ប៉ាគីស្ថាន៖ចលនាឧទ្ទាមតាលីបង់ និងរដ្ឋាភិបាលបានផ្តើមកិច្ចចរចាសន្តិភាពឡើងវិញ
នៅក្នុងប្រទេសប៉ាគីស្ថាន កិច្ចចរចាសន្តិភាពរវាងក្រុមឧទ្ទាមតាលីបង់ និងរដ្ឋាភិបាលបានចាប់ផ្តើមជាថ្មីនាថ្ងៃពុធ ទី៥ មីនាក្នុងស្រុកខាតតាក ស្ថិតប៉ែកពាយ័ព្យប្រទេស។ កម្មវត្ថុនៃកិច្ចចរចាជាប្រវត្តិសាស្រ្តរវាងគូបដិបក្ខទំាងពីរ គឺដើម្បីបិទបញ្ចប់ជម្លោះបង្ហូរឈាមរវាងគ្នាដែលបានអូសបន្លាយតំាងពី ៧ឆ្នំាកន្លងមក។ គួរជម្រាបជូនថា កិច្ចចរចារវាងភាគីទំាងពីរបានចាប់ផ្តើមតំាងតែពីដើមខែកុម្ភៈមកម្ល៉េះ តែត្រូវបានរដ្ឋាភិបាលប្រកាសផ្អាកទៅវិញ បន្ទាប់ពីចលនាឧទ្ទាមបានប្រកាសពីការបរិហារជីវិតទាហានប៉ាគីស្ថានចំនួន ២៣នាក់។ ជាចម្លើយតបវិញនៅពេលនេះ កងទ័ពរដ្ឋាភិបាលបានធ្វើការទម្លាក់គ្រាប់បែកលើមូលដ្ឋានរបស់ពួកឧទ្ទាម។
ចុះផ្សាយនៅថ្ងៃ៖
ស្តាប់ - ០២:២៨
អ្វីៗបានចាប់ផ្តើមជាថ្មី នៅក្រោយការសម្រេចចិត្តរបស់ក្រុមឧទ្ទាមតាលីបង់ក្នុងការផ្អាកឈប់បាញ់រយៈពេល ១ខែ កាលពីសប្តាហ៍កន្លងទៅ។ គឺតាមរយៈការសម្រេចចិត្តនេះហើយដែលបានជម្រុញឲ្យភាគីជម្លោះទំាងពីរផ្តើមកិច្ចចរចាសន្តិភាពជាថ្មីរវាងគ្នានាពេលនេះ។ កិច្ចចរចាជាថ្មីដែលត្រូវបានក្រុមអ្នកវិភាគមើលឃើញថា ហាក់ដូចជាមិនសូវមានដំណើរល្អប៉ុន្មានទេ។ មិនសូវមានដំណើរការរលូនល្អក៏ដោយសារថា ក្រុមឧទ្ទាមបានព្យាយាមអូសបន្លាយពេលវេលាដើម្បីកែនប្រមូលគី្នគ្នារបស់ពួកគេ នៅក្រោយការវាយប្រហារផ្លូវអាកាសពីសំណាក់កម្លំាងរដ្ឋាភិបាល។
ការកត់សម្គាល់មួយទៀត កិច្ចចរចាសន្តិភាពរវាងភាគីជម្លោះទំាងពីរកាលពីថ្ងៃពុធ ទី៥ មីនាត្រូវបានរៀបចំធ្វើឡើងនៅក្នុងដែនអំណាចរបស់ចលនាឧទ្ទាមតាលីបង់ ពោលគឺខុសពីជំនួបលើកទី១ ដែលបានរៀបចំឡើងនៅទីស្នាក់ការកណ្តាលនៃសាលាអ៊ីស្លាមរបស់ប្រមុខចលនា Tehreek-e-Taliban ដែលជាចលនាប្រមូលផ្តុំដោយក្រុមប្រឆំាងជាច្រើនទៀតស្ថិតក្នុងស្រុកអាកូរ៉ា ខាតតាក់ប៉ែកពាយ័ព្យ។ កិច្ចចរចាសន្តិភាពលើកទី២ នេះត្រូវបានគេចាត់ទុកជាដំណាក់កាលយុទ្ធសាស្រ្តដែលភាគីទំាងពីរត្រូវតែសម្រេចឲ្យបាននូវលទ្ធផលជាក់ស្តែងមួយ។
យ៉ាងណាក៏ដោយ និងបើទោះបីជាភាគីនីមួយៗបានព្យាយាមបង្ហាញចេញនូវឆន្ទៈចង់បិទបញ្ចប់ការបង្ហូរឈាមរវាងគ្នាក៏ដោយ ក៏អំពើហិង្សានៅតែបន្តកើតមានជាហូរហែរចេញមកពីភាគីទំាងសងខាង។ ជាក់ស្តែងកាលពីថ្ងៃចន្ទ ដើមសប្តាហ៍នេះ អំពើភេរវកម្មប្រឆំាងនឹងតុលាការក្នុងទីក្រុងអ៊ីស្លាម៉ាបាតបានបណ្តាលឲ្យមានមនុស្សស្លាប់១១នាក់ និងរបួសជាង ២០នាក់ផ្សេងទៀត។ គឺជាសោកនាដកម្មលើកទី១ ដែលមិនធ្លាប់មាននៅចំកណ្តាលបេះដូងប៉ាគីស្ថានទេ គិតតំាងពីឆ្នំា ២០០៨ មក។ ទង្វើហិង្សានេះត្រូវបានប្រកាសទទួលស្គាល់ដោយចលនាឧទ្ទាមមួយទៀត គឺ Ahrar ul-Hind ដែលបានផ្តាច់ខ្លួនចេញពីចលនា Tehreek-e-Taliban និងដែលបានប្រឆំាងនឹងកិច្ចចរចាសន្តិភាពនាពេលនេះ។
រហូតមកដល់ពេលនេះ ប្រមុខដឹកនំាចរចាខាងតាលីបង់បានបញ្ជាក់ថា គេមិនគួរទម្លាក់កំហុសលើពួកតាលីបង់នៅរាល់អំពើហិង្សាទំាងអស់ទេ និងបានចោទអាមេរិក អាហ្វហ្កានីស្ថាន និងឥណ្ឌាថាបានព្យាយាមរារំាងមិនឲ្យកិច្ចចរចាសន្តិភាពទទួលបានជោគជ័យ។ តែអតីតមេទាហានប៉ាគីស្ថានបានអះអាងថា ពួកឧទ្ទាមតាលីបង់ក៏មិនអាចបដិសេធពីការជាប់ពាក់ព័ន្ធក្នុងទង្វើភេរវកម្មរបស់ខ្លួនបានដែរ។ សម្រាប់ក្រុមអ្នកវិភាគវិញ ភាគីជម្លោះទំាងពីរត្រូវតែសម្រេចឲ្យបាននូវលទ្ធផលជាក់ស្តែងមួយចាប់ពីពេលនេះទៅ ៣ ឬ ៤សប្តាហ៍ខាងមុខ។ បើពុំនោះសោតទេ វាជាបរាជ័យមួយធំណាស់សម្រាប់ទំាងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ