលបានចោទក្រុមប្រឆំាងថា ជាពួកភេរវជននិកាយស៊ុយនីត។
នៅលីបង់ ទីក្រុងរីយ៉ាដជាសម្ព័ន្ធមិត្តរបស់អតីតនាយករដ្ឋមន្រ្តីលីបង់និកាយស៊ុយនីតសាដ ហារីរីដែលប្រឆំាងនឹងចលនាហេស្បូឡានិកាយឈីអ៊ីត។ ជម្លោះក្នុងប្រទេសបារ៉ែនក៏ដូចគ្នាអ៊ីចឹងដែរ ក្រុមគ្រួសាររាជានិយមនិកាយស៊ុយនីតទទួលបានការគំាទ្រ និងជួយឧបត្ថម្ភពីអារ៉ាប៊ីសាអូឌីត និងបានចោទអ៊ីរ៉ង់ពីបទបានបញ្ឆេះភ្លើងឲ្យពួកឈីអ៊ីតក្រោកឈរបង្កចលាចលក្នុងសង្គមបារ៉ែន។ មកដល់ត្រង់ចំណុចនេះ និងបើគេពិនិត្យមើលមួយភ្លែតទៅឃើញថា អ្វីៗហាក់ដូចជាមិនពិបាកយល់ទេ ព្រោះអារ៉ាប៊ីសាអូឌីត និងអ៊ីរ៉ង់បានព្យាយាមការពារផលប្រយោជន៍សហគមន៍និកាយសាសនារបស់គេរៀងៗខ្លួន។
តែបើគេពិនិត្យមើលឲ្យបានស៊ីជម្រៅបន្តិចទៅឃើញថា ការប្រជែងកម្លំាងគ្នាដើម្បីការពារនិកាយសាសនាខ្លួនមិនមែនទើបតែកើតមាននៅថ្ងៃម្សិលមិញ ឬនៅថ្ងៃនេះឯណា តែជាជម្លោះដ៏ចាស់គំរឹលយូរលង់មួយតំាងពី ១ ៤០០ឆ្នំាមកហើយ។ ដូច្នេះ ការដែលទីក្រុងរីយ៉ាដ និងទីក្រុងតេហេរ៉ង់លើកយកបុព្វហេតុសាសនាមកនិយាយគ្រាន់តែជាលេសមួយដើម្បីបិទបំាងមហិច្ឆតាពិតរបស់ខ្លួនតែប៉ុណ្ណោះ។ មហិច្ឆតាពិតនោះ គឺគ្មានអ្វីក្រៅពីនយោបាយនោះទេ និយាយឲ្យស្រួល គឺប្រជែងកម្លំាងគ្នាដើម្បីធ្វើជាមេក្លោងនៅក្នុងតំបន់។ ចូរកុំភ្លេចថា ក្នុងនាមជាប្រទេសជង្រុកប្រេងកាតសំខាន់ពីរនៅក្នុងតំបន់ ខ្លាអារ៉ាប៊ីសាអូឌីត និងខ្លាអ៊ីរ៉ង់បានប្រជែងកម្លំាងគ្នាដើម្បីសោយរាជ្យនៅភ្នំក្នុងតំបន់មជ្ឈិមបូព៌ាអស់ជាច្រើនទសវត្សកន្លងមកហើយ។
មានការលើកឡើងថា ការដែលសហគមន៍សាសនាអ៊ីស្លាមនិកាយស៊ុយនីត និងឈីអ៊ីតបានប្រឈមមុខដាក់គ្នា មកពីពួកគេមិនចុះសម្រុងគ្នាក្នុងការឲ្យនិយមន័យពិតលើពាក្យអ៊ីស្លាម។ តែតាមប្រវត្តិសាស្រ្ត និងការយល់ឃើញរបស់ប្រទេសកាន់សាសនាអ៊ីស្លាមមួយចំនួនឲ្យដឹងថា ការពិតមិនមែនដូច្នោះទេ។ តែគឺការដណ្តើមប្រយោជន៍គ្នាទៅវិញទេ ព្រោះថា ប្រទេសពីរដែលកាន់សាសនាតែមួយដូចគ្នាមិនប្រាកដថាគេយល់ព្រមចែកប្រយោជន៍ឲ្យគ្នាទៅវិញ ទៅមកនោះទេ។ ឧទាហរណ៍ដូចជាប្រទេសអេហ្ស៊ីប និងកាតាដែលប្រកាន់និកាយស៊ុយនីតដូចគ្នា និងបានរួមកម្លំាងជាមួយអារ៉ាប៊ីសាអូឌីតដើម្បីវាយប្រហារពួកឧទ្ទាមហ៊ូទី្សឈីអ៊ីតនៅយេម៉ែន បែរជាកំពុងមានទំនាក់ទំនងតានតឹងរវាងគ្នាដោយសារតែទីក្រុងដូហាបានគំាទ្រចលនាភាតរអ៊ីស្លាមនៅអេហ្ស៊ីបដែលទីក្រុងគែរកំពុងព្យាយាមកំចាត់ចោល។
ទន្ទឹមគ្នានេះ គេក៏ត្រូវហ៊ានទទួលស្គាល់ថា ជម្លោះរវាងសហគមន៍និកាយស៊ុយនីត និងឈីអ៊ីតនៅក្នុងតំបន់ពិតជាកំពុងកើតមានប្រាកដមែន។ ក៏ប៉ុន្តែ ជម្លោះសាសនានេះនឹងកាន់តែធ្ងន់ធ្ងរដុនដាបមិនអាចគ្រប់គ្រងបាន នៅពេលដែលភាគីនីមួយៗក្នុងតំបន់បានឆ្លៀតយករឿងសាសនាមកធ្វើជាលេសដើម្បីប្រយោជន៍នយោបាយផ្ទាល់ខ្លួននោះ។ ជាក់ស្តែងមិនអាចប្រកែកបាន គឺអំពើហិង្សាសងសឹកសម្លាប់គ្នាយ៉ាងរវាងក្រុមនិកាយស៊ុយនីត និងឈីអ៊ីតនៅក្នុងប្រទេសអ៊ីរ៉ាក់។ អារ៉ាប៊ីសាអូឌីត និងអ៊ីរ៉ង់បានគិតដូចគ្នាថា ភ្នំមួយមិនអាចមានខ្លាពីរទេនៅតំបន់មជ្ឈិមបូព៌ា តែការដែលពួកគេយកសាសនាមកធ្វើជាឈ្នាន់ពេលនេះ គឺជារឿងគ្រោះថ្នាក់ខ្លំាងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ