យេម៉ែន ជាប្រទេសដែលកំពុងបន្តហែកហួរគ្នា និងជាជង្រុកនៃពួកជីហាតអាល់កៃដា !
ចុះផ្សាយនៅថ្ងៃ៖
ស្តាប់ - ០៥:០៩
ក្រោយអំពើភេរវកម្មប្រឆំាងនឹងទីស្នាក់ការរបស់ទស្សនាវដ្តីត្លុកកំប្លែង Charlie Hebdo និងទង្វើចាប់មនុស្សធ្វើជាថ្នូរនៅក្នុងហាងឡក់ទំនិញមួយរបស់ជនជាតិជ្វីវក្នុងប្រទេសបារំាងមក គឺប្រទេសយេម៉ែនឯណោះដែលកំពុងទទួលរងការវាយប្រហារយ៉ាងចាស់ដៃ។ ទន្ទឹមនឹងវិបត្តិនយោបាយដែលយេម៉ែនកំពុងបន្តពើបប្រទះសព្វថ្ងៃ យេម៉ែនក៏ជាជង្រុករបស់អង្គការរដ្ឋអ៊ីស្លាម និងរបស់សាខាអាល់កៃដាក្នុងតំបន់ក្រោមឈ្មោះថា អាល់កៃដាក្នុងឧបទ្វីបអារ៉ាប់ដែលហៅកាត់ថា AQPA ដែរ។ សព្វថ្ងៃ AQPA កំពុងស្ថិតក្រោមការគ្រប់គ្រងរបស់ Nasser Al-Wahashi ដែលជាអតីតលេខាផ្ទាល់របស់ Oussama Ben Laden។ អាល់កៃដាក្នុងឧបទ្វីបអារ៉ាប់មួយនេះ គឺជាអង្គការភេរវនិយមមួយក្នុងចំណោមអង្គការភេរវនិយមដ៏គ្រោះថ្នាក់បំផុតក្នុងលោក។
ផ្តើមលេចរូបរាងជាផ្លូវការក្នុងខែមករា ឆ្នំា ២០០៩ អង្គការអាល់កៃដាក្នុងឧបទ្វីបអារ៉ាប់ហៅកាត់ថា AQPA បានប្រសូត្រចេញពីការរួមបញ្ចូលគ្នារវាងសាខាអាល់កៃដាក្នុងប្រទេសយេម៉ែន និងប្រទេសអារ៉ាប៊ីសាអូឌីត។ អង្គការភេរវនិយមមួយនេះតែងតែបានប្តូរយុទ្ធសាស្រ្តវាយប្រហាររបស់ខ្លួនដើម្បី ប្រឈមទប់នឹងរដ្ឋអំណាចយេម៉ែន ក៏ដូចជាសម្ព័ន្ធមិត្តរបស់សហរដ្ឋអាមេរិក។ តែនៅចំពោះមុខយុទ្ធនាការវាយប្រហារផ្លូវគោក និងផ្លូវអាកាសទៅលើជង្រុករបស់ពួកនេះនៅតំបន់ប៉ែកខាងត្បូង និងខាងកើតប្រទេស អង្គការអាល់កៃដាក្នុងឧបទ្វីបអារ៉ាប់មួយនេះបានចុះខ្សោយយ៉ាងខ្លំាង និងថែមទំាងបានប្តូរពីការបង្កភេរវកម្មនៅគ្រប់ទីកន្លែងទៅជាភេរវកម្មអត្តឃាតដោយជ្រើសរើសគោលដៅច្បាស់លាស់ ពិសេសសម្លាប់មន្រ្តីទាហានរដ្ឋាភិបាល។
យ៉ាងណាក៏ដោយ AQPA នៅតែអង្គការភេរវនិយមមួយប្រកបដោយគ្រោះថ្នាក់បំផុតចំពោះរដ្ឋាភិបាលយេម៉ែន ក៏ដូចជាចំពោះសហគមន៍អន្តរជាតិទំាងមូល។ សព្វថ្ងៃ ចលនាភេរវនិយមមួយនេះបាន និងកំពុងពង្រឹងកម្លំាងរបស់ខ្លួននៅខេត្ត Hadramaout ប៉ែកខាងកើត។ អ្វីជាការកត់សម្គាល់ កំណើនឥទ្ធិពលរបស់ AQPA បានកើតមានឡើងនៅក្នុងប្រទេសមួយដែលកំពុងបន្តហែកហួរគ្នាដោយរឿងនយោបាយ និងជម្លោះតានតឹងក្នុងរឿងសាសនា។ ការចូលប្រឡូកក្នុងឆាកនយោបាយគួរឲ្យភ្ញាក់ផ្អើលរបស់ចលនាអ៊ីស្លាមនិកាយហ៊ូទីសមិនត្រឹមតែធ្វើឲ្យរដ្ឋយេម៉ែនស្គាល់ភាពវឹកវរប៉ុណ្ណោះទេ តែក៏ជាសញ្ញាមួយដែលបញ្ជាក់ពីការចាប់ផ្តើមជម្លោះសាសនាដ៏ធ្ងន់ធ្ងរមួយដែរ។ ពួកហ៊ូទីសនេះបានទទួលការគំាទ្រយ៉ាងពេញទំហឹងពីប្រទេសអ៊ីរ៉ង់ ពិសេសក្នុងផ្នែកហិរញ្ញវត្ថុ។ ចាប់ពីពេលនេះតទៅ គឺពួកហ៊ូទីសបានក្លាយជាផ្ទាំងស៊ីបរបស់ AQPA។
ពិតណាស់ថា វិបត្តិនយោបាយផ្ទៃក្នុងហែកហួរគ្នា និងជម្លោះសាសនាដ៏តានតឹងនៅក្នុងប្រទេសយេម៉ែនពេលនេះ គឺជារឿងដ៏គួរឲ្យព្រួយបារម្ភមួយ និងដែលសហគមន៍អន្តរជាតិមិនអាចបន្តឈរឱបដៃមើលបានឡើយ។ តែនៅចំពោះ និងអ្វីដែលបានធ្វើឲ្យសហគមន៍អន្តរជាតិចាប់អារម្មណ៍ខ្លំាងជាងគេនោះគឺថា គឺប្រទេសយេម៉ែននេះហើយជាសាលាបណ្តុះបណ្តាលពួកជីហាតអាល់កៃដាមួយយ៉ាងសំខាន់នៅក្នុងតំបន់។ ចូរកុំភ្លេចថា មុននឹងយេម៉ែនស្គាល់បដិវត្តន៍អារ៉ាប់រហូតដល់ធ្វើឲ្យលោកប្រធានាធិបតីអាប់ដាឡា សាឡេខ្ទាតពីអំណាចក្នុងខែកុម្ភៈ ឆ្នំា ២០១២ និងធ្វើឲ្យប្រទេសស្គាល់អស្ថិរភាពនយោបាយមកដល់សព្វថ្ងៃ យេម៉ែន ជាជម្រើសកន្លែងមួយសម្រាប់អ្នកដែលចង់សិក្សារៀនសូត្រភាសាអារ៉ាប់ និងទ្រឹស្តីសាសនាអ៊ីស្លាម។ មនុស្សភាគច្រើន ពិសេសជនបរទេសដែលទៅសិក្សាភាសាអារ៉ាប់ និងទ្រឹស្តីសាសនាអ៊ីស្លាមក្នុងប្រទេសយេម៉ែន គឺមិនមែនក្នុងគោលដៅយកសញ្ញាប័ត្រដើម្បីធ្វើជីហាតដើរបង្កភេរវកម្មទេ។
តែបញ្ហានៅត្រង់ថា មានកូនសិស្សភាគច្រើនបានឆ្លៀតទាក់ទងជាមួយនឹងមន្រ្តីសាសនាជាន់ខ្ពស់ក្នុងស្រុក ដោយរាប់បញ្ចូលទំាងសមាជិករបស់គណបក្សអ៊ីស្លាម និងពួកជីហាតក្នុងស្រុកផងដែរ។ នៅទីបំផុត ក្រុមភេរវជនដែលបានបង្កអំពើភេរវកម្ម និងប៉ុនប៉ងធ្វើភេរវកម្មត្រូវបានគេដឹងថា ភាគច្រើនជាពួកដែលបានរៀនសូត្រហ្វឹកហ្វឺនចេញពីសាលានៅក្នុងយេម៉ែននោះឯង។ ជាក់ស្តែងក្នុងឆ្នំា ២០០៩ ការប៉ុនប៉ងកម្ទេចយន្តហោះអាមេរិកំាងដែលហោះហើរពីប្រទេសហូឡង់ ទៅរដ្ឋមីឈីហ្កានសហរដ្ឋអាមេរិកបានរៀបចំដោយ Omar Farouk Abdoulmoutallab ជាជនជាតិនីហ្សេរីយ៉ាអាយុ ២៣ឆ្នំា និងដែលបានសិក្សារៀនសូត្រភាសាអារ៉ាប់ក្នុងប្រទេសយេម៉ែន។ ក្នុងខែតុលា ឆ្នំា ២០១០ មានអីវ៉ាន់បង្កប់ដោយជាតិផ្ទុះពីរកញ្ចប់ផ្ញើចេញពីប្រទេសយេម៉ែនទៅកាន់សហគមន៍ជ្វីវនៅសហរដ្ឋអាមេរិកត្រូវបានគេប្រទះឃើញទាន់ពេលនៅក្នុងប្រទេសអង់គ្លេស និងអេមីរ៉ាអារ៉ាប់រួម។
ថ្មីៗនេះទៀត និងដែលជាភស្តុតាងមិនអាចប្រកែកបាននោះ គឺការបាញ់ប្រហារសម្លាប់អ្នកកាសែតរបស់ទស្សនាវដ្តីត្លុកកប្លែង Chalie Hebdo ក្នុងទីក្រុងប៉ារីស ប្រទេសបារំាងពីសំណាក់បងប្អូនពីរនាក់ គឺ Chérif និង Saïd Kouachi។ រដ្ឋអំណាចយេម៉ែនបានបញ្ជាក់ថា ភេរវជនបងប្អូនទំាងពីរបានរៀនសូត្រ ហ្វឹកហ្វឺនពីរបៀបប្រើអាវុធនៅក្នុងប្រទេសយេម៉ែនកាលពីឆ្នំា ២០១១។ Chérif និង Saïd Kouachi បានទៅដល់ប្រទេសអូម៉ង់ក្នុងថ្ងៃទី២៥ កក្កដា ឆ្នំា ២០១១ រួចបានឆ្លងចូលក្នុងប្រទេសយេម៉ែនដោយលួចលាក់។ ស្នាក់នៅក្នុងប្រទេសយេម៉ែនរយៈពេល ២សប្តាហ៍ Chérif និង Saïd Kouachi បានជួបជាមួយ Anouar al Aoulaki ដែលជាគ្រូបង្វឹកអាល់កៃដា និងដែលបានស្លាប់ក្រោមគ្រាប់បែកអាមេរិកំាងក្នុងខែកញ្ញា ឆ្នំា ២០១១។ តែ Chérif និង Saïd Kouachi បានចេញពីប្រទេសអូម៉ង់មកកាន់ប្រទេសបារំាងតំាងពី ថ្ងៃទី១៥ សីហា ឆ្នំា ២០១១។ សំងំរៀបចំយុទ្ធសាស្រ្តជិត ៤ឆ្នំា Chérif និង Saïd Kouachi បានផ្តើមអនុវត្តន៍ជាក់ស្តែង ដោយបាញ់ប្រហារលើទីស្នាក់ការរបស់ទស្សនាវដ្តី Charlie Hebdo ក្នុងថ្ងៃទី ៧ មករា ឆ្នំា ២០១៥ បណ្តាលឲ្យស្លាប់មនុស្ស ១២នាក់។
ពិតណាស់ថា សហគមន៍អន្តរជាតិបានចូលរួមរំលែកទុក្ខ និងសម្តែងសាមគ្គីភាពជាមួយពលរដ្ឋបារំាងក្នុងន័យថា ទស្សនាវដ្តីត្លុកកប្លែង Charlie Hebdo ដែលជានិមិត្តរូបនៃសិទ្ធិសេរីភាពក្នុងការបញ្ចេញមតិ និងសិទ្ធិសេរីភាពសារព័ត៌មានបានរងការវាយប្រហារ។ តែអ្វីដែលប្រទេសនីមួយៗត្រូវចាត់វិធានការជាបន្ទាន់នោះ គឺទប់ស្កាត់ការចេញ ចូលរបស់ពួកជីហាតជនជាតិខ្លួន ព្រោះថា គ្មានអ្វីគ្រោះថ្នាក់ជាងដង្កូវចេញពីសាច់ឯងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ