ប៉ាគីស្ថាន៖កងទ័ពបើកប្រតិបត្តិការវាយប្រហារលើជំរំឧទ្ទាមតាលីបង់ ដោយសម្លាប់បាន ១៨នាក់
នៅក្នុងប្រទេសប៉ាគីស្ថាន កងទ័ពបានបើកប្រតិបត្តិការផ្លូវអាកាស ជាមួយនឹងជំនួយកំាភ្លើងធំទៅលើតំបន់ស្ថិតជុំវិញស្រុកមីរ៉ង់សាស្ថិតក្នុងខេត្តវ៉ាហ្ស៊ីរីស្ថានប៉ែកខាងជើងដោយបានបណ្តាលឲ្យស្លាប់ពួកឧទ្ទាមតាលីបង់ចំនួន ១៨នាក់នាចុងសប្តាហ៍កន្លងទៅ។ ក្នុងចំណោមពួកឧទ្ទាមដែលស្លាប់នោះ មានមួយចំនួនបានឆ្លងចូលពីប្រទេសក្រៅ ពិសេសពីប្រទេសអាហ្វហ្កានីស្ថាន នេះជាការបញ្ជាក់របស់អ្នកទទួលខុសត្រូវប៉ាគីស្ថាន។
ចុះផ្សាយនៅថ្ងៃ៖
ស្តាប់ - ០២:១៤
ក្រៅពីសម្លាប់បានពួកឧទ្ទាម ប្រតិបត្តិការសឹករបស់កម្លំាងទ័ពប៉ាគីស្ថានក៏បានបំផ្លាញទីជម្រកជាច្រើនរបស់ពួកឧទ្ទាម ព្រមទំាងឃ្លំាស្តុកអាវុធផងដែរ។ នៅក្នុងសេចក្តីជូនដំណឹងមួយ អ្នកទទួលខុសត្រូវផ្នែកស៊ើបអង្កេតបានបញ្ជាក់ថា ប្រតិបត្តិការផ្លូវអាកាសរបស់ទ័ពរដ្ឋាភិបាលពិតជាបានសម្លាប់ជិវិតមនុស្ស ពិសេសគឺពួកឧទ្ទាមតាលីបង់តែម្តង។ សូមជម្រាបជូនថា តំាងពីពាក់កណ្តាលខែមិថុនាមកម្ល៉េះដែលកងទ័ពប៉ាគីស្ថានបានបើកការវាយប្រហារលើខេត្តវ៉ាហ្ស៊ីរីស្ថានប៉ែកខាងជើង។ គឺជាតំបន់កុលសម្ព័ន្ធ និងជាទីជម្រករបស់ពួកឧទ្ទាមតាលីបង់ និងអាល់កៃដាស្ថិតប៉ែកពាយព្យប្រទេសជាប់ព្រំដែនជាមួយប្រទេសអាហ្វហ្កានីស្ថាន។ យោងតាមតួលេខផ្តល់ដោយទាហានប៉ាគីស្ថាន ប្រតិបត្តិការសឹកដែលគិតមកដល់ថ្ងៃនេះបានបណ្តាលឲ្យបាត់បង់ជីវិតពួកឧទ្ទាមជាង ៤០០នាក់ និងទាហានរដ្ឋាភិបាលចំនួន ២០នាក់។ នេះជាតួលេខមួយដែលគេពិបាកផ្ទៀងផ្ទាត់ ហើយក៏គេមិនអាចដឹងពីអត្តសញ្ញាណរបស់សពនីមួយៗបានដែរ ព្រោះតំបន់នោះត្រូវបានហាមមិនឲ្យអ្នកកាសែតចូលទៅទេ
គួររម្លឹកជូនថា អស់ជាច្រើនឆ្នំាកន្លងមកហើយដែលតំបន់កុលសម្ព័ន្ធវ៉ារីហ្ស៊ីស្ថានប៉ែកខាងជើងបានក្លាយជាទីតំាងរបស់ពួកឧទ្ទាមតាលីបង់ និងពួកអាល់កៃដាក្នុងស្រុក និងបរទេសឆ្លងពីប្រទេសជិតខាង ដូចយ៉ាងពីប្រទេសអាហ្វហ្កានីស្ថានជាដើម។ អំពើហិង្សាបង្ហូរឈាមជាច្រើនដែលបានផ្ទុះឡើងនៅក្នុងប្រទេសប៉ាគីស្ថានតំាងពីឆ្នំា ២០០៧ មក គឺជាស្នាដៃរបស់ពួកឧទ្ទាមនៅក្នុងតំបន់កុលសម្ព័ន្ធវ៉ារីហ្ស៊ីស្ថានប៉ែកខាងជើងនោះឯង។ ការវាយប្រហារលើរដ្ឋាភិបាលរបស់ប្រទេសអាហ្វហ្កានីស្ថាន និងលើអង្គការអូតង់ក្នុងប្រទេសអាហ្វហ្កានីស្ថានក៏បានបង្កឡើងចេញពីពួកឧទ្ទាមនៅក្នុងតំបន់នោះដែរ។
អ្វីជាការកត់សម្គាល់ ប្រតិបត្តិការវាយប្រហាររបស់ទ័ពអាកាសប៉ាគីស្ថាននៅថ្ងៃអាទិត្យបានធ្វើឡើង មួយថ្ងៃបន្ទាប់ពីពួកឧទ្ទាមឆ្លងពីប្រទេសអាហ្វហ្កានីស្ថានបានសម្លាប់ទាហានប៉ាគីស្ថាន ៣នាក់នៅព្រំដែនជាប់ប្រទេសអាហ្វហ្កានីស្ថាន។ ភ្លាមៗ រដ្ឋអំណាចប៉ាគីស្ថានបានទម្លាក់កំហុសដាក់ក្រុមឧទ្ទាមតាលីបង់ប៉ាគីស្ថានដែលបានតស៊ូប្រឆំាងទីក្រុងអ៊ីស្លាម៉ាបាតតំាងពី ៧ឆ្នំាមកហើយ។ ទន្ទឹមគ្នានេះ ប៉ាគីស្ថានក៏បានស្តីបន្ទោសអាហ្វហ្កានីស្ថានដោយបានអំពាវនាវទីក្រុងកាប៊ូលឲ្យកំចាត់ពួកឧទ្ទាមតាលីបង់ក្នុងទឹកដីខ្លួនដើម្បីកុំឲ្យពួកនេះចូលមកធ្វើសកម្មភាពប្រឆំាងប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ